Jobe
12 Jobe wavutwila, wixi:
2 “Mukidi, enu kya ngo mwejiya o ima yoso,
Mwanda fwa ni kwijiya kwenu.
3 Maji eme ngejiya we ima yavulu,
Enu ki mwa ngitundu, kana.
Nanyi wakambe kwijiya o ima i wazwela?
4 Makamba mami ene mu ngolela,
Kyoso ki ngexile mudyondela kwa Nzambi, mwene wexile mu ngitambwijila.
Maji kindala ngi muthu wayuka, kingala ni kikuma, ngadibhange kima kya lusebhu.
5 O muthu walé kyambote, kabanze kwila kwanda mwiza dilamba,
Ufika kwila o dilamba diza ngo kwa yó ala kya ni maka.
6 Mu jinzo ja miyi mwala kutululuka,
O yó axongwena Nzambi, ala bhwa kondama,
Kala yó a mukwambata o iteka ya jinzambi jâ bhu maku.
7 Maji ngakudyondo, ibhula hanji o yama, yene yanda kulonga,
Ni ku jinjila jibhita bhulu, jene janda kutudila o maka.
8 Tonginina o* ima yala mu ixi, yene yanda kulonga,
Tonginina we o jimbiji mu musanza wa kalunga, jene janda kutangela o kidi.
9 Mu ima yoso yiyi, kima kyebhi kyakambe kwijiya kwila,
Jihova mwéne wa ibhange?
10 O mwenyu wa ima yoso ibhwima, wala bhu maku mê.
O myenyu ya athu yala we bhu maku mê.
11 Manyi o dítwi kidyene dilola o izwelu,
Kala o dimi ki dilola o kudya?
12 O yó akuka kya, ala ni unjimu,
Mukonda o kutongoloka kwijila ni kitala.
13 Nzambi wala ni unjimu ni kutena,
Mwene watongoloka, wanda kumbidila o vondadi yê.
14 Kyoso mwene kyabwika kima, séku muthu utena ku kitungulula,
Kyoso kyajika kima, o muthu katena ku kijikula.
15 Kyoso mwene kyafidisa o mvula kunoka, o mavu a kukuta,
Maji kyoso kyabhangesa kunoka o mvula, mu ixi mukala menya avulu.
16 Nzambi wala ni nguzu ni unjimu,
O yó atondala ni yó atondalesa akwa, a mutokala.
17 O akwa kubhana o jindunge, wa endesa ni makanda a hatu,
O afundixi u atobhesa.
18 O jisobha u atambula o ungana,
U akitula abhika.
19 O akunji wa endesa ni makanda a hatu,
Ukatula o ungana wa yó ala ni kutena.
20 O yó a adyelela phala kubhana jindunge, u ajika o makanu.
Ujimuna o kutongoloka kwa yó akuka.
21 Mwene usebhulula o jinguvulu,
Utobhesa yó ala ni kutena.
22 Utungununa o ima yosweke mwavundu,
Ubhangesa o mukengeji kumwikina mu kitombe.
23 O ifuxi ya athu u ibhana kutena anga u ibwika,
Kyene mwene, usokolola o ifuxi n’ayambata ku ixi yengi.
24 Ujimuna o kutongoloka kwa atwameni a mundu,
Mwene u abhangesa kunyunga mu kikangalakata, sé kwijiya kwebhi kwaditela.
25 U abhangesa kubabajala mwavundu, o mukengeji ka umono,
Mwene u abhangesa kubhendujuka, kala athu akodiwa.