Mukanda wa Dyanga ku Akwa Kolindu
9 O kwila eme kingala ni ufôlo wa kubhanga o ima i nga mesena? Eme ki ngala ngi poxolo? Eme ki ngi mono Ngana yetu Jezú? Manyi k’enu mu ibundu ya kikalakalu kyami mwa Ngana? 2 Sumbala athu a mukwá ka ngi mono kala ngi poxolo, maji eme ngala ngi poxolo phala enu! Énu mu kidimbu kilondekesa o upoxolo wami kwa Ngana.
3 O yó a mu ngitatela nga ebhwidisa: 4 O kwila ki twa fwama* kudya ni kunwa? 5 O kwila ki twa fwama kukazala ni muhatu waxikana Ngana, ni kwenda-nê kumoxi, kala kya mubhanga o jipoxolo ja mukwá, o jiphange ja Ngana ni Sefa?* 6 Inga eme ngó ni Balanabé ki twa fwama kuxisa o ikalakalu ya kudikila o ibhindamu yetu? 7 O kwila o muthu usidivila mu usoladi ni jimbote jê? Nanyi ukuna o dibhya dya mividi, anga ukamba kudya o idima yê? Mba nanyi winga o kibhanga kya ibhaku, anga ukamba kunwa o lete ya ibhaku?
8 O kwila nga muzwela o maka enyá mu ibanzelu ya athu? O Kijila ki ki zwela we o maka enyá? 9 Mukonda o Kijila kya Mozé kyamba: “Kana kukuta o dikanu dya ngombe kyoso kya mu titidila o idima.” O kwila Nzambi wabhana o kitumu kiki mukonda dya jingombe? 10 Mwene ka kibhana mukonda dyetu? Kyene mwene, a kibhana mukonda dyetu! Kuma o muthu udima ni yó utitidila abhanga kiki ni kidyelelu kya kutambula-mu kima.
11 Etu twa mi kunina o ima ya Nzambi, o kwila kyayibha kutambula kokwenu ima phala kudikila o ibhindamu yetu? 12 Se athu amukwá afwama kutambula ima kokwenu, o kwila etu ki twa betakota kukala ni ujitu yú? Sumbala etu twa fwama* mwene kutambula ima kokwenu, maji kitwene ku mibhinga kima. Twa mu kolokota mu ithangana yoso, phala ki tufidise o njimbu yambote yalungu ni Kidistu. 13 Enu ki mwejiya kwila o athu akalakala mu tembulu adya ku ima yala mu tembulu, ni kwila o yó asidivila bhu pholo ya kalatódyu, atambula mbandu ku ima isatela o athu ku kalatódyo? 14 Kyene we kimoxi, Ngana wa tendelesa kwila, oso aboka o njimbu yambote, mu kuboka o njimbu yambote, mwene mwa ka mwena o kudya.
15 Né kiki, eme ki nga mi bhingi kima kyoso-kyoso. Mu kidi, eme ki nga mi sonekena o ima yiyi phala mu ngibhange kyenyiki, mukonda kota nga fwami muveji dyakubhanga kiki. Ki nganda kwehela muthu woso-woso ku ngi katula o ima i ngi bhangesa kudinanza! 16 Se nga mu boka o njimbu yambote kindala, ki ngatokala kudinanza, mukonda kyene mwene ki nga tokala o kubhanga. Kokolo dyami se ngi kamba kuboka o njimbu yambote! 17 Se ngi bhanga o kikalakalu kiki mu vondadi yami, nganda tambula o futu yami. Maji né mwene se ki ngi kibhange mu vondadi yami, kyene o kikalakalu kya ngibhana Nzambi. 18 Kyenyiki, yebhi o futu yami? O futu yami yenyiyi: O kuboka o njimbu yambote sé kubhinga kima. Kubhanga kiki, ku ngi fidisa kubhinga o ima i nga fwamene* kutambula, phala ngiboke o njimbu yambote.
19 Sumbala kingala ngi mubhika wa muthu, nga dibhange ngi mubhika wa athu oso phala kukwatekesa athu avulu. 20 Mwaxaxi ka Jijudé, nga dibhange ngi Judé phala kukwatekesa o Jijudé. Mwaxaxi ka akwa kukayela o Kijila, nga dibhange ngi mukwa kukayela o Kijila, sumbala ki ngala bhoxi dya Kijila, phala kukwatekesa yó akayela o Kijila. 21 Mwaxaxi ka yó ka mukayela o Kijila, nga dibhange kala ngi muthu ka mukayela o Kijila, sumbala bhu pholo ya Nzambi ki nga kambe o Kijila, maji ngala bhoxi dya Kijila kya Kidistu, phala kukwatekesa yó ka mukayela o Kijila. 22 Phala yó azoza, nga dibhange ngi muthu wazoza, phala kukwatekesa yó azoza. Ngabhange yoso phala kukwatekesa athu a idifwa yoso, phala mu maukexilu oso, ngitene kubhulula-ku amoxi. 23 Ima yoso yiyi, ngi ibhanga mukonda dya njimbu yambote, phala ku itudila akwetu.
24 Ki mwejiya kwila mu kulenga, athu avulu alenga maji muthu umoxi ngó utambula o kikôwe? Enu wenu, lengenu phala mu tambule o kikôwe. 25 Athu oso alenga, abhingi kudilanga mu ima yoso. Ene abhanga kiki phala kutambula kijinga kya máfwe kilela, maji etu tutambula kijinga kikamba o kulela. 26 Eme ki ngi lenge mu kingoho. Kala yó ene mu dibhana jihome mu kubhânga, o jihome jami kijilweza. 27 Mukutu wami ngi ubhana jihuxi,* ngi wendesa kala mubhika, phala kyoso ki ngi zubha kubokela akwetu, Nzambi kakambe ku ngi xikina.