Dya Dyanga Dya Malunda

14 Hilamu sobha ya Tilu watumikisa akunji kwa Davidi. Ene eza ni mabaya a sedulu, ni atungi* ni asongi a mabaya phala kutunga o inzo ya Davidi.* 2 Davidi watongolola kwila Jihova wa mukolesa kala sobha ya Izalayele yu wazangeleka o utuminu wê mukonda dya mundu Wê, Izalayele.

3 Davidi ukala dingi ni ahatu mu Jeluzaleme. O ahat’wê avwala dingi an’a mala ni an’a ahatu. 4 Yá ene o majina a an’ê a avwalela mu Jeluzaleme: Xamuwa, Sobabe, Natane, Solomá, 5 Ibale, Elisuwa, Elipelete, 6 Nogaze, Nefeke, Jafiya, 7 Elixama, Beheliyada ni Elifelete.

8 Kyoso akwa Fidíxa kyevu kwila Davidi a mu undu kala sobha mu Izalayele, enyoso ayi musota Davidi. Davidi kya kivu, watundu phala kubhânga-nawu. 9 Kyenyiki, akwa Fidíxa eza, ya amateka kubhânga mu honga ya Lafayime. 10 Davidi webhwidisa Nzambi: “O kwila ngitena kuya mubhânga ni akwa Fidíxa? O kwila wanda kwabhakula bhu makwami?” Jihova wa mutambwijila, wixi: “Ndé! Mukonda nganda kwabhakula bhu maku mé.” 11 Kyenyiki, Davidi wayi kate ku Bahale-Pelazimi yu wa ajibha. Mukiki Davidi wambe: “Bhukaxi kami, o Nzambi yakidi watolola o jinguma jami kala o menya kyabula o ilumbu.” Mukonda dya kiki o kididi kyokyo, a kiluku o dijina dya Bahale-Pelazimi. 12 Akwa Fidíxa axisa o iteka yâ kwenyoko, Davidi anga utuma ku ita mu túbhya.

13 Ku pholo dya kwenda, akwa Fidíxa eza dingi mubhânga mu honga. 14 Davidi webhwidisa dingi Nzambi, mukiki o Nzambi yakidi wa mwambela, wixi: “Kana kuyila ku pholo yâ. Ukondoloka kudima dyâ, anga wa akwatela mu isasa. 15 Kyoso kiwanda kwivwa o jibuya ja mutunda mu isasa, eye umateka ni ita mukonda o Nzambi yakidi wa kutwamenena ku pholo phala kujibha o kifuxi kya masoladi akwa Fidíxa.” 16 Kyenyiki, Davidi wabhange kala kya mutumina o Nzambi yakidi, ene atolola akwa Fidíxa tunde ku Jeba ndu ku Ngezele. 17 Mukiki-phe, o fuma ya Davidi yadimwange mu jixi joso, Jihova anga ubhangesa kwila o ifuxi ya mukwa i mukwatela wôma.