៤ «គ្រិស្ត» ភាសាក្រិច χριστός (គ្រិស្តុស) «មេស្ស៊ី» ភាសាហេប្រឺ מָשִׁיחַ (ម៉ាហ្សាក់) «រើសតាំង» ភាសាក្រិច χρίω (គ្រីយ៉ូ)
ពាក្យហេប្រឺម៉ាហ្សាក់ ដែលជាឫសគល់នៃពាក្យម៉ាហ្សៀក (មេស្ស៊ី) ហើយពាក្យក្រិចគ្រីយ៉ូ ដែលជាឫសគល់នៃពាក្យគ្រិស្តុស (គ្រិស្ត) សំដៅទៅការរើសតាំងដោយរបៀបពិសេសមួយ គឺដោយដាក់ឬចាក់ប្រេងលើ។ ពេលដែលមនុស្សណាម្នាក់បានត្រូវរើសតាំងដោយចាក់ប្រេង ប្រេងនោះត្រូវចាក់លើក្បាលគាត់ ហើយឲ្យហូរចុះមកលើពុកចង្កា រួចចូលទៅក្នុងកអាវ។ នៅសម័យគម្ពីរ ទាំងជនជាតិហេប្រឺ ទាំងជនជាតិខ្លះដែលមិនមែនជាជនជាតិហេប្រឺ ធ្លាប់រើសតាំងអ្នកគ្រប់គ្រងតាមរបៀបនេះ ជាការបញ្ជាក់ថាបុគ្គលនោះបានទទួលតំណែងជាផ្លូវការ។
ក៏មានពេលខ្លះដែលបុគ្គលម្នាក់បានត្រូវចាត់ទុកថាជាអ្នកដែលបានត្រូវរើសតាំងដោយចាក់ប្រេង ដោយសារព្រះបានតែងតាំងអ្នកនោះ ទោះជាប្រេងមិនបានត្រូវចាក់លើក្បាលអ្នកនោះក៏ដោយ។ ម៉ូសេបានត្រូវហៅថាគ្រិស្ត ឬជាអ្នកដែលបានត្រូវរើសតាំងដោយចាក់ប្រេង ទោះជាប្រេងមិនបានត្រូវចាក់លើគាត់ក៏ដោយ។ នេះដោយសារព្រះយេហូវ៉ាបានតែងតាំងម៉ូសេឲ្យធ្វើជាអ្នកប្រកាសទំនាយ ធ្វើជាតំណាងរបស់លោក ហើយធ្វើជាអ្នកដឹកនាំ និងជាអ្នកសង្គ្រោះជនជាតិអ៊ីស្រាអែល។ លោកយេស៊ូពីក្រុងណាសារ៉ែតបានបង្ហាញឲ្យឃើញថា លោកជាអ្នកដែលព្រះយេហូវ៉ាបានរើសតាំង ហើយបានត្រូវហៅដោយត្រឹមត្រូវថាមេស្ស៊ី ឬគ្រិស្ត ជាឋានៈដែលបញ្ជាក់ពីតំណែងនោះ។ ដូច្នេះ«គ្រិស្ត»មិនមែនជាឈ្មោះទេ តែជាតំណែង។ (ម៉ាថ ១:១៦; ហេ ១:៨, ៩) លោកយេស៊ូមិនបានត្រូវរើសតាំងដោយចាក់ប្រេងមែនទែននោះទេ តែលោកបានត្រូវរើសតាំងដោយសកម្មពលរបស់ព្រះយេហូវ៉ា។ (ម៉ាថ ៣:១៦) យ៉ាងនេះ ព្រះយេហូវ៉ាតែងតាំងលោកឲ្យធ្វើជាស្តេច ជាអ្នកប្រកាសទំនាយ និងជាសម្ដេចសង្ឃ ដូច្នេះ លោកបានត្រូវហៅថាជាអ្នករើសតាំងរបស់ព្រះយេហូវ៉ា។ លោកយេស៊ូគ្រិស្តគឺជាបុគ្គលតែមួយគត់ក្នុងបទគម្ពីរដែលបានទទួលតំណែងទាំងបី៖ ជាអ្នកប្រកាសទំនាយ ជាសម្ដេចសង្ឃ និងជាស្តេច។
ដូចលោកយេស៊ូ អ្នកកាន់តាមលោកដែលបានត្រូវបង្កើតដោយសកម្មពល និងដែលបានទទួលការតែងតាំងដោយសកម្មពលបរិសុទ្ធ ក៏អាចត្រូវហៅថាជាអ្នករើសតាំងរបស់ព្រះដែរ។ (២កូ ១:២១) ក្រុមជំនុំបងប្អូនរួមជំនឿរបស់លោកយេស៊ូបានត្រូវរើសតាំងជាមនុស្សមួយក្រុមតាមរយៈលោកយេស៊ូគ្រិស្ត។ (សកម្ម ២:១-៤, ៣២, ៣៣) ដោយហេតុនោះ ពួកគាត់បានទទួលការតែងតាំងពីព្រះឲ្យធ្វើជាស្តេច និងជាសង្ឃជាមួយនឹងលោកយេស៊ូគ្រិស្តនៅស្ថានសួគ៌។