Sisamanngorneq, oktobarip 16-iat
“Inoqajuitsumi Naalakkap aqqutissaa iluarsarsiuk, nunami naasuitsumi aqqusineq nalimmatsersiuk Guutitsinnut.” – Es 40:3.
Babylonnimiit Israalimut angalaneq ilungersunartoq qaammatit sisamat missaannik sivisussuseqarsinnaavoq. Jehovali neriorsuivoq akornutaasinnaasut tamaasa piiarniarlugit. Juutit aalajaatsut nalunngilaat Israalimut uternerup iluaqutissartai qimataminnut ilungersornerminnullu sanilliullugit annerungaartut. Pingaartumik guutisiornerannut tunngatillugu iluaqutissartaqarneruvoq. Babylonnimi Jehovamut pigititamik guutisiorfeqanngilaq, pilliiveqanngilaq aaqqissuussaasunillu pilliisussanik palaseqatigeeqarani. Taamaattumik Israalikkut Moorsisip inatsisaani pilliinissamut piumasaqaatit eqqortissinnaanngilaat. Aamma guutipilussiortut Jehovamik taassumalu najoqqutassiaanik ataqqinnittunit amerlanerungaarput. Taamaattumik juutit Jehovamik asannittut guutisiorneq minguitsoq pilerseqqinniarlugu nunaminnut uternissartik qilanaareqaat. w23.05 14-15 § 3-4
Tallimanngorneq, oktobarip 17-iat
Qaamanerup qitornaasut inuujuaritsi. – Ef 5:8.
‘Qaamanerup qitornaasut’ pissusilersussagutta Guutip anersaava illernartoq pisariaqartipparput. Inuppassuimmi atoqatigiinnikkut eqqunngitsuliortarmata minguitsuujuarnissarput imaannaanngitsuuvoq. (Tes 1. 4:3-5, 7, 8) Inuit eqqarsartaasiannit, isumaliutersuutaannit isiginnittaasiannillu Guutip isiginnittaasianut akerliusunit sunnerneqassanngikkutta anersaaq illernartoq pisariaqartipparput. Aamma ‘ajunngitsut naapertuilluartullu suulluunniit’ ineriartortinnissaannut anersaaq illernartoq iluaqutigisinnaavarput. (Ef 5:9) Anersaamik illernartumik tunineqarnissarput qinnutigisinnaavarput. Jiisusi oqarpoq Jehovap “imminut qinusut anersaamik illernartumik” tunissagai. (Luk 11:13) Aamma ataatsimiinnerni ataatsimoorluta Jehova unnersiutigigaangatsigu anersaamik illernartumik tunineqartarpugut. (Ef 5:19, 20) Guutip anersaavata illernartup sunniuteqarluarneratigut Guutip iluarisaanik inooriaaseqarsinnaavugut. w24.03 23-24 § 13-15
Arfininngorneq, oktobarip 18-iat
“Qinujuarussi tunineqassaasi, ujarlertuarussi nanisissaasi kasuttortuarussilu ammaanneqassallusi.” – Luk 11:9.
Naammagittarnerulerusuppit? Taamaappat qinnutigiuk. Naammagittartuuneq anersaap inerititaanut ilaavoq. (Gal 5:22, 23) Taamaattumik Jehova anersaamik illernartumik qinnuigisinnaavarput anersaap inerititaata taassuma ineriartortinnissaanut ikioqqulluta. Naammagittassuserput misilinneqarpat anersaaq illernartoq qinnutigiuassavarput naammagittarsinnaanissatsinnut ikioqqulluta. (Luk 11:13) Aamma Jehovamut ikioqqusinnaavugut taassuma isiginnittaasiatut isiginnittaaseqaqqulluta. Taava qinnutigereersimagutsigu ullut tamaasa sapinngisamik naammagittartuuniartariaqarpugut. Naammagittartuunissarput qinnutigiuarutsigu anguniartuarlugulu uummatsitsinni sorlanitsikkiartuaassavarput inuttullu ilisarnaatigilerlugu. Aamma Biibilimi maligassaalluartut eqqarsaatigeqqissaarnissaat iluaqutigisinnaavarput. Inunnik naammagittartunik Biibilimi assersuutissarpassuaqarpoq. Maligassaalluartut taakkua eqqarsaatigeqqissaarnerisigut qanoq naammagittarsinnaanerluta ilinniarsinnaavarput. w23.08 22-23 § 10-11