Sapaat, aggustip 31-at
Paasisimasartuut paasinnissapput. – Dan 12:10.
Biibilimi siulittuutit paasissagutsigit ikiorneqartariaqarpugut. Assersuuteqariarta. Takorlooruk sumiiffimmut nalusannut tikeraartutit, ikinngutilli angalaqatigisat sumiiffimmik ilisimannilluarpoq. Sumiinnerlusi aamma sumunnassanerlusi nalunngilluarpaa. Ikinngutivit ilagiumammatit nuannaarutigigunarpat. Taamatuttaaq Jehovap siunissarput nalunngilluarpaa. Taamaattumik Biibilimi siulittuutinik paasinnikkumalluta maniguulluta Jehovamut ikioqqusariaqarpugut. (Dan 2:28; Pet 2. 1:19, 20) Angajoqqaajulluartut assigalugit Jehovap qitornani nuannersumik siunissaqartikkusuppai. (Jer 29:11) Angajoqqaalli iliuuserisinnaanngisaannik Jehova eqqoqqissaartumik siulittuisinnaavoq. Siulittuutit Biibilimut allatsissimavai siunissami pisussat pingaarutillit ilisimaniassagatsigit. – Es 46:10. w23.08 8 § 3-4
Ataasinngorneq, septembarip 1
“Seqerngup nuineratut qinngussavaatigut.” – Luk 1:78.
Jiisusip Guutimit pissaaneqalersinneqarami inuit ajornartorsiutaat tamaasa aaqqissinnaavai. Jiisusip tupinnartuliornermigut ersersippaa ajornartorsiutit nammineq aaqqissinnaanngisagut aaqqikkumaarlugit. Assersuutigalugu ajortip kingornussimasatta tamatumalu kingunipiluisa – nappaatit toqullu – atuukkunnaarsinnissaannut pissaaneqarpoq. (Mat 9:1-6; Rom 5:12, 18, 19) Jiisusip tupinnartuliornermigut ersersippaa nappaatit ‘qanorluunniit ittut’ ajorunnaarsissinnaallugillu toqusunik makititsisinnaalluni. (Mat 4:23; Joh 11:43, 44) Aamma anorersuarujussuaq qatsortissinnaavaa inuillu anersaapilunnit aniguisissinnaallugit. (Mak 4:37-39; Luk 8:2) Toqqissiallannarpoq nalunagu Jehovap ernini taama pissaaneqalersikkaa! Guutip kunngeqarfiani pilluaqqussutissat eqquukkumaarneri qularutiginngilluinnarsinnaavagut. Jiisusip nunarsuarmiikkallarami tupinnartuliaminit annerungaartumik nunarsuarmut naalakkersuileruni iliuuseqassaaq. w23.04 3-4 § 5-7
Marlunngorneq, septembarip 2
Anersaap suut tamaasa, allaat itisuut Guutimut tunngasut, misissortarpai. – Kor 1. 2:10.
Ilagiinni amerlaffiusuniikkuit immaqa nappaasartut amerlangaarmata tiguneqanngitsuukulavutit. Taamaappat nappaasarnerit unitsikkusunnagu qanoq iliorsinnaavit? Ataatsimiinnernut tamanut immikkoortut arlallit akinissaannut piareersarsinnaavatit. Nappaaninni siullermi tiguneqanngikkuit piareersakkavit tulliinut suli periarfissaqassaatit. Napasuliaq Alapernaarsuiffik-mik atuaqqissaarnissamut piareersaraangavit allaaserisap tamarmiusup imminut ataqatigiinnera eqqarsaatigisaruk. Taamaaliortaruit iluaqutaasumik akissuteqarsinnaassaatit. Aamma immikkoortut ilaanni Biibilimeersut itinerusut nassuiaruminaatsut nassuiarluarsinnaajumallugit piareersarluartakkit. Sooq? Taamaattut sammineqaraangata akerusuttut ikinnerusarmata. Taavami suli tiguneqartanngikkuit? Ataatsimiinneq sioqqullugu atuaqqissaaqatigiinnermi aqutsisartoq oqarfigiuk immikkoortumut aalajangersimasumut akerusullutit. w23.04 21-22 § 9-10