Kala Kyasoneka Nzwá
10 “Ngi myambela ni kidi kyoso kwila, woso kabokona mu kibhanga kya jimbudi bhu dibhitu, maji ubanda bhu kididi kyengi, mwene mwiyi ni kifumbe. 2 Maji woso ubokona bhu dibhitu, mwéne o mubhidi wa jimbudi. 3 Mwenyú, o mukwá dibhitu u mu jikwila, o jimbudi anga jivwa o dízwi dyê. Mwene wixana o jimbudi jê mu majina, anga u j’ambata bhukanga. 4 Kyoso mwene kyazubha kukatula o jimbudi jê joso bhukanga, mwene u ji twamenena, jene anga ji mukayela, mukonda jejiya o dízwi dyê. 5 Jene kijanda kayela muthu wengi, janda lenga, mukonda kijejiya o dízwi dya muthu wengi. 6 Jezú wa atela o kifika kiki, maji ene katendela o ima ya atangela.
7 Kyenyiki, Jezú wa atangela dingi, wixi: “Ngi myambela ni kidi kyoso kwila, éme ngi dibhitu dya jimbudi. 8 Oso eza bhu kididi kyami miyi ni ifumbe, maji o jimbudi ki ja abhana mátwi. 9 Éme ngi dibhitu. Woso wiza kokwami phala kubokona mu kibhanga, wanda bhuluka. Mwene ubokona, utunda, usanga jinga yangu. 10 O mwiyi wiza ngó phala kunyana, kujibha ni kuzanga o ima. Eme ngeza phala ene akale ni mwenyu, o mwenyu wakalelaku. 11 Eme ngi mubhidi wambote. O mubhidi wambote ubhana o mwenyu wê phala kubhulula o jimbudi jê. 12 O mukalakadi ulanga ngó o jimbudi mukonda dya kitadi, maji ki mwéne o mubhidi, kyoso kyamona o kimbungu kya mukwiza, mwene ubwazeka o jimbudi, anga ulenga. O kimbungu kikwata-bhu jimbudi, o ja mukwá anga ji mwangana. 13 Mwene ulenga mukonda mukalakadi ngó, kasuwu o jimbudi. 14 Eme ngi mubhidi wambote. Eme ngejiya o jimbudi jami, o jimbudi jami ja ng’ijiya, 15 kala o Tata kya ng’ijiya, eme wami ngejiya o Tata, ngibhana o mwenyu wami phala kubhulula o jimbudi.
16 “Ngala we ni jimbudi ja mukwá ki ja tokala mu kibhanga kiki. Jenyiji nga tokala we kujibheka, jene janda kwívwa o dízwi dyami, anga jikala kilunga kimoxi ni mubhidi umoxi. 17 Kyene o Tata kyangizolo, mukonda ngibhana o mwenyu wami, phala ku utambula dingi. 18 O mwenyu wami sé-ku muthu u ukatula kokwami, maji ngi ubhana mu vondadi yami. Eme ngala ni ungana wa ku ubhana, ngala we ni ungana wa ku utambula dingi. O kitumu kiki, nga kitambula kwa Tata yami.”
19 O Jijudé anga ji diwanuna dingi mu ibuka, mukonda dya izwelu yiyi. 20 Avulu mudyâ akexile muzwela, exi: “Mwene wala ni dimonyo! Wa saluka! Mukonda dyahi mwa mu mwivwa?” 21 Amukwá, exi: “O muthu wala ni dimonyo katena kuzwela o ima yiyi. O kwila dimonyo ditena kujikula mesu a ifofo?”
22 Mu thembu yenyóyo, mu Jeluzaleme anga mubhita o Fesa ya Kuzelesa o tembulu. Kyexile kithangana kya mbambi, 23 Jezú wakexile mu kwenda mu tembulu, mu mbandu a ixana mbalanda ya Solomá. 24 O Jijudé anga a mu kondoloka, ya a mwibhwidisa: “Katé bhebhi bhu wanda tuxisa mu jiphata? Se éye u Kidistu, tutangele ni kidi kyoso.” 25 Jezú wa atambwijila, wixi: “Eme nga mi tangela kyá, maji enu ki mwaxikina. O ima i nga mubhanga mu dijina dya Tata yami, ibhana umbangi walungu n’eme. 26 Maji enu ki mwaxikina, mukonda ki mu jimbudi jami. 27 O jimbudi jami j’ivwa o dízwi dyami, eme we nga j’ijiya, jene ji ngi kayela. 28 Eme ngi jibhana o mwenyu wakalelaku, jene we kijanda fwa dingi. Sé-ku muthu wanda jikatula bhu maku mami. 29 O jimbudi ja ngibhana Tata yami ja betakota, ima yoso ya mukwá, ndenge. Sé-ku muthu utena ku jikatula bhu maku a Tata. 30 Eme ni Tata, twala kumoxi.”*
31 O Jijudé abongo dingi matadi phala ku mububa nawu. 32 Maji Jezú wa atangela, wixi: “Eme nga mi londekesa ikalakalu yavulu yambote yatundu kwa Tata. Kikalakalu kyahi kyanda mi bhangesa ku ngibuba ni matadi?” 33 O Jijudé a mu tambwijila: “Etu kitwanda kububa ni matadi mukonda dya kikalakalu kyambote ki wabhange, maji mukonda waxingi Nzambi. Sumbala u muthu, eye wa dibhange u nzambi.” 34 Jezú wa atambwijila, wixi: “Mu Kijila kyenu, Nzambi kambe kwila, ‘Enu mu jinzambi’”? 35 Se mwene wexana “jinzambi” kwa yó a abalakala kwala o mak’â Nzambi (o Mikanda Ikôla katena ku ijima), 36 mwa mu ngitangela eme a ngi kôlesa a ngi tumikisa kwala o Tata, kwila, ‘Eye waxingi Nzambi,’ mukonda ngambe, ‘Ngi Mon’a Nzambi’? 37 Se ki nga mubhanga o ikalakalu ya Tata yami, kanenu ku ngixikana. 38 Maji se ngene mu ibhanga, né mwene se ki mu ngi xikina eme, xikanenu o ikalakalu i nga mubhanga, phala mutene kwijiya ni kuxikina kwila, eme ngala kumoxi ni Tata, ni kwila, o Tata wala we kumoxi n’eme.” 39 Kyenyiki, ene asoto dingi ku mukwata, maji mwene wayé.
40 Mwene wayi dingi ku sambwa dya Njolodá, bhu kididi bhwa matekene Nzwá o kubatizala, anga ukala bhenyobho. 41 Athu avulu ayi mu disanga-nê. Ene akexile muzwela: “Nzwá kabhangele madiwanu, maji o ima yoso yatangele yalungu ni diyala didi, ya kidi mwene.” 42 Bhu kididi kyenyókyo, athu avulu a muxikana.