O Mukanda wa Dyanga ku Akwa Tesalonika
4 Enu akwetu phange jami, enu mwa tambula kya itendelesu kokwetu yalungu ni kyebhi kyatokala kukala o wendelu wenu phala kusangulukisa Nzambi. Mu kidi, kyene kya ki mwa mubhanga, twa mibhingi ni kudyonda mwa Ngana Jezú kwila, sulukenu jinga mu kubhanga kyenyiki. 2 Mukonda enu mwejiya o itendelesu* i twa mibhana yatundu kwa Ngana Jezú.
3 Kuma o vondadi ya Nzambi yenyiyi, kwila mukala mu athu azele, anga mulenga o undumbu.* 4 Kala muthu mudyenu watokala wijiya kulanga kyambote o mukutu* wê ni kuzela kwoso ni ujitu, 5 kana ni jihânji jayibha ja ufusa, kala kyene mubhanga o ifuxi yóyo kejiya Nzambi. 6 Seku muthu watokala kusomboka o maka ya mba kubhanga phulu kwa phangyê. Mukonda Jihova wanda fundisa o athu abhanga o ima yiyi, kala ki twa mitangelele kya ni ku mitendelesa ni kuswina kwoso. 7 Mukonda Nzambi katwixana phala kwambata mwenyu wa ufusa, maji phala tukale tu athu azele. 8 Kyenyiki, woso udituna o maka enyá, ka mu bhukumukina muthu, kana, maji wa mu bhukumukina Nzambi, yó u mibhana o nzumbi yê ikôla.
9 Maji yalungu ni kudizola ni jiphange, kitwabhingi ku misonekena dingi, mukonda Nzambi wa milongo kya kudizola mudyenu. 10 Mu kidi, kyene kya ki mwa mubhanga ku jiphange joso ku Masedonya yoso. Maji jiphange twamesena ku mitendelesa kwila, sotenu kuya ni kubhanga dingi o ima yiyi. 11 Sotenu-phe o kutunga ni kutululuka ni kulanga o maka menu a mitokala, ni kukalakala ni maku menu kala ki twa milongo. 12 Phala mukale ni wendelu wambote mwaxaxi ka athu akanga,* phala ki mu bhindamene kima.
13 Jiphange, kitumesena kwila mukamba kwijiya yalungu ni madifundu,* phala ki mukale ni mukôndo* kala o athu kála ni kidyelelu. 14 Se twaxikina kwila Jezú wafu anga a mu fukununa, kyenyiki twaxikina we kwila oso afwila mu kuxikana Jezú, Nzambi wanda ku abheka dingi ku mwenyu kumoxi ni mwene. 15 Kyenyiki, bhukaxi ka maka a Jihova, tu myambela o ima yiyi: Etu twala ku mwenyu twanda nangenena katé mu kizuwa kyanda tukuluka Ngana, kitwanda twamena yó afu kya, lémbwa. 16 Mukonda o Ngana wanda tuluka ku dyulu ni kukola ni dízwi dya swina dya Kota dya jianju, ni koloneta ya Nzambi bhu maku. Anga o yó afu mu kuxikana Kidistu, éne anda dyanga kufukunuka. 17 Mu kusuluka, etu twala ku mwenyu, twaxalaku, anda twambata kumoxi ni ene ku matuta, phala kudisanga ni Ngana mu dibinza, kyenyiki, etu twanda kala jinga kumoxi ni Ngana. 18 Kyenyiki, sulukenu mu kukolokotesa akwenu ni izwelu yiyi.