Jobe
27 Jobe wasuluka ni kuzwela, wixi:
2 “Kala kyene Nzambi ku mwenyu, yó waditunu ku ngifundisa ni kuyuka,
Kala kyene o Muteni wa Yoso ku mwenyu, yó wa ngiluwalesa,
3 Kuma ngala hanji ni mwenyu,
Nzambi wa mu ngibhana nguzu phala kubhwima,
4 Dikanu dyami kidyanda zwela ima yayibha,
O dimi dyami kidyanda tanga makutu!
5 Kate ku ufwilu wami,
Kinganda kwehela kima ku ngifidisa kukala fiyele!
6 Nganda dikwatenena mwene mu kuyuka kwami, kinganda kuweha,
Ku mwenyu wami woso, muxima wami kiwanda ngifundisa.
7 O nguma yami a mukastikale kala o mukwa phulu,
O yó a ngilungulukila a akastikale mukwa ni yó abhanga o ima yayibha.
8 Kidyelelu kyahi kyanda kala-nakyu o mukwa phulu, kyoso kyanda mubwika kwa Nzambi?
Kyene, kyoso Nzambi kyanda mubwika?
9 Kyoso kyanda mwiza o kutata,
O kwila Nzambi wanda kwivwa o kuditenda kwê?
10 O kwila wanda sanguluka mu kubheza o Muteni wa Yoso?
O kwila wanda samba kwa Nzambi ithangana yoso?
11 Nganda milonga ni kikwatekesu kya Nzambi.
Kinganda miswekela kima kyalungu ni Muteni wa Yoso.
12 Se enwenyoso mwamono isumwa,
Mukonda dyahi mwa muzwela ima kiyala ni valolo?
13 O futu yanda bhana Nzambi ku athu ayibha,
Ni undundu wanda bhana o Muteni wa Yoso ku isweya, wenyu:
14 Se an’ê adisokolola, anda fwila ku xibhata,
O miji yâ kiyanda kala ni kudya kwasoko.
15 O yó anda subhuka, anda fwa mukonda dya dibhebhu,
O atudi, kanda ku adila.
16 Né mwene se u phopheka phalata yavulu kala fufuta,
Anga u dilundila izwatu yavulu yambote kala mavu,
17 O muthu wayuka,
Mwéne wanda izwata,
O yó wakambe o kikuma, mwene wanda xala ni phalata yê.
18 O inzo yatunga, mukwa ni mujandanda wa dibuba, ki inange,
Mukwa ni kafundu ka mukwa kulanga o dibhya.
19 Mwene kyaya muzeka, mvwama, maji kanda bhongolola kima,
O kyatona o mesu, o umvwama wê ki u moneka dingi.
20 O wôma u mukwata kyavulu mukwa ni nvula yadikota ibobesa o ixi,
Mu usuku, o kitembwe kyadikota ki mwambata.
21 O kitembwe kitunda ku mbandu kutundila o dikumbi kyanda muvuza bhu kididi kyê,
Kyanda mwambata dikanga, mwene kanda kala-ku dingi.
22 Kyanda mubhuka ni nguzu yoso,
Kyoso kyaya ni kubhânga phala o kitembwe ki kimwambate.
23 Kyedi kala o kitembwe kya mu muhanyesa,
Kya mu musebhulula bhu kididi bhwala mwene.