Kala Kyasoneka Luka

21 Kyoso Jezú kyabhetula o mesu, wamono o jimvwama a muta kitadi mu jingonga* ja tembulu. 2 Mwene wamono we mutudi wexile ngadyama, wate-mu tumabele tuyadi* twakambele valolo yavulu. 3 Mwene wambe, wixi: “O mutudi yú wa ngadyama, wate dingi mu jingonga, enyoso ndenge. 4 Mukonda ene ate-mu o ima ya asubhukile, maji mwene mu wadyama wê, wate-mu yoso yakexile nayu phala kukala ku mwenyu.”

5 Kyoso amoxi kyakexile mu zwela yalungu ni kuyuka kwa matadi a tembulu ni ima yakexile mu satela Nzambi, 6 Jezú wambe: “Kwanda kwiza izuwa, o ima yiyi i mwa mu mona anda ilundumuna bhoxi, anga ki bhwanda xala ditadi dimoxi kuthandu dya mukwá.” 7 Ene anga a mwibhwidisa: “Mesene, o ima yiyi yanda bhita thembu kuxi? Kyebhi o kijimbwete kya kwila, o thembu ya ima yiyi kubhita ya zukama?” 8 Mwene wa ambela: “Dilangyenu phala ka mi nganale, mukonda athu avulu anda kwiza mu dijina dyami ni kuzwela: ‘Éme ngi Kidistu,’ ni kwila, ‘O thembu ya zukama kyá.’ Kanenu kwa kayela. 9 Kyoso kimwanda kwívwa jingolokela ja ita ni jiphaxi,* ki mukale ni wôma. Mukonda o ima yiyi yatokala kudyanga o kubhita, maji kidyene luwa o dizubhilu.”

10 Jezú wa ambela dingi, wixi: “Akwa ixi imoxi, anda lwa ita ni akwa ixi ya mukwá. 11 Mu ididi yavulu, mwanda kala itungutu ya makota, mwanda kala we nzala ni mauhaxi, o athu anda mona ima ikwatesa wôma ni ijimbwete ya makota ku dyulu.

12 “Maji ande dya kubhita o ima yoso yiyi, anda mi kwata ni ku mi zukutisa, anda mi bhakula mu malombe* ni mu jikaleya, anda myambata bhu pholo ya jisobha ni jinguvulu mukonda dya dijina dyami. 13 Kiki kyanda kala kithangana phala mutene kubhana umbangi ku athu. 14 Kyenyiki-phe, ki mubhingi kuxinganeka ku mixima yenu, kyebhi kimwanda zwela, 15 mukonda nganda mibhana izwelu ni unjimu wa kwila, o jinguma jenu joso kanda kala ni phata, mba ku mi belesa. 16 Katé ni jitata jenu, jiphange, jindandu ni makamba, anda mi bhakula* mu jinzo ja kufundisa. Amoxi mudyenu anda kwa jibha. 17 Anda mi zemba we ku athu oso mukonda dya dijina dyami. 18 Maji né ngó lundemba lumoxi ku mítwe yenu kilwanda texika. 19 Mu kukolokota kwenu, mwanda bhulula o myenyu yenu.

20 “Kyenyiki, kyoso ki mu mona ifuxi ya masoladi akondoloka o mbanza ya Jeluzaleme, mwijiya kwila, o kibwikilu kyê kyazukama. 21 Oso akala mu Judeya amateke kulengela ku milundu, o akala mu mbanza, atokala kutunda-mu, o athu akala mu mikáwu kabokone dingi mu mbanza. 22 Mukonda yóyo yanda kala izuwa ya Nzambi kufundisa* o athu, phala o ima yoso yosoneke mu Mikanda Ikôla idikumbidile. 23 Lamba dya ahatu anda kwimita ni yó anda kwamwisa mu izuwa yenyóyo! Mukonda mu ixi yiyi, mwanda kala ibhidi yavulu ni kaxitiku kuthandu dya mundu yú. 24 Ene anda kwa jibha ni jixibhata, o akwa ifuxi anda kwambata o athu phala ku akwika, Jeluzaleme anda ku i dyota-dyota ku akwa ifuxi katé kyanda bhwa o kithangana kya akwa ifuxi.

25 “Kwanda kala we ijimbwete ku dikumbi, ku mbeji ni ku jithéthembwa. Mu ngongo o athu anda kala ni mukôndo, ene kanda kwijiya o ima yatokala kubhanga mukonda dya jibuya ni kuzuma kwa menya a musanza wa kalunga. 26 O athu anda kumbama ni wôma, mu kubanza o ima yanda bhita mu ngongo, mukonda o ima ku dyulu yanda tunguta. 27 Ene anda mona o Mon’a muthu kwiza mu dituta ni kutena ni fuma yoso. 28 Maji, kyoso kyanda mateka kubhita o ima yiyi, emanenu, mu bhetule o mítwe, mukonda o kubhuluka kwenu kwa zukama.”

29 Kyenyiki, mwene wa atela kifika, wixi: “Talenu o muxi wa mufiku ni mixi ya ka mukwá. 30 Kyoso ki imateka o kubwingita, mwejiya kwila o thembu ya mvula ya zukama. 31 Kyene we kimoxi, kyoso ki mu mona o ima yiyi kubhita, ijiyenu-kyu kwila, o Utuminu wa Nzambi wa zukama. 32 Ngi myambela ni kidi kyoso kwila, o mwiji yú kiwanda bhita, katé kyanda dikumbidila o ima yoso yiyi. 33 O dyulu ni ixi yanda bhita, maji o maka mami anda nangenena katé ku hádya ni hádya.

34 “Dilangyenu phala mixima yenu ki itandanganye ngó ni kúdya ni kunwa kyavulu ni ibhindamu ya mwenyu yú, phala o kizuwa kyenyókyo ki ki mi tukumwise kala mubhetu. 35 Mukonda kyanda kwiza kuthandu dya athu oso atungu mu ngongo. 36 Mu kiki-phe, kolokotenu mu kudilanga. Dyondelenu jinga Nzambi, phala mutene kulenga o ima yoso yiyi yatokala kubhita, ni mutene kwimana bhu pholo ya Mon’a muthu.”

37 Mu mwanya, Jezú wakexile mulonga mu tembulu, maji mu usuku, wakexile muya ku Mulundu wa Midiva, phala kukala-ku katé ki kúkya. 38 Athu oso akexile mu dimeneka mu tembulu, phala ku mwívwa.