Sofoniya
2 Dibhongololyenu, dibhongololyenu,
Enu mu kifuxi kyakambe jisonyi.
2 Ande dya kudikumbidila o ngonge,
Ande dya kubhita o kizuwa , kala o ibhyate a mu yambata ku kitembwe,
Kyoso o njinda ya Jihova kiluwa iza ku thandu dyenu,
Kyoso o kizuwa kya njinda ya Jihova kiluwa kiza kokwenu,
3 Sotenu Jihova, enu enyoso mwalenduka, mwatungu mu ngongo,
Énu mwéne mubelesela o jingonge jê jayuka.
Sotenu kubhanga o ima yambote, kalenu mu athu alenduka.
Nange mu kizuwa kya njinda ya Jihova, enu anda milanga.*
4 Mukonda mu mbanza ya Ngaza kimwanda tunga muthu,
O mbanza ya Axikilone yanda xala ngundu.
Akwa Ajidode anda ku akaya mu mwanya watu.*
O mbanza ya Ekolone anda ku ibwika.
5 “Lamba dyenu, enu mu kifuxi kya akwa Makeleti, mwatungu ku mbandu ya musanza wa kalunga,
Kizwelu kya Jihova kya mitokala enu.
Éye u mbanza ya Kanana, o ixi ya akwa Fidíxa, eme nganda kubwika.
Momwé kimwanda kala dingi muthu utunga-mu.
6 O mbandu ya musanza wa kalunga yanda kituka kididi kya kwingila-mu ibhaku.
Ni jifixi phala o abhidi ni ibhanga ya matadi phala o jimbudi.
7 O mbandu ya musanza wa kalunga, yanda kituka ixi phala yó asubhuka ku mwiji wa Judá.
Ene anda dila mwenyomo.
Mu usuku, ene anda zeka mu jinzo ja akwa Axikilone.
Mukonda Jihova Nzambi yâ wanda ku alembalala dingi,*
Wanda bheka dingi yó a akwikile.”
8 “Ngevu kyebhi akwa Mowabe kyexile muxongwena ni kyoso akwa Amone kyexile muxinga.
Ene exile muxongwena o mundu wami ni ku akusa mukonda dya ixi yâ.
9 Kyenyiki, Jihova dya ifuxi, o Nzambi ya Izalayele, wambe kiki: Kala kingene ku mwenyu,
“Ixi ya Mowabe yanda kituka kala o ixi ya Sodoma.
Akwa Amone anda kituka kala akwa Ngomola.
O ixi yanda kala ngundu, yanda kala kididi mwala isasa ixixima, yanda kala we dikungu dya môngwa.
O yó anda subhuka ku mundu wami, anda tambula o imbamba yâ.
O athu anda subhuka ku mundu wami, anda lundula o ixi yâ.
10 Kiki kyene kyanda bhita n’enu mukonda dya ukumbu wenu.
Mukonda mwaxongwena o mundu wa Jihova dya ifuxi, énu mwadizangeleka.
11 Jihova wanda kwa bwika.
Mwene wanda jikinisa o jinzambi joso ja ixi.
O ifuxi yatungu mu ikôlo yoso, anda mufukamena.*
Kala kifuxi kyanda kala bhu kididi kyê.
12 Enu mu akwa Itiyopya, nganda mijibha we ni xibhata yami.
13 Mwene wanda sununa o lukwaku lwê ku mbandu ya thunda phala kubwika akwa Asídya.
O mbanza ya Ninive yanda kala ngundu, yanda kukuta kala o kikangalakata.
14 O ibhaku ni yama yoso ya muxitu yanda zeka mwenyomo.
O njila a ixana pelikanu ni kisaka anda zeka ku thandu a jiphiladi jê.
Mu njanena mwanda tunda dízwi,
Bhu myelu bhwanda kala matumbu a matadi.
Mukonda o jikwadulu jobhange ni mixi ya misedulu janda dimonekena.
15 Yiyi yene o mbanza yexile ni ukumbu, yatululukile, yabatamene.
Yexile muzwela: ‘Eme ngabeta dingi kota, séku mbanza yasokela n’eme.
Yene yakituka kididi kibhangesa o athu kudiwana.
Kididi bhu zeka o yama ya muxitu.
Oso anda bhita bhenyobho, anda ixongwena* ni kubhuka o maku mu ku isebhulula.”