Mukanda wa Kayadi ku Akwa Kolindu
9 Yalungu ni kikalakalu kya kukwatekesa o jiphange,* ki nga bhingi dingi ku mi sonekena, 2 mukonda eme ngejiya kwila enu mwa mesena kukwatekesa. Mukonda dya kiki, kyoso ki ngi kala ni jiphange akwa Masedonya ngene ku mi ximana kyavulu. Nga atangela kwila enu ku Akaya, mwatenesa kyá muvu umoxi tundé ki mwa disokejeka phala kukwatekesa. Mukonda dya vondadi yenu ya kukwatekesa, jiphange javulu akwa Masedonya ala we polondo phala kukwatekesa. 3 Maji nga mu tumikisa o jiphange jiji, phala o kiximanu ki twene ku mibhana kyalungu ni ukexilu wenu wa kukwatekesa, ki kikale kya makutu. Phala mu disokejeke kala ki nga atangela kwila, mweji disokejeka. 4 Se akwa Masedonya aya n’eme, anga a mi sanga kwila ki mwa disokejeka luwa, jisonyi janda tu kwata mukonda dya ku mi dyelela. Enu we mwanda kala ni jisonyi. 5 Mukonda dya kiki, nga swinisa o jiphange jiji kuya ku mi kunda, ni kudyanga kusokejeka o ujitu wenu, phala kyoso ki nganda bhixila ngi sanga kwila o ujitu mwa u yudika kyá. Mu kubhanga kiki mwanda londekesa kwila, ka mi jijidika kubhana o ujitu, maji mwa ubhana mu vondadi yenu.
6 Maji yalungu ni maka enyá, lembalalenu kwila, woso ukuna jimbutu jofele wanda bhongolola we bhofele. Woso ukuna nzungule dya jimbutu, wanda bhongola we kyavulu. 7 Kala muthu abhane kala kya xinganeka ku muxima wê, kabhane ni kuluwala mba ni ku mu jijidika, mukonda Nzambi wazolo o muthu ubhana ni kusanguluka.
8 Nzambi wala ni kutena kwa ku mi londekesa o ngalasa yê ya dikota, phala ki ku mi kambe kima, ni mu kale we ni yoso i mwa bhindamena phala kubhanga ikalakalu yambote. 9 (Kala kyosoneke mu Mikanda Ikôla kwila: “Mwene ubhana ni henda yoso ku jingadyama. O kuyuka kwê ku nangenena katé ku hádya ni hádya.” 10 O Nzambi ubhana jimbutu javulu ku mukuni ni mbolo phala kudya, wanda mi bhana we o jimbutu ji mwa bhindamena ni ku jivudisa phala mu kune. Mukonda dya kuyuka kwenu mwene wanda bandekesa o kubhongolola kwenu.) 11 Nzambi wa mu mi besowala mu maukexilu avulu, phala mutene kukwatekesa akwenu mu maukexilu oso. Mukonda dya maujitu u mwa mubhana ku athu, ene anda sakidila Nzambi. 12 O kikwatekesu kiki ki mwa mubhana, ki kyanda bhekela ngó mbote ku jiphange* ja bhindamena, maji kyanda bhangesa we athu avulu kuximana Nzambi. 13 Ene aximana Nzambi, mukonda o kikalakalu kiki kya kukwatekesa kilondekesa kwila, enu mwa mu tumaka o njimbu yambote yalungu ni Kidistu, kala ki mwa zwelele bhu pholo ya athu oso. O kikalakalu kiki kilondekesa we kwila, mwa mesena kukwatekesa o jiphange* ni athu oso. 14 Mu ku mi dyondela kwa Nzambi, ene alondekesa kwila a mi zolo, mukonda dya henda yadikota ya mi kwatela Nzambi.
15 Tusakidilyenu Nzambi mukonda dya ujitu wê wonene.