O Mukanda wa Dyanga ku Akwa Tesalonika

5 Enu akwetu phange jami, yalungu ni ithangana yoxinde, ki twabhingi dingi ku mi sonekena kima. 2 Mukonda enu mwejiya kyambote kwila o kizuwa kya Jihova kyanda kwiza kala kiza o mwiyi mu usuku. 3 Kyoso o athu kyanda kala mudikola, exi: “Kwatululuka, kwabatama!” Mu kithangana kyenyókyo anda tukumuka o kibwika kyâ kyeza, kala kiza o jindolo ja kuvwala ku muhatu wemita, ene wa kanda tena kulenga. 4 Maji enu jiphange kimwala mwavundu phala o kizuwa kyenyókyo ki mi tukumukine kala o mwanya ki utukumukina o mwiyi. 5 Mukonda enu enyoso mu ana a mukengeji ni kwila mu ana a mwanya. Etu kitutokala mu usuku né mu kitombe.

6 Kitutokala kuzeka, kala kibhanga o athu amukwa, maji twatokala kudilanga ni kukala ku mesu azele. 7 Mukonda o akwa kuzeka, ene muzeka mu usuku, o jihôlwa ene mu kodiwa mu usuku. 8 Kuma etu twatokala ku mwanya, tu kalyenu jinga ku mesu azele, tuzwate o kivunga thulu kya kixikanu ni kya henda, o kidyelelu kya kubhuluka kyene o kapasete. 9 Mukonda Nzambi katusolo phala kutambula kaxtiku, maji watusolo phala tubhuluke bhukaxi ka Ngana yetu Jezú Kidistu. 10 Mwene wafu bhu kididi kyetu, phala kikale se twatono mba twazeka,* tutena kukala ku mwenyu kumoxi ni mwene. 11 Mu kyenyiki, sulukenu mu ku dikolokotesa* ni kudiswinisa mudyenu kala kimwene mubhanga kya.

12 Twa mibhingi jiphange, xilenu yó akalakala kyavulu mwaxaxe kenu, amikala ku pholo mwa Ngana, yó ene ku midimuna. 13 Sotenu kwaxila ni henda mukonda dya kikalakalu kyâ. Kalenu ku paze ni akwenu. 14 Enu akwetu jiphange, twamesena ku mitangela kwila, sulukenu mu kubazela yó abhukumuka, ni kukolokotesa yó ala ni kikote ku muxima,* ni kuswinisa yó abhwila. Londekesenu mwanyu ku athu oso. 15 Dilangyenu, phala ki bhukale muthu uvutula phulu mu phulu, maji sulukenu jinga mu kubhanga o mbote ku akwenu ni ku athu oso.

16 Sangulukenu jinga izuwa yoso. 17 Kolokotenu mu kusamba. 18 Sakidilenu Nzambi mu ima yoso, kuma yiyi yene o vondadi ya Nzambi phala enu mwa Kidistu Jezú. 19 Kanenu kufidisa o kikalakalu* kya nzumbi ikôla momwenu. 20 Kanenu kukamba kubhana valolo mu ikanenu yatundu* kwa Nzambi. 21 Tongololenu o ima yoso, mu dikwatenene mu ima yambote. 22 Lengenu o ima yoso yayibha.

23 O Nzambi ya paze a mizelese mu maukexilu moso. O ukexilu wenu wambote, o mwenyu wenu ni mukutu wenu, a ulange kyambote mu maukexilu moso ni mu kuzela kwoso mu kithangana kya kutukuluka kwa Ngana yetu Jezú Kidistu. 24 O yó wamixana, mwene fiyele, wanda bhanga mwene o ima yiyi.

25 Jiphange, kolokotenu mu ku tutumbula mu misambu yenu.

26 Menekenenu o jiphange joso ni jinzobole.*

27 Mu dijina dya Ngana, twa mu mituma phala kutanga o mukanda yu ku jiphange joso.

28 O ngalasa ya Ngana yetu Jezú Kidistu ikale ni enu.