Sofoniya
3 Lamba dyé, éye u mbanza yabhukumuka, yakasana, yene mubhinjika o athu atungu momwé!
2 O athu a mbanza yiyi kene mubelesela, kene mu xikina kyoso kya abazela.
Kadyelela kwa Jihova, kaxikina kuzukama kwa Nzambi yâ.
3 O ilamba ya mbanza yiyi, yedi kala jihoji ja muzuma.
O afundix’yâ, edi kala imbungu ya musota kudya mu usuku.
Ene kaxisa né ngo kifuba phala mungu.
4 O jipolofeta jâ, akwa ukumbu, akwa kulungulukila akwá.
O akunji’â akasanesa* o kididi kikôla.
Ene abhukumukina o kijila kya Nzambi.
5 Jihova muthu wayuka, mwene wala mwaxaxi kâ. Mwene kene mubhanga ima yayibha.
Imene yoso, wa ejidisa o jingonge jê.
Ubhanga kiki sé kufula, kala kimoneka o mwanya izuwa yoso.
Maji o athu abhukumuka kala ni jisonyi.
6 “Ngabwika ifuxi. O jinzo jâ ja matala ni ikoka yaxala ngundu.
Séku dingi muthu ubhitila-mu.
Mu jimbanza jâ kimwala muthu, jaxala kiphulungunzu. Séku muthu watungu-mu.
7 Eme nganda tangela o athu atungu mu mbanza yiyi, ngixi:
‘Enu mwanda ngikwatela wôma,’ mwanda xikina ku mibazela phala o mbanza yenu ka ibwike.
Nganda mi kastikala mukonda dya ima yoso yiyi.
Maji ene amesenene kyavulu kubhanga o ima yayibha.
8 Mu kyenyiki, Jihova wambe wixi: ‘Ngikingilyenu,*
Kate o kizuwa kinganda kwiza phala kutambula o jimbote jâ,*
Mukonda o vondadi yami, o kwongeka o ifuxi ni mautuminu,
Phala kwalundulwila o njinda yami ya wama kala túbhya.
Mukonda ixi yoso yanda wama túbhya.
9 Mu thembu yenyoyo, nganda lungulula o dimi dya ifuxi, phala kwabhana dimi dya ubhe, dyazele,
Phala enyoso atumbule o dijina dya Jihova,
N’a mubheze kumoxi.’
10 Tunde ku jimbandu ja jingiji ja Itiyopya,
O mundu wami wadimwange, wene mu ngidyondela, wanda ngibhekela maujitu.
11 Mu kizuwa kyenyokyo, o athu mu Jeluzaleme kanda kala dingi ni jisonyi,
Mukonda dya ku ngibhukumukina.
Mukonda o akwa ukumbu ni akwa kudizangeleka, nganda kwakatula mwaxaxi kenu.
Enu kimwanda kala dingi ni ukumbu, ku mulundu wami ukôla.
12 Mwaxaxi kenu nganda xisa-mu ngo o athu alenduka ni yó aditulula.
Ene anda lengela kwa Jihova phala kusanga o kukondama.
13 O yó anda subhuka mu Izalayele, kanda bhanga ima yayibha.
Ene kanda tanga makutu, kanda nganala akwa.
Ene anda dya, anda zeka ni kutululuka, séku muthu wanda kwa kwatesa wôma.”
14 Dikole ni kisangu-sangu, éye u mona Ziyone!
Ta nzongo ya kusanguluka, éye u Izalayele!
Sanguluka ni muxima woso, éye u mon’a kilumba wa Jeluzaleme!
15 Jihova kanda kukastikala dingi.
Mwene wavutukisa o jinguma jé.
Jihova, o Sobha ya Izalayele, wala mwaxaxi ké.
Eye kwanda kala dingi ni wôma wa divuwa dyoso-dyoso.
16 Mu kizuwa kyenyokyo, Jeluzaleme anda mwambela:
“Kukale ni wôma, éye u Ziyone.
Kana kwehela o maku mé kuzoza.
17 Jihova Nzambi yé, wala ku mbandu yé,
Kala dizonda dya ita phala ku kubhulula.
Mwene wanda sanguluka kyavulu mukonda dyé.
O henda ya kukwatela, yanda musangulukisa.*
Mwene wanda tana mukonda dyé.
18 Nganda kwongeka oso aluwala mukonda dya kukamba kuya mu jifesa jé.
Kyoso kyexile mu ixi mwa akwikile, o athu exile mu axongwena.
19 Mu thembu yenyoyo, athu oso exile mu kutatesa, nganda ku akastikala.
Nganda bhulula oso a mutenguna.
Nganda bhongolola oso a amwange.
Nganda ku abhangesa kukala ni fuma, nganda ajingisa,
Mu jixi joso mwexile mu axongwena.
20 Mu thembu yenyoyo, nganda mibheka dingi mu ixi yenu,
Mu kithangana kyoso kinganda myongeka.
Nganda mibhangesa kukala ni fuma ni kijingu, mwaxaxi ka ifuxi yoso ya ngongo,
Kyoso kinganda bheka dingi o athu’ê a akwikile, eye wanda mona o ima yiyi kubhita.” Jihova mwene wakyambe.