Angajoqqaanut allakkat immikkut ittut

Spaniami inuusuttuaqqat marluk qanittukkut angajoqqaaminnut qujaniutinik allassimapput. Allakkat ilaa uani issuassavarput:

Asasatsinnut ataatamut anaanamullu, Pepemut Vicentamullu:

Sumit aallartissaagut? Oqaatigerusutavut amerlaqaat, oqaatsillu ikittuinnaat atorlugit oqaatigiuminaallutik. Ukiuni 17-ini 15-inilu inuunitsinnut uagutsinnullu isumassuisimanissinnut asanninnissinnullu tamanut qutsaviginiarpassi.

Isiginnittaasisi najoqqutareqqusasilu nalunngittuaannarsimavavut. Sooq piffissami aalajangersimasumi angerlareertassanerluta ilaannikkut eqqumiigisarsimavarput, inuusuttuaqqalli angajoqqaaminnit piumaffigineqanngitsut qanoq ingerlanersut malugigatsigik, takusinnaalersimavarput najoqqutassiat tamakku illersuutigisimagivut.

Naalagaaffilersaarfimmi kristumiut ataatsimiinnerinut pissutissaqarnani najuutinngitsoortannginnermik maligassiuisimanissi sapaatikkullu oqaluusseqatigiittarnitta ikiorluarsimavaatigut. Sapaatit ullaavi tamaasa aperisariaqartanngilagut oqaluussiartussanersugut. Nalunngilarput taamaaliussalluta!

Inoroorsaartuunermut aamma perorsarneqarsimavugut. Pulaartorpassuaqarsimavugut ajunnginnerpaanillu tuniuaannarsimavasi. Naak ukiukikkaluarluta tamanna malugisimavarput, nalunngilarpullu angajoqqaavut immikkut ittuusut.

Ilissiunngitsunit allanit taama ilisarisimaneqartiginngilagut paasineqartiginatalu. Ikinngutiginerpaavassi, tamakkiisumillu tatigaassi.

Naggataagut oqarusuppugut asagissi. Angajoqqaaraassi, allanillu taarsinngisaannassavassi. Arlaanni angajoqqaassatsinnik qinersisinnaassagaluarutta inuunerpullu uteqqissinnaagaluarutsigu, nangaanngivilluta ilissi qinissagaluarpassi inuunerlu taamaattoq qinerlugu.

Asannittumik kunissilluta, panisi.

ESMERALDA YOLANDALU (gE 8/3 99)