Kala Kyasoneka Matesu

20 “O Utuminu wa dyulu wadifwangana ni ngana mukwa dibhata, watundu mu kamene mu kusota akalakadi, phala o dibhya dyê dya mividi. 2 Mwene wabakana ni akalakadi ku afuta denádyu dimoxi mu kizuwa, anga u atumikisa ku dibhya dyê dya mividi. 3 Ku ola ya katatu,* mwene utunda dingi, anga usanga amukwá akexile mu nanga mu kitanda sé kukalakala. 4 Anga u atangela, wixi: ‘Ndenu wenu mu kalakale ku dibhya dyami, phala ngi mifute kyoso kyatokala.’ 5 Ene ayi, utunda dingi mu ola ya kasamanu* ni ya kavwa* phala kusota dingi akalakadi. 6 Ku ola ya kwinyi ni kamoxi,* mwene utunda, anga usanga athu engi emana, sé kukalakala. Mwene wa a ebhwidisa, wixi: ‘Mukonda dyahi mwa nange bhabha dikumbi dyoso, sé kukalakala?’ 7 Ene a mu tambwijila, exi: ‘Mukonda sé-ku muthu wa tu ixana.’ Mwene wa atangela, wixi: ‘Enu wenu ndenu mu kalakala mu dibhya dyami dya mividi.’

8 “Mu ngoloxi, o ngana ya dibhya dya mividi watangela o kimbadi kyê, wixi: ‘Exana o akalakadi, u afute o kitadi kyâ. Mateka ni yó a sukina-ku, anga usuka ni yó a dyangela.’ 9 Kyoso kyabhixila o mayala a matekene mu ola ya ka kwinyi ni kamoxi, kala muthu mudyâ watambula denádyu dimoxi. 10 Kyoso o akalakadi a dyangele kyabhixila, ene abanzele kwila eji tambula dingi o akwá ndenge, maji ene a tambula we denádyu dimoxi. 11 Kyoso kya di tambula, ene amateka ku di kalanganza ni ngana ya dibhya. 12 Ene ambe, exi: ‘Yá asukina, akalakala ngó ola imoxi, eye wa mwa sokelesa ni etu twa kalakala o kizuwa kyoso ni mwanya watu!’ 13 O ngana wa vutwila-bhu muthu umoxi mudyâ, wixi: ‘Kamba dyami, eme ki nga mu kubhanga kyayibha. Etu ki tu bakana ku kufuta denádyu dimoxi? 14 Tambula o kitadi kyé utundé. Ngandala kubhana kwa yâ asukidila, kála ki watambula eye. 15 O kwila ki ngi fwama kubhanga yoso i ngamesena ni jimbote jami? Inga wala ni lwimbi* mukonda nga akwatela henda? 16 O kiki-phe o asukidila éne anda dyanga, o a dyanga éne anda sukidila.”

17 Kyoso kyakexile mubanda mu Jeluzaleme, Jezú wexana o kwinyi ni kiyadi kya jipoxolo ku mbandu. Mu njila, mwene wa atangela, wixi: 18 “Ivwenu! Mu Jeluzaleme mu twa mubanda, o Mon’a muthu anda mu bhakula bhu maku a akunji a makota ni jimesene ja kulonga o Kitumu. Ene anda mu balakala o kufwa, 19 ni ku mu bhakula ku athu akwa ifuxi phala ku mu sebhulula, ku mubeta ni ku mu phaphela ku taka,* anga mu kizuwa kya katatu anda mu fukununa.”

20 Mu kiki, o many’a an’â Nzebedewu kumoxi ni an’ê, wa mu zukama, wa mu fukamena,* anga u mu bhinga kima. 21 Jezú wa mu ibhwidisa, wixi: “Ihi i wamesena?” Mwene wa mu tambwijila, wixi: “Ku hádya, ki ukala u Sobha mu Utuminu wé, bhangesa kwila, an’ami ayadi yá, umoxi uxikama ku mbandu yé ya kadilu, o mukwá ku kyasu.” 22 Jezú wa a tambwijila, wixi: “Enu ki mwejiya o kima ki mwa mu bhinga. O kwila enu mu tena kunwa ku dikawu* dinganda nwa?” Ene a mu vutwila: “Tutena.” 23 Mwene wa atangela, wixi: “Enu mwanda nwa mwene ku dikawu dyami. Maji o kusola o muthu, phala kuxikama ku mbandu yami ya kadilu ni ya kyasu, ki kwa ngi tokala eme. Maji o ididi yiyi yatokala kwa yó a asolo kwa Tata yami.”

24 Kyoso o dikwinyi dya maxibulu kyevu o maka yá, afutuluka ni jiphange jiyadi. 25 Jezú-phe wa a exana, anga u atangela, wixi: “Enu mwa kijiya kuma o jinguvulu ja ngongo jene mu bhanga o athu kala abhika, o atwameni mudyâ ene atumina. 26 Ki kyene kyatokala kubhita bhukaxi kenu, maji woso mudyenu wamesena kukala kota, akale o selevende* yenu, 27 woso wamesena kukala ku pholo, mwéne watokala kukala selevende yenu. 28 O Mon’a muthu keza phala ku mu sidivila, maji phala kusidivila ni kubhana o mwenyu wê kala sata ya kukúla o mundu.”

29 Kyakexile mu tunda mu Jedikó, mundu wavulu u mu kayela. 30 Mu kyenyiki, ifofo iyadi yaxikama ku mbandu a njila, evu kwila Jezú wakexile mu bhita, ene anga amateka kudikola, exi: “Ngana, Mon’a Davidi, tukwatele henda!” 31 Maji o mundu wa abazela, mu ku atangela phala kudixibha. Ene abandekesa dingi o mázwi mâ, exi: “Ngana, Mon’a Davidi, tukwatele henda!” 32 Jezú-phe wemana, wa exana anga wa ebhwidisa, wixi: “Mwa mesena ngi mi bhanga ihi?” 33 Ene a mu tambwijila, exi: “Ngana, tujikwile o mesu.” 34 Jezú henda ya mu kwata, anga ukwata ku mesu mâ. Mu kithangana kyenyókyo, ene amateka o kumona, anga a mu kayela.