Jobe
10 “Mwenyu wa ngikumu kya.
Kuditenda kwami kinganda kusweka dingi.
Ngamesena kwila, Nzambi wijiya o kuluwala kwami.
2 Nzambi nganda mutangela, ngixi: ‘Ku ngifundise kala ngala ni kikuma.
Mukonda dyahi wa ngikiti ngi nguma yé?
3 O kwila o ku ngitatesa ki kuwabhela?
O kikalakalu kya maku mê ukisebhulula,
Ni uxikine o jindunge ja athu ayibha?
4 O kwila o mesu mé adifu ni mesu a athu?
Inga umona kala ki mona o muthu?
5 O kwila o izuwa ya mwenyu wé yabutu kala o izuwa ya muthu?
Inga o mivu yé yasoko ni mivu ya muthu,
6 Phala usote kwijiya o kitondalu kyami
Ni usuluke mu kusota o kituxi kyami?
7 Eye wejiya kwila kingala ni kikuma,
Wejiya we kwila, kikwala muthu utena ku ngibhulula bhu maku mé.
8 O maku mé, éne a ngi umbu,
Maji kindala eye wamesena ku ngibwika.
9 Ngakudyondo, lembalala kwila wa ngi umbu ni mavu.
Maji kindala wamesena ku ngikitula ngi fufuta?
10 Manyi keye wa ngite mu vumu dya mametu,
Éye wa ngi umbu-mu*?
11 Mukutu wami wa ubhange ni ifuba ni mixibha,
Éye wa uzwika ni xitu ni kikonda.
13 Maji wamesenene ku ngibhanga o ima yiyi mu kaswekele.*
Ngejiya kwila, o ima yiyi yatundu kokwé.
14 Se ngatele kituxi, eye weji ki mona,
Kiweji loloka o kituxi kyami.
15 Se ngala mwene ni kikuma, kokolo dyami.
Né mwene se kingexile ni kikuma, kingeji tena kubhetula o mútwe,
Mukonda ngatate, jisonyi ja ngikwata mwene.
16 Se ngibhetula o mútwe, wanda ngitomba* kala kibhanga o hoji ya musota o kudya.
Ni kutena kwé, weji ngibhanga ima yayibha.
17 Ubheka jimbangi jawubhe phala ku ngitatela,
O njinda i wa ngikwatela ya mudibandekesa.
O ibhidi yami yamuya ni kudibandekesa.
18 Eye-phe wa ngikatwila-hi ngo mu vumu dya mam’etu?
Tamanu ngafwile ande dya ku ngivwala!
19 Hinu a ngambatami kya mu mbila tunde mu vumu dya mam’etu.
Hinu ngedi kala nuka a ngivwalele.’
20 O izuwa yami yatolo kya. Nzambi a ngehe,
Atalele kwengi ni nginyohe-ku ngo hanji bhofele.
21 Ande dya kuya bhu kididi bhu nganda lembwa o kuvutuka,
Ku ixi ya kitombe kyadikota,*
22 Ixi yavundu kinene,
Ixi ya kavwanza ni usuku wedi bwí,
Mwenyomo, o mukengeji wasokwe ngo ni kitombe.