Amoji
9 Ngamono Jihova ku thandu a kalatódyu, mwene wa ngambela, wixi: “Beta ku thandu a jiphiladi, o kaboko kanda zamba. Bula-ju ku thandu, o yó anda subhuka ku mundu, eme nganda ku ajibha ni xibhata. Séku muthu wanda tena kulenga, séku we muthu wanda bhuluka.
2 Se ene akanda Mbila* phala kudisweka,
Nganda ku asunga-mu ni lukwaku lwami.
Se abanda ku dyulu,
Kwenyoko, nganda ku abhangesa kutuluka.
3 Se ene adisweka ku thala dya mulundu wa Kalumelu,
Nganda ku asota, kate ki nga asanga, anga nga akwata.
Se ene adisweka koxi a musanza wa kalunga phala ki nga amone,
Nganda tumikisa-ku nyoka phala ku anumata.
4 Se a ambata phala ku akwika ku jinguma jâ,
Nganda tuma ku ajibha ni xibhata, kwenyoko.
Nganda ku atonginina, phala ku abhanga phulu, ki phala ku abhanga mbote, kana.
5 O Ngana Jihova dya ifuxi, Sukeku, mwéne uta o lukwaku lwê ku thandu a ixi yiyi.
Mukonda dya kiki, o ixi itunguta, o athu oso a tungu-mu anda kala ni dilamba.
O mavu a ka zangumuka kala k’izala o ngiji ya Nilu,
Anda tunuka kala o ngiji ya Nilu ku Ijitu.
6 ‘O yó watungu o maxikata mê ku dyulu,
Yó watungu ku thandu a ixi,
Yó usunga o menya a musanza wa kalunga,
Phala ku alundulula ku thandu a mavu akukuta,
Dijina dyê Jihova.’
7 Jihova wambe kiki: ‘Enu mu akwa Izalayele, kimusokela ni akwa Kuxi?’
K’eme ngakatula akwa Izalayele ku Ijitu?
Ki ngakatula akwa Fidíxa ku Keleta, o akwa Sídya ki nga akatula ku ixi ya Kili?’
8 ‘Talesenu! O Ngana Jihova Sukeku, wa mumona o ituxi ya yó wa mutumina,
Mwene wanda mujikinisa kulu dya mundu.
Maji kanda bwika o mbutu ya Jakobo,’ kyene kyambe, Jihova.
9 ‘Talesenu! Nganda bhana ngonge,
Akwa Izalayele nganda ku a kukumuna mwaxaxi ka ifuxi yoso,
Kala kya kukumuna o musalu,
Né ngo kaditadi kamoxi ki kanda sonoka bhoxi.
10 Athu oso akwa ituxi atokala ku mundu wami, anda ku ajibha ni xibhata,
O yó amba, exi: “O divuwa kidyanda kwiza kokwetu, kidyanda tukwata.”’
11 ‘Mu kizuwa kyenyokyo, nganda kwimika dingi o balaka ya Davidi yabu,
Nganda xita o mabhululu mê,
Nganda tungulula o iphulungunzu yê,
Nganda itunga dingi kala ki yexile m’ukulu.
12 Phala o mundu wami atumine akwa Idomo,
Ni ifuxi yoso mwatumbula o dijina dyami,’ kyene kyambe Jihova, yó wa mubhanga o ima yiyi.
13 Jihova wambe, wixi: Ku hádya, ande dya mundu wami kuzubha kubhongolola o idima,
O kithangana kya kudima, kyanda bhixila kya,
Ande dya kumateka kukama o jiuva, o kithangana kya kukuna kyanda bhixila kya,
Ku milundu kwanda tunda vinyu ya ubhe,*
Ku tumilundu twoso, kwanda kunguluka we vinyu.
14 Nganda katula o mundu wami wa Izalayele kwa akwikile,
Ene anda tungulula o jimbanza mwakambele o athu, ene anda tunga mwenyomo,
Anda kuna mixi ya mividi ni kunwa o vinyu yê,
Anda kuna mixi ni kudya o ibundu yê.’
15 ‘Nganda ku akuna mu ixi yâ,
Kanda ku avuza dingi mu ixi i nga abhana,’
Kyene kyambe Jihova, Nzambi yâ.”