Kisumwa Kyalondekesa Kwa Nzwá
8 Kyoso o kambudi kya jikula o kidimbu kya kasambwadi, ku dyulu kwedile hudí mu kaxaxi ka ola. 2 Anga ngimona sambwadi dya jianju jemana bhu pholo ya Nzambi, ene atambula sambwadi dya jikoloneta.
3 Kwa moneka anju ya mukwá ya kwata ditijela dya* ulu, anga imana bhu pholo ya kalatódyu. Mwene watambula wasu wavulu wadizumba phala ku usatela kumoxi ni misambu ya athu oso a asolo,* bhu kalatódyu ka ulu kala bhu pholo ya kyandu. 4 O dixi dya wasu wadizumba dya kexile bhu maku a anju dya bande kwa Nzambi kumoxi ni misambu ya athu a asolo.* 5 Mu kithangana kyenyókyo o anju ya kwata o ditijela dya wasu wadizumba, anga udizalesa ni túbhya twatundu mu kalatódyu, anga udilundulula mu ngongo. Kyenyiki kukala inuminu, mázwi, jinzaji ni kitungutu kya ixi. 6 Bhenyobho, o sambwadi dya jianju ja kwata o sambwadi dya jikoloneta adisokejeka phala kujixika.
7 O anju yadyanga yaxiki o koloneta yê. Anga kukala mvula ya matadi ni túbhya twofunge ni manyinga, anga atulundulula mu ngongo. O mbandu ya katatu ya ngongo ya jokota, o mbandu ya katatu ya mixi ya jokota, o yangu yoso ya wisu ya jokota we.
8 O anju ya kayadi yaxiki o koloneta yê, anga kukala kima kya difwangana ni mulundu wadikota wa mu wama túbhya, anga a ulundumuna mu musanza wa kalunga. O mbandu ya katatu ya musanza wa kalunga yakituka manyinga. 9 O mbandu ya katatu ya yama yala mu musanza wa kalunga yafu, o mbandu ya katatu ya jinaviyu ya budika.
10 O anju ya katatu yaxiki o koloneta yê. Ku dyulu anga kulawuka théthembwa ya dikota ya kexile mu wama kala kandeya, yabu ku mbandu ya katatu ya jingiji ni ku jihotho* ja menya. 11 O dijina dya théthembwa yiyi Kulula. O mbandu ya katatu ya menya yalulu we, athu avulu afu mukonda dya menya, kuma o menya alulu.
12 O anju ya kawana yaxiki o koloneta yê. O dikumbi adisosolola mbandu ya katatu, o mbeji ni jithéthembwa ajijima we mbandu ya katatu, phala o mbandu ya katatu ya ima yiyi ikale mwavundu, o mbandu ya kizuwa ni ya usuku ki ikale ni mukengeji.
13 Anga ngivwa, éme nga mono holokoko ya kexile mutuka mukaxi ka dyulu ni kudikola ni dízwi dya swina: “Lamba dya athu oso atungu mu ngongo, mukonda dya mázwi ajikoloneta jala phala kujixika ku jianju jitatu.”