Ilaqutariit, Guuti ilagiissortai peqatigalugit kiffartorfigisiuk
„Katisimasuni unnersiutigissavara [Jehova].“ — TUSSIAAT 26:12.
1. Angerlarsimaffimmi atuaqqissaarnerup qinusarnerullu saniatigut suna aamma ilumoortumik pallorfiginninnermut pingaartumik ilaasariaqarpa?
JEHOVA pallorfigissagaanni qinuneq angerlarsimaffimmilu Biibilimik atuaqqissaarneq imminni naammanngillat, aamma Guutip ilagiissortai peqatigineqartariaqarput. Itsaq Israelikkunnut peqqussutigineqarpoq ’inuit, tassa angutit arnallu meeqqallu, katersortinneqassasut’, Guutip inatsisaanik ilinniartinneqassagamik taassuma aqqutigeqqusaa maleruaqqullugu. (5 Moses 31:12; Josva 8:35) Utoqqaat „nukappiaqqat niviarsiaqqallu“ peqatigalugit kajumissaarneqarput Jehovap aqqa unnersiutigeqqullugu. (Tussiaat 148:12, 13) Ullumikkut kristumiut ilagiissaat assingusumik kajumissaarneqarput. Nunarsuaq tamakkerlugu naalagaaffilersaarfinni angutit, arnat meeqqallu ataatsimiittarput aggertullu peqataanertik nuannaarutigisarpaat. — Eprîarit 10:23-25.
2. (a) Inuusuttut ataatsimiinnerit nuannaarutigissappatigik sooq piareersarneq immikkut pingaaruteqarpa? (b) Kikkut maligassiaat pingaaruteqarpa?
2 Soorunami inuusuttut ilagiit sammisartagaannut peqataanissamut atatillugu ileqqoqarluarnissaannut ikiussagaanni unamminiarnartuusinnaavoq. Meeqqat ilaasa angajoqqaatik peqatigalugit ataatsimiigiarneq nuannarinngippassuk suna ajornartorsiutaasimassava? Nalunngilarput meeqqat amerlanersaat sivikitsumik aallussilluarsinnaasut erniinnarlu sammisatik qatsuttaraat. Tamanna piareersarnermik ilinniartitsinikkut qaangerneqarsinnaavoq. Piareersarsimanngikkaanni meeqqat ataatsimiinnerit siunertaqarluartumik peqataaffigisinnaanngilaat. (Ussatit 15:23) Piareersarsimanngikkaanni nalerisimaarnartumik anersaakkut ineriartorneq ajornakusoorsinnaavoq. (1 Timûtiuse 4:12, 15) Qanoq iliuuseqartoqarsinnaava? Siullermik angajoqqaat takutitsisariaqarput namminneq ataatsimiinnernut piareersartarlutik. Maligassiuinerat meeqqanut sunniuteqarluassaaq. (Lúkarse 6:40) Ilaqutariittut atuaqqissaaqatigiinnerup piareersarluagaanera aamma pingaaruteqassaqaaq.
Uummatip ineriartortinnissaa
3. Ilaqutariit atuaqqissaaqatigiinneranni sooq uummatit ineriartortinnissaat noqqaassutigineqartariaqarpa, taamaaliussagaannilu suna pisariaqarpa?
3 Ilaqutariit atuaqqissaaqatigiinnerat ilisimasassanik immersorfiuinnassanngilaq, aammali uummammik ineriartortitsiviusariaqarpoq. Tamanna anguneqassappat ilaquttat ajornartorsiutigisartagaat eqqumaffigineqartariaqarput ilaquttallu tamarmik asannittumik isumagineqartariaqarlutik. Jehovap ’inuit uummataat paasiniaqqissaartarpai’. — 1 Israelikkut 29:17.
4. (a) ’Uummammik amigaateqarneq’ qanoq paasisariaqarpa? (b) ’Uummammik pissarsineq’ sumik nassataqarpa?
4 Jehovap meeqqatta uummataat paasiniaqqissaaraangamigit sumik paasissaqassava? Amerlanersaat oqassapput Guuti asallugu, tamannalu nersornaqaaq. Taamaattorli inuusuttoq imaluunniit Jehovamik ilinniartunngorlaaq taassuma aqqutigeqqusaanik killilimmik ilisimasaqartarpoq. Misilittagaqarpallaannginnami immaqa Biibilimi allassimasutut ’isumaatsuuvoq’ imaluunniit ’uummammik amigaateqarluni’. Immaqa ajortumik pissutiginiagaqanngikkaluarpoq, kisianni Guutip iluarisaanik uummammioqassagaanni piffissaqartariaqarpoq. Inuup eqqarsaatini, kissaatigisani, iluarisani, misigissutsini inuunermilu anguniakkani Guutip iluarisaanut naapertuuttunngortittariaqarpai, inuit naammalluinnanngitsut sapinngisaat naapertorlugu. Inuup taamaalilluni ilorlikkut pissutsini Guutip piumasaa naapertorlugu ilusilersortarunigit ’siuneqarnermik’ imaluunniit ’uummammik’ pissarsissaaq. — Ussatit 9:4; 19:8 (NV).
5, 6. Angajoqqaat qanoq ilillutik meeqqatik ’uummammik pissarseqqullugit’ ikiorsinnaavaat?
5 Angajoqqaat qitornatik ’uummammik’ pissarsinermik ikiorsinnaavaat? Soorunami kialuunniit inuk alla uummatikkut ajunngitsunik pissuseqartissinnaanngilaa. Tamatta piumasamik iliorsinnaassuseqartitaavugut, namminerlu eqqarsaatinik qinersisarnerput pingaaruteqartorujussuuvoq. Siuneqassuseqarunilli angajoqqaat meerartik ammanissaanut killissinnaavaat, paasillugulu suut uummammiugisarinerai qanorlu ikiorneqarsinnaasoq. Apeqqutit imaattut atortakkit: ’Tamanna qanoq isumaqarfigaajuk?’ aamma ’Qanoq iliorusussagaluarpit?’ Taava tusarnaaqqissaaruk. Ingasappallaartumik qisuariaqinak. (Ussatit 20:5) Uummataa angussagukku inussiarnissuseq, paasinnittuuneq asanninnerlu tamarmik pisariaqartinneqarput.
6 Kissaatit peqqinnartut siuarsarniarlugit akuttunngitsumik anersaap inerititai tamaasa oqaloqatigiissutiginiakkit — ilaqutariittullu ineriartortinnissaannik suleqatigiigitsi. (Galâsiamiut 5:22, 23) Jehovamut Jesus Kristusimullu asanninneq ineriartortiguk, oqaannarnatit asassagivut aammalu nassuiarlugu sooq asasariaqarivut qanorlu ililluta asanninneq tamanna ersersissinnaallutigu. (2 Korintumiut 5:14, 15) Eqqortuliornissamut kissaateqalersitsigit kingunissai ajunngitsut oqaloqatigiissutigalugit. Eqqarsaatit, oqaatsit iliuutsillu eqqunngitsut ingalannissaannut kajumissaarigit tamakkua kingunipilui eqqartorlugit. (Amos 5:15; 3 Juánase 11) Erseqqissaruk eqqarsaatit, oqaatsit iliuutsillu — ajunngitsut ajortullu — tamarmik Jehovamut attaveqarnitsinnut sunniuteqarsinnaasut.
7. Meeqqat qanoq ilillutik ajornartorsiutit iliuuseqarfiginissaannut aalajangigassaqartillutillu Jehovamut qanittuarnissaannut ikiorneqarsinnaappat?
7 Meeraq ajornartorsiuteqarpat pingaartumilluunniit aalajangigassaqarpat ima aperisinnaavarput: ’Jehovammitaava tamanna qanoq isigaa? Jehova pillugu sunik ilisimasaqaravit taamatut oqarpit? Tamanna pillugu qinunikkut oqaloqatigisimaviuk?’ Meeqqatit sapinngisannik piaartumik Guutip piumasaasa suuneri pillugit paasiniaasalernissaannut tamakkuninngalu inooriaaseqalernissaannut ikiortakkit. Jehovamut namminerisaminnik qanittumik attaveqariartortillutik aqqutigeqqusaanik maleruaaneq nuannaarutigissavaat. (Tussiaat 119:34, 35) Taamaalillutik Guutip ilumoortup ilagiissortaanut ilaanertik immikkut pisinnaatitaaffittut pingaartissavaat.
Ilagiit ataatsimiinnerinut piareersarneq
8. (a) Qanoq ililluta ilaqutariittut atuaqqissaaqatigiinnermi soqutigineqartariaqartut tamaasa sammisinnaavavut? (b) Ilaqutariittut atuaqqissaarneq qanoq pingaaruteqartigaa?
8 Ilaqutariit atuaqqissaaqatigiinneranni assigiinngitsorpassuit eqqumaffigineqartariaqarput. Qanoq ilillutit tamaasa sammisinnaavigit? Tamarmik ataatsikkut sammineqarsinnaanngillat. Eqqaamasassanulli allattaaviliorneq iluaqutaasinnaavoq. (Ussatit 21:5) Ilaannikkut eqqarsaatigisinnaavat suut immikkut sammineqartariaqarnersut. Ilaquttat tamarmik immikkut siumukarneri soqutigikkit. Ilaqutariittut atuaqqissaaqatigiinneq taama ittoq kristumiutut ilinniartitsinitsinni pingaaruteqarluinnarpoq, inuunermut maannakkut ittumut pilersorneqaratta aammalu naassaanngitsumik inuunissamut piareersarneqarluta. — 1 Timûtiuse 4:8.
9. Ataatsimiinnernut piareersarneq eqqarsaatigalugu ilaqutariit sunik anguniagassaqarsinnaappat?
9 Ilaqutariittut atuaqqissaaqatigiinnissinnut atatillugu ilagiit ataatsimiinnerinut piareersartarpisi? Atuaqqissaaqatigiitillusi assigiinngitsorpassuit misissorneqarsinnaapput. Ilaat naammassissallugit immaqa sapaatit-akunneri, qaammatit allaalluunniit ukiut arlallit sammineqartariaqarput. Assersuutigalugu makku anguniarneqarsinnaapput: (1) ilaqutariit tamarmik ilagiit ataatsimiinnerini akisinnaanissaminnut piareersarsinnaapput; (2) tamarmik namminneq oqaatsitik atorlugit akisinnaanissartik sulissutigisinnaavaat; (3) akissutinut allassimaffiit ilanngunneqarsinnaapput; aamma (4) sammineqartut nammineq inuttut atorsinnaanissaat eqqarsaatigalugu misissorneqarsinnaapput. Tamakku tamarmik sallusuissut pigiliutissagaanni iluaqutaassapput. — Tussiaat 25:4, 5.
10. (a) Ilagiit ataatsimiinnerini suut eqqumaffigisariaqarpavut? (b) Taamaaliorneq sooq iluaqutaassava?
10 Ilaqutariittut Napasuliaq Alapernaarsuiffik-mi atuaqqissaaqatigiissutissaq sammisaraluaraanniluunniit puigortariaqanngilarsi inuttut ilaqutariittulluunniit ilagiit atuakkamik atuaqqissaarnermut, Teokratiimik Atuarfimmut aamma kiffartornermut tunngasumik ataatsimiinnermut piareersarnerit pingaaruteqarmata. Jehovap aqqutigeqqusaanik maleruaanermik ilinniartinneqarnitsinnut tamakkuttaaq pingaartuupput. Akuttunngitsumik ilaqutariittut ataatsimiinnernut piareersarsinnaavusi. Suleqatigiinnikkut atuaqqissaarneq pikkoriffiginerulersinnaavat. Tamatuma kingunerissavaa ataatsimiinnerni pissarsiaqarneruneq. Aalajangersimasumik piffissaqarluni ataatsimiinnernut piareersartarnerup aalajangersimasumillu piffissaliisarnerup pingaaruteqarnerat oqaloqatigiissutigisarsigit. — Evfisumiut 5:15-17.
11, 12. Ilagiit erinarsoqatigiinnerannut piarersarneq qanoq iluaqutigineqarsinnaava, qanorlu ililluta taamaaliorsinnaavugut?
11 Ataatsimeersuarnermi „Guutip inuunermut aqqutigeqqusaa“-mik qulequtalimmi kajumissaarneqarpugut ataatsimiinnerit ilaannut allamut piareersartaqqulluta — tassa erinarsornermut. Ilaqutariillusi taamaaliorpisi? Erinarsornikkut Biibilip imarisai ilumoortut isumatsinni uummatitsinnilu pigiliussinnaavavut ataatsimiinnerillu nuannaarutissarsiffiginerusinnaallugit.
12 Piareersarnitsinnut atatillugu erinarsuutigineqartussat ilaat atuarlugit imaallu oqaloqatigiissutigalugit uummammit pisumik erinarsorsinnaavugut. Israelitoqqami nipilersuutit guutisiornermi pingaartumik inissisimaffeqarput. (1 Israelikkut 25:1; Tussiaat 28:7) Ilaquttassinni arlarsi nipilersorsinnaava? Soormi taava nipilersuut taanna atorlugu ataatsimiinnerni erinarsuutigineqartussat ilaat erinarsoqatigiillusi sungiusarussigit? Imaluunniit erinarsuutit immiussat atorsinnaavasi. Nunat ilaanni qatanngutivut nipilersuummik ingiorteqaratik kusanartumik erinarsortarput. Angalaartillutik narsaatiniluunniit sulitillutik sapaatip-akunnerani tamatumani ataatsimiinnerni erinarsuutigineqartussanik nuannaarlutik erinarsortarput. — Evfisumiut 5:19.
Ilaqutariittut oqaluussinermut piareersarneq
13, 14. Ilaqutariittut oqaloqatigiinnikkut oqaluussinermut uummatikkut piareersarneq sooq iluaqutaava?
13 Allanut Jehova siunertaalu pillugit nalunaajaaneq inuunitsinni pingaaruteqarpoq. (Jesaja 43:10-12; Matîuse 24:14) Inuusuttuugutta utoqqaaguttaluunniit piareersarsimagutta oqaluussineq nuannaarutiginerussavarput angusaqarnerussallutalu. Ilaqutariittut qanoq taamaaliorsinnaavugut?
14 Pallorfiginninnitsinnut atatillugu tamatigut uummatitta piareersarnissaa pingaaruteqarpoq. Iliuuseriniakkavut kisiisa pinnagit aammali sooq taamaaliorniarnersugut oqaloqatigiissutigisariaqarparput. Kunngi Josafatip nalaani Israelikkut Guutip inatsisaanik ajoqersorneqartarput, Biibilimili allassimavoq ’inuit uummatitik suli nakimaallisarsimanngikkaat’. Taamaattumik pallorfiginninnermit ilumoortumit allamut saatsinneqarajupput. (nalunaerssûtigdlit áipait 20:33; 21:11) Oqaluussinermi nalunaaquttap-akunnerisa atorsimasat nalunaarutiginissaat imaluunniit atuagassianik agguaanissaq pingaartumik anguniagarinngilarput. Kiffartornerput Jehovamut inunnullu inuunissamik qinersisinnaanissamut periarfissineqartariaqartunut asanninnermut ersiutaasariaqarpoq. (Eprîarit 13:15) Suliami tamatumani ’Guutip suleqatigaatigut’. (1 Korintumiut 3:9) Immikkut pisinnaatitaaffioqaaq! Kiffartortaraangatta inngilit illernartut suleqatigaavut. (sarĸúmersitat 14:6, 7) Ilaqutariittut oqaloqatigiittarnitsinnit, soorlu atuaqqissaaqatigiikkaangatta imaluunniit Ullut tamaasa Allakkat misissortakkit-ni allassimaffiit oqaloqatigiissutigitillugit, tamatuminnga pingaartitsinermik ineriartortitsinissamut allamik pitsaanerusumik periarfissaqarsinnaanerpugut?
15. Qaqugukkut ilaqutariittut oqaluussinissamut piareersaqatigiissinnaavugut?
15 Ilaannikkut ilaqutariittut atuaqqissaaqatigiinnissinnut sapaatip-akunnerani oqaluussinissamut piareersarneq ilaatittarpisiuk? Taamaaliorneq iluaqutaasinnaaqaaq. (2 Timûtiuse 2:15) Taamaalioruit ilaqutariit ikiorneqassapput kiffartornerata siunertaqarnerullunilu kinguneqarluarnerulissaaq. Ilaannikkut atuaqqissaaqatigiinnissamut taarsiullugu piffissaq oqaluussinermut piareersaqatigiinnermut atorsinnaavarsi. Amerlanertigulli atuaqqissaaqatigeereeraangassi imaluunniit piffissami allami oqaluussinermut tunngasut assigiinngitsut eqqartorsinnaavasi.
16. Alloriarnerit eqqaaneqartut tamarmik sooq iluaqutaasut eqqaajuk.
16 Ilaqutariittut oqaloqatigiinnermi pingaartillugit sulissutigisassat alloriarnerit assigiinngitsut, soorlu makku, sammisinnaavasi: (1) Allassimaffiup Biibilimeersup atuarnissaanik oqaluussinermut saqqummiussineq sungiusarneqarsinnaavoq. (2) Tamassi pooqattamik atuagaasivimmik, Biibilimik, allattaavinnguamik, aqerluusamik kuglepennimilluunniit, naqitaaqqanik atuagassianillu assigiinngitsunik peqarnissarsi isumagisariaqarparsi. Pooqattaq akisusariaqanngilaq takujuminartuusariaqarporli. (3) Qanoq ililluni sukkullu torrutiinnarlugu oqaluussisinnaanissaq oqaloqatigiissutigisiuk. Alloriarnerit tamakku tamaasa sammereerlugit aamma oqaluusseqataanissinni sungiusartarsigik. Iluaqutaasunik unnersuussuteqarit, meeqqalli oqaasii iliuusiilu tamaasa naqqinnaveersaakkit.
17, 18. (a) Piareersarnerup qanoq ittup ilaqutariit oqaluussinerat kinguneqarluarnerulersissinnaavaa? (b) Sapaatip-akunneri tamaasa ilaqutariit suut piareersarfigisinnaavaat?
17 Jesus Kristusip malinnitsiminut suliarititaata ilaa pingaartoq tassa ajoqersuganngortitsineq. (Matîuse 28:19, 20) Ajoqersuganngortitsissagaanni oqaluussinerinnaq naammanngilaq. Aamma ajoqersuisariaqarpoq. Ilaqutariittut atuaqqissaaqatigiinnersi taamaaliornissinnut qanoq iluaqutaasinnaava?
18 Ilaqutariittut oqaloqatigiissutigisiuttaaq kikkut pulaaqqinneqarsinnaasut. Ilaat immaqa atuagassianik tunineqarsimapput; allat tusarnaarsimapput. Illumiit illumut angalaartilluta naapippavut imaluunniit aqqusinermi atuarfimmiluunniit oqaloqatigisimallugit. Guutip oqaasianit siulersortinniarta. (Tussiaat 25:9; Hesekiel 9:4) Tamassi aalajangerniarsiuk sapaatip-akunnera manna kikkut pulaaqqissanerlugit. Suna eqqartorneqassava? Ilaqutariittut oqaloqatigiinnersi tamassi piareersarnissinni iluaqutigissavarsi. Allassimaffiit Biibilimeersut eqqarsaatillu suut atuagassiaaqqamit Guutip sumik piumaffigaatigut?-meersut atuakkamillu Ilisarsineq inuunermut naassanngitsumut sammisoq-meersut soqutiginnittunut eqqaaneqarsinnaasut allattorsigik. Pulaaqqiinermi assigiinngitsut amerlavallaartut eqqartorneqartariaqanngillat. Ingerlaqqileruit apeqqut tulliani akisinnaasat eqqaajuk. Soormi aalajangersimasumik pisartussatut ilaqutariittut pilersaarutigigussiuk tamassi kikkut pulaaqqissanerlugit, qaqugu aamma suut angusassatut neriuutiginerlugit? Taamaaliortarussi ilaquttat tamarmik oqaluussinermi angusaqarluarnissaannut ikiorneqassapput.
Jehovap aqqutigeqqusaanik ilinniartittuakkit
19. Ilaqutariinniittut tamarmik Jehovap aqqutigeqqusaa maleruartuassappassuk suna pisariaqarpa, tamatumalu anguniarnerani suna iluaqutaasinnaava?
19 Silarsuarmi matumani ajortumi ilaqutariinnut qullersaasuuneq unamminiarnartuuvoq. Satanip inngilipiluisalu Jehovap kiffaasa anersaakkut uummaarinnerat ilungersuussillutik aserorniarsaraat. (1 Pîtruse 5:8) Saniatigut angajoqqaat, ingammik angajoqqaat kisermaat, tatineqaqaat. Iliuusererusutat tamaasa piffissaqarfigiuminaapput. Ilungersuussinitilli iluaqutaassapput, aamma naak siunnersuutit ataasiakkaaginnarlugit suliniutigisinnaagaluarlugit. Piartuaartumik ilaqutariittut atuaqqissaaqatigiinnersi pitsaanerulersissinnaavat. Qanigisat ilumoorlutik Jehovap aqqutigeqqusaanik maleruaasut takullugit nuannersorujussuuvoq. Jehovap aqqutigeqqusaani iluatsitsillutik ingerlassagunik ilaquttat tamarmik ilagiit ataatsimiinneri oqaluussinermullu peqataaneq nuannarisariaqarpaat. Tamanna iluatsissappat piareersarneq pisariaqarpoq — piareersarneq uummammut ineriartornartoq siunertaqarluartumillu tamatta immikkut Jehovamik pallorfiginninnermi peqataasinnaanissamut iluaqutaasoq.
20. Angajoqqaat amerlanerusut suna ikiortigalugu tipaatsunneq 3 Juánase 4-mi eqqaaneqartoq misigisinnaavaat?
20 Anersaakkut ittunik ikiorsimasani eqqarsaatigalugit apustili Johannes ima allassimavoq: ’Matumannga annerusumik tipaatsuutigisaqanngilanga: qitornakka tusaraangakkit sallusuissut eqqorlugu saqisut.’ (3 Juánase 4) Ilaqutariit atuaqqissaaqatigiinnerat anguniagassaqarluartumik aqunneqarpat, ittuusullu inussiarnerlutik ikiuiumallutillu ilaquttat pisariaqartitaat tamaasa soqutigippatigik ilaqutariit sallusuissummik tipaatsuutigisaqarnissaannut iluaqutaassaqaaq. Guutip inuunermut aqqutigeqqusaanik pingaartitsineq ineriartortikkunikku angajoqqaat ilaquttatik ikiorsinnaavaat inooriaaserlu pitsaanerpaaq nuannaarutigisinnaalersillugu. — Tussiaat 19:8-12. (wE 1/7 99)
Nassuiarsinnaavigit?
□ Sooq ataatsimiinnernut piareersarneq meeqqatsinnut immikkut pingaaruteqarpa?
◻ Angajoqqaat qanoq ilillutik meqqatik ikiorsinnaavaat ’uummammik pissarseqqullugit’?
◻ Ilaqutariittut atuaqqissaaqatigiinneq qanoq ililluni ataatsimiinnernut tamanut piareersarnermut iluaqutaasinnaava?
◻ Ilaqutariittut oqaluussinissamut piareersarnerup qanoq ililluni ikiorsinnaavaatigut oqaluussinermi angusaqarluarnerunissatsinnut?
[Qupp. 24-mi assiliartaq]
Ilaqutariittut atuaqqissaaqatigiinnissinnut atatillugu ilagiit ataatsimiinnerinut piareersarsinnaavusi
[Qupp. 25-mi assiliartaq]
Ataatsimiinnerni erinarsuutigineqartussat sungiusarlugit iluaqutaavoq