Kisumwa Kyalondekesa Kwa Nzwá

10 Anga ngimona anju ya mukwa ya dizonda ya mutuluka ku dyulu ya zwata dituta, ku mútwe wê kwakexile hongolo, o pholo yê yedile kala dikumbi, o inama yê yedile kala jiphiladi* ja túbhya. 2 Yene ya kwata kamukanda kajikuka, o kinama kyê kya kadilu wakitula ku musanza wa kalunga, maji o kinama kyê kya kyasu wakitula ku ndundu. 3 Mwene wadikola ni dízwi dya swina kala ki zuma o hoji. Kyoso mwene kyadikola, o mázwi asamanu a inuminu ya jinzaji azwela.

4 Kyoso ki ngamesenene kusoneka o ima yazwela o sambwadi dya inuminu, ngevu dízwi dya tundu ku dyulu dya ngambela: “Sweka* o ima iwevu ku sambwadi dya inuminu ya jinzaji, kana ku isoneka.” 5 O anju i ngamono yemanene ku musanza wa kalunga ni ku ndundu, ya sununa o lukwaku lwê lwa kadilu ku dyulu. 6 Anga uloka mu dijina dya Yó wakalelaku wabhange o dyulu ni ima yoso yala-mu, ni ixi ni ima yoso yala-mu ni musanza wa kalunga ni ima yoso yala-mu, wixi: “Kikwanda laleka dingi kana. 7 Maji kyoso o anju ya kasambwadi kyanda kala polondo phala kuxika o koloneta yê, o kikutu kikôla kya Nzambi kya tudila kala njimbu yambote ku abhik’ê o jipolofeta, kyanda dikumbidila.”

8 Ngevu dingi o dízwi dya tundu ku dyulu dya ngambela: “Ndé, tambula o kamukanda kajikuka kala bhu maku dya anju yemana ku musanza wa kalunga ni ku ndundu.” 9 Eme ngayi katé bhwa kexile o anju, nga mwambela phala ku ngibhana o kamukanda. Mwene wa ngambela: “Tambula o kamukanda u kadye. Kene kanda bhangesa kwila o dikutu dyé dilula, maji mu kanu dyé o kamukanda kanda towala kala wiki.* 10 Eme nga katula o kamukanda bhu maku dya anju nga kadi, o mu kanu dyami o kamukanda katowalele kala wiki, maji kyoso ki nga zubha ku kadya o dikutu dyami dyalulu. 11 Anga a ngambela, exi: “Eye watokala kujimbulula dingi o madyembu mavulu, o ifuxi, o madimi ni jisobha javulu yalungu ni njimbu ya Nzambi.”