Nahumu
3 Lamba dya mbanza mwala o athu ajibha akwa!
Yezala ni makutu ni wiyi.
Yene mujibha o athu.
2 Ngevu jibuya ja jikabalu jamuya ni kutitila ni jibuya ja makalu a ita,
Jibuya ja jixikote ni jibuya ja malola,
3 Athu a mukwendela mu jikabalu, jixibhata ja mubhenya ni jisosa jilekujuka,
Athu avulu afu,
O imbi yâ katena ku ikondala.
O athu adibhukajana ku imbi.
4 Yoso yiyi ibhita mukonda o undumbu wa kidyanzunga kiwene mbambe.
Mwene wawabha o pholo, usendula, mesene ya uloji,
Mwene ukwata ifuxi mu mibhetu ya undumbu wê, ukwata we miji ni wanga wê.
5 Jihova dya ifuxi wambe: “Eme nga mu kukastikala.”*
“Nganda kuzula o saya yé.
Nganda bhangesa o ifuxi kutala o thuxi yé,
O athu a mautuminu oso, anda mona o jisonyi jé.
6 Nganda kulundulwila ima yaxidi.
Nganda kubhekela lusebhu.
Nganda kukwatesa jisonyi mwaxaxi ka athu.
7 Oso anda kumona anda lenga ni kudikola, exi:
‘Ninive a mubwika!
Nanyi wanda mukwatela henda?’
Nanyi wanda mukonda o malamba?
8 O kwila eye Ninive, wabeta-kota Amone dya Nono* wakexile bhu mbandu a milombo ya Nilu ndenge?
A itungu bhukaxi ka jingiji jezala ni menya,
O musanza wa kalunga wene wexile o umvwama wê, wene we wexile o ilumbu yê.
9 O kutena kwa Nono, kwexile mutunda ku Itiyopya ni ku Ijitu.
Pute ni Libya éne exile mu mukwatekesa.
10 Maji mwene we a mwambata mu ixi yengi,
Yu wala ku ubhika kwenyoko.
O twana twê a tujibhila mu ikoka.
O mayala mê afuma a atela jisolote,
O mayala mê moso abeta-kota a akutu ni malubhambu.
11 N’eye we Ninive wanda kodiwa,
Wanda bhinga kudisweka.
Wanda sota dilengelu mukonda dya nguma yé.
12 Ilumbu yé yoso yedi kala mixi ya mufiku yakusuka o ibundu yadyanga,
Kabasa a isakesa, o ibundu yê ilawukila mu kanu dya yó u idya.
13 Talesa! O masoladi mé edi kala ahatu mwaxaxi ké.
O mabhitu a mbanza yé anda jikuka mwene, o jinguma jé janda bokona.
O túbhya twanda kwoha o mabhitu mé.
14 Teka menya u abhake phala o kithangana kyanda kukondoloka ku jinguma.
Kolesa o ilumbu yé.
Kanda o mavu, toxa o utuma,
Ubhange jindobi.
15 Né kiki, o túbhya twanda kujikinisa.
O xibhata yanda kubwikisa.
Anda kujikinisa mwene kala o yangu kya idya ku mahoho!
Disokolole, uvule kala mahoho!
Disokolole kala kyadisokolola o mahoho!
16 Eye Ninive o asumbixi’é wa avudisa, o jithéthembwa ku dyulu ndenge.
O mahoho adizula, atuka anga aya dikanga.
17 O alangidi’é edi kala mahoho,
O jikabhitangu jé jedi kala mahoho avulu.
Mu izuwa ya mbambi ene alengela mu misula ya jiphalelu,
Maji kyoso mwanya ki utwa, ene atuka, aya dikanga,
Kana muthu wijiya kwoso kwaditela.
18 Eye sobha ya Asidya, o atwameni a mundu wé ala ni kilu,
O athu’é afuma ngwawa kutunda mu jinzo jâ.
O mundu wé a umwange ku milundu,
O muthu wa abhongolola kamoneka.
19 Kyoso kyanda kwiza o windwa wé séku muthu wanda kukwatekesa.
Fidila yé ki ivu milongo.
Oso anda kwivwa o ima yanda bhita n’eye, anda sanguluka,
Mukonda avulu atale hadi mukonda dya phulu yé.”