Narsaatit qaqortissimapput katersuiffigeriaannaallutik
1. Suliaq pingaarutilik suna aallartereersimava?
1 Jiisusip arnaq Samariamiu oqaluussiffigereerlugu ajoqersukkaminut oqarpoq: “Isisi uisissigit narsaatillu qimerloorlugit, qaqortissimapput katersuiffigeriaannanngorlutik.” (Joh 4:35, 36) Anersaakkut katersuineq aallartereersimavoq, Jiisusillu silarsuaq tamakkerlugu suliap qanoq annertutiginissaa siumut takorloorsinnaavaa. Qilammi atorfimminiit Jiisusi suli annertuumik katersuiniarnermut suleqataavoq. (Matt 28:19, 20) Katersuiniarnerup killissaata qanilliartorneranut takussutissat suut sukataarunneqarnerulersimappat?
2. Ineriartorneq suna ersersitsiva silarsuaq tamakkerlugu katersuinermik suliaq sukataarunneqarnerulersoq?
2 Silarsuaq tamakkerlugu katersuiniarneq: Silarsuarmi oqaluussisartut ukiumi kiffartorfiusumi 2009-mi 3,2 procentimik amerlanerulersimapput. Nunani oqaluussinermik inerteqqutaaffiusuni oqaluussisartut 14 procentimik amerleriarsimapput. Qaammatit tamaasa Biibilimik atuaqqissaaqatigineqartartut nalunaarsorneqarsimasut 7.619.000-it qaangersimavaat — tassa oqaluussisartut amerlanerpaaffiat qaangerlugu Biibilimik atuaqqissaaqatigineqartartut millionit affangajaanik siornarnit amerlanerusut nalunaarutigineqarsimapput. Sumiiffinni amerlasuuni oqaluussinerup sukkasuumik siaruarpallannera ilutigalugu gileadimi atuarsimasunik ajoqersuiartortitanik tikisitsisoqarnissaannik qinnuteqartarnerit amerlisimapput. Oqaluussiffigisartakkat allamiutut oqaluffiusut nunarpassuarni inerititaqarfiulluarput. Ersarippoq, Jehovap katersuiffiup killissaata qanilliartornerani suliaq pilertornerulersikkaa. (Es 60:22) ‘Narsaataatinnut’ isumalluartumik isiginnittaaseqarpit?
3. Nalunaajaasut ilaat najukkaminni qanoq isummersinnaappat?
3 Illit najukkanni katersuineq: “Uanga oqaluussiffigisartakkanni ineriartortoqanngilaq,” ilaat oqarumassapput. Ilumoorpoq oqaluussiffigisartakkat ilaat allanut naleqqiullugit ineriartortoqarpasinngimmata, imaluunniit siornatigutulli ineriartortoqarpallaanngimmata. Taamaattumik nalunaajaasut ilaat isummersinnaapput oqaluussiffigisartakkaminni katersuineq naammassilersimasoq suliartillu annertunerusinnaanngitsoq katersugassat sinneruttut ikittuararsuummata. Ilumut taamaattoqarpa?
4. Pissuseq suna kiffartornitsinnut ineriartortittariaqarparput, aamma sooq?
4 Katersuinermik piffissaq aallaqqaataaniit naggataanut ulapaarfiuvoq. Oqaluussinerup nukingernera pillugu Jiisusi qanoq oqartoq maluginiariaruk: “Katersugassat amerlaqaat sulisussalli ikittuinnaallutik. Taamaattumik katersuinermi naalagaasoq qinnuigisiuk katersuisussanik aallartitseqqullugu.” (Matt 9:37, 38) Jehovap, katersuinermi naalagaasup, akisussaaffigaa sumi qaqugulu naajartortoqassasoq. (Joh 6:44; 1 Kor 3:6-8) Uagulli suna suliassaraarput? Biibilimi akissuteqarpoq: “Siaruartigassatit ullaakkut siaruarterniakkit unnukkuttaarlu assatit sarliaannartarnagit.” (Oqal 11:4-6) Aap, katersuinerup killissaata tikingajalernerani assatta sarliaannarnissaannut piffissaanngilaq!
5. Sooq angalaarfigisartakkani inunnut soqutiginnippasinngitsunut ilungersuussilluta oqaluussiuaannassaagut?
5 Katersuiuaannarit: Naak angalaarfigisartagarput qasseeriarluni angalaarfigineqartaraluartoq inuillu soqutiginnippasinngikkaluartut suliap nukingernera eqqarsaatigalugu ilungersuussinissamut pissutissaqarluarpoq. (2 Tim 4:2) Silarsuarmi allanngornerujussuit inuit isiginnittaasiinik allannguisittarpaat pimoorussinerullutillu siunissaq eqqarsaatigilersarlugu. Inuusuttut inersimanerulernerminni toqqissisimanissaq pisariaqartinnerulissagunarpaat eqqissisimanerorusulerlutillu. Oqaluussiuaannarnerput inuit ilaannut sunniuteqarluarsinnaavoq. Aap, immaqa siornatigut tusarliussamut tusaajumasimanngitsut siunissami tusaajumalissapput. Allaat tusarliussamut tusaarusunngilluinnartut mianersoqquneqartariaqarput. — Ez 2:4, 5; 3:19.
6. Angalaarfigisartagarput piuminaappat ilungersuussiuaannarnissatsinnut suna iluaqutaassava?
6 Angalaarfigisartagarput piuminaappat ilungersuussiuarnissatsinnut suna iluaqutigisinnaavarput? Immaqa illumiit illumut oqaluussisarnerup saniatigut oqaluusseriaatsit allat atorsinnaavavut, soorlu niuertarfinni imaluunniit oqarasuaatikkut oqaluussinerit. Imaluunniit aallarneeriaatsivut allanngortissinnaavavut allaanerusumik oqaluusseriaaseqalernikkut. Aamma piffissaq oqaluussiffiusartoq allanngortillugu unnukkut piffissamiluunniit inuit angerlarsimallutik naapitassaaneranni oqaluussisoqarsinnaavoq. Immaqa aamma amerlanerusut nutaarsiassamik nuannersumik tusartikkusullugit allamiut oqaasiinik ilinniarsinnaavugut. Aamma pioneritut aallartinnitsigut kiffartornerput annertusisinnaavarput, imaluunniit sumiiffimmut katersuinermik ikittuinnarnik sulisulimmut nuussinnaavugut. Katersuinermut eqqortumik isiginnittaaseqarutta, suliamut pingaarutilimmut peqataajuaannarnissarput sapinngisami ilungersuutigissavarput.
7. Qanoq sivisutigisumik katerseqataassaagut?
7 Narsaatillit karrinik katersuiffissaannut piffissaq sivikitsuararsuusarpoq, taamaattumik suliaq naammasseqqaartinnagu eqqissisimaarneq ajorput unikaallattarnatilluunniit. Aamma anersaakkut katersuinermi piffissaq taamatut isumaqarfigisariaqarparput. Qanoq sivisutigisumik katerseqataassaagut? “Silarsuup naggatissaanut” [pissutsit aaqqissuussaanerata naggataatungaanut, NV] taamaaliussaagut, aamma “naggatissaq” tikillugu. (Matt 24:14; 28:20) Jehovap kiffaa nuimanerusoq assigalugu, suliaq uagutsinnut isumagisassanngortitaa naammassiumavarput. (Joh 4:34; 17:4) Taamaattumik, naggatissap tungaanut ilungersuussilluta, nuannaarluta isumalluartumillu isiginnittaaseqarluta kiffartornerput ingerlatiinnartigu. (Matt 24:13) Katersuineq suli naammassinngilaq!
[Issuagaq 2-mi assiliartaq]
Katersuinermik piffissaq aallaqqaataaniit naggataanut ulapaarfiuvoq