Kala Kyasoneka Luka

7 Kyoso Jezú kyazubha kutangela o mundu o maka mê, mwene wabokona mu Kafalanawú. 2 Sayi kabhitangu ka masoladi wakexile ni mubhik’ê. O kabhitangu wazolele kyavulu o mubhik’ê. O mubhika mwenyú wakatele kyavulu, wa kumbamene. 3 Kyoso o kabhitangu kyevu yalungu ni Jezú, mwene watumikisa adyakime a Jijudé phala ku mubhinga n’eze mu saka o mubhik’ê. 4 Ene ayi muzwela ni Jezú, ya a mu dyondela kyavulu, exi: “Mwene wafwama kutambula o kikwatekesu kyé, 5 mukonda mwene wazolo o ixi yetu, mwéne watungu o kididi kyetu kya ubhezelu.”* 6 Kyenyiki, Jezú wayi nawu kumoxi. Maji kya zukamene ku inzo, o kabhitangu ka masoladi watumikisa o makamba mê, phala ku mutangela: “Ngana, kana kubokona ngó m’onzo yami, mukonda ki ngi fwama ku kutambulula kubhata dyami. 7 Mukonda dya kiki, nga mono kwila ki ngi fwamene kuya kokwé. Maji zwela ngó kima kimoxi, phala selevende yami n’a disanze. 8 Mukonda eme wami ngi muthu a ngi tumina, ngala we ni masoladi u ngene mwa tumina, ngi zwela kudisoladi dimoxi: ‘Ndé!’ mwene uya, o kwa mukwá ngi zwela: ‘Zá!’ mwene wiza, o mubhika wami ngi mu tangela: ‘Bhanga kiki!’ mwene u kibhanga.” 9 Kyoso Jezú kyevu o ima yoso yiyi, wadiwana ni mwene, anga usakuka ku mundu wakexile ku mu kayela, yu wazwela, wixi: “Ngi mi tangela kwila, mu Izalayele ki ngi sange-mu muthu wala ni kixikanu kyadikota kala kiki.” 10 O athu a atumikisa, kyoso kyavutuka kubhata, asange o mubhika wadisanze kyá.

11 Kyoso kyabhiti o ima yiyi, mwene wayi mu mbanza a ixana Nayíne, o maxibulu mê ni kifuxi kyadikota endele n’ê kumoxi. 12 Kyakexile mu zukama bhu mwelu wa mbanza, o athu akexile mu kwambata kimbi bhu kanga dya mbanza, wexile mona umoxi-élele wa many’â. Many’â wexile we mutudi. Mundu wavulu wa mbanza wakexile muya n’ê kumoxi. 13 Kyoso Ngana Jezú kya mu mono, wa mu kwatela henda, yu wa mu tangela, wixi: “Kana kudila dingi.” 14 Mwene anga uzukama, ukwata bhu kipoya bhwakexile o kimbi, o akexile mu kyambata anga emana. Mu kyenyiki mwene wambe, wixi: “Munzangala, nga kutumu, balumuka!” 15 O muthu wafu wabalumuka, anga umateka o kuzwela. Jezú-phe wa mubhana kwa many’â. 16 Athu oso akala ni wôma wavulu, amateka kuximana Nzambi, exi: “Mw’axaxi ketu mwa tukuluka polofeta yadikota,” ni kwila “Nzambi, o mundu wê wa ukwatela henda.” 17 O fuma yiyi yalungu ni mwene, ya dimwange mu Judeya yoso ni mu jimbanza ja zukamene.

18 Kyenyiki, o maxibulu a Nzwá a mu tangela o ima yoso yiyi. 19 Nzwá anga wixana kiyadi kya maxibulu mê, yu wa atumikisa kwa Ngana Jezú phala ku mwibhwidisa: “O kwila éye mwene Yó u twene ku mu kinga, inga tu kinga muthu wengi?” 20 Kyabhixila kwa mwene, ene a mu tangela exi: “Nzwá dya Batizu wa tu tumikisa kokwé phala ku kwibhwidisa, wixi: ‘O kwila éye mwene Yó u twene ku mu kinga, inga tu kinga muthu wengi?’” 21 Mu kithangana kyenyókyo, mwene wasake athu avulu akexile ni mauhaxi a maukexilu oso, ni kukaya o jinzumbi jayibha ni kusaka ifofo yavulu. 22 Mwene wa avutwila: “Ndenu, mwa kà tangele Nzwá o ima yoso i mwamono ni ima imwevu: O ifofo ya mumona, o inema ya mukwenda, o akwa mabhute a mwasaka, o maxilu a mu kwívwa, o madifundu a mwa fukununa, o jingadyama a mwa bokela o njimbu yambote. 23 Wazediwa yó woso kasange kima kokwami ki mu bhangesa kukala ni phata* yalungu n’eme.”

24 Kyoso o maxibulu a Nzwá kyayi, Jezú wamateka kutangela o mundu yalungu ni Nzwá, wixi: “Mwayile mu mona ihi mu mukáwu? Mwenge a utakujula ku kitembu? 25 Mu kiki-phe, mwayile mumona ihi? Diyala dyazwata izwatu yakatunda? O akwa kuta izwatu yakatunda, ezala ni jimbongo, atungu mu jinzo ja jisobha. 26 Mu kiki-phe, ihi imwayile mumona? Polofeta? Ngi mitangela kwila mwene wa betakota, polofeta ndenge. 27 Yú mwéne a musoneka, exi: ‘Talesa! Ngi tumikisa mukunji wami bhu pholo yé, wanda ku kutwamenena phala ku ku yudikila o njila.’ 28 Ngi mi tangela o kidi kwila, ku athu a avwala ku ahatu, kiluwa kumoneka muthu watúndu Nzwá dya Batizu. Maji o muthu wala ndenge mu Utuminu wa Nzambi, wa betakota, o Nzwá ndenge.” 29 (Kyoso o mundu woso ni akwa kutambula o lubhaku kyevu o ima yiyi, ambe kwila Nzambi muthu wayuka, mukonda ene a abatizala kwa Nzwá. 30 Maji o Jifalizewu ni jimesene ja kulonga o Kijila, kabhana valolo mu itendelesu ya abhana Nzambi, mukonda kaxikina kwa batizala kwa Nzwá.)

31 “O athu a mwiji yú-phe ngi asokesa ni nanyi? Ene adifu ni nanyi? 32 Adifu ni twana twa ndenge axikama mu itanda, adikola mudyâ exi: ‘Etu twa mixikila mbéndu maji enu ki muxikina kukina; twa mi imbila mimbu ya malamba, maji enu ki mu dikwata mukôndo.’ 33 Kyene we kimoxi, Nzwá dya Batizu kakexile mudya mbolo, né kúnwa vinyu, maji enu muzwela, mwixi: ‘Mwene wala ni dimonyo.’ 34 O Mon’a muthu weza mu kúdya ni kúnwa, maji enu muzwela, mwixi: ‘Talesenu! Diyala dya wabhela kúdya kyavulu ni kúnwa vinyu, kamba dya akwa kutambula lubhaku ni dya akwa ituxi!’ 35 Mu kiki, o unjimu a utongolola bhukaxi ka ibhangelu yê.”*

36 Sayi Falizewu, wakexile mu mubhinga kyavulu phala kúdya n’ê kumoxi. Mu kiki, mwene wabokona mu inzo ya Falizewu, yu waxikama ku meza. 37 Sayi muhatu a mwijidile kala mukwa ituxi, wevu kwila Jezú wakexile mudya* m’onzo ya Falizewu, mwene anga wambata ngalafa ya alabasa mwakexile máji ma dizumba. 38 Mwene uzukama bhu inama ya Jezú, anga udila, yu wamateka kubetesa o inama ya Jezú ni masoxi ni ku ikondona ni ndemba yê. Mwene ukala we mubhana jinzobole ku inama yê ni ku ilundulwila máji adizumba. 39 Mu kumona o ima yiyi, o Falizewu wa mwixanene kubhata dyê, wazwela ku muxima wê, wixi: “Se o diyala didi wexile polofeta, weji kwijiya se kidifwa kyahi kyala nakyu o muhatu yú wa mu mu kwata, mukonda mukwa ituxi.” 40 Mu kiki-phe, Jezú wa mutangela, wixi: “Ximá, nga mesena ku kutangela kima.” Mwene wambe: “Mesene, zwelé!”

41 “Kiyadi kya mala ate dikongo ku mukwa kusobhesa kitadi: Umoxi wasobho hama jitanu ja madenádyu, maji o mukwá wasobho makwinyi atanu. 42 Kuma kakexile ni kitadi phala kufuta, mwene wa aloloka o makongo ni muxima woso. Kyenyiki, nanyi mudyâ wanda muzola dingi?” 43 Ximá wa mu vutwila, wixi: “Ngafika kwila, yó a muloloka ni muxima woso o dikongo dya dikota.” Jezú wa mwambela, wixi: “Eye watambwijila kyambote.” 44 Mu kiki, mwene wasakuka kwala o muhatu, anga utangela Ximá, wixi: “Wamono o muhatu yú? Nga bokona m’onzo yé, maji eye ku ngi bhana menya phala kusukula o inama yami. Maji o muhatu yú wabetesa o inama yami ni masoxi mê, yu wa ikondona ni ndemba yê. 45 Tundé ki nga bokona m’onzo yé, eye ku ngibhana nzobole, maji o muhatu yú, kabhwila mu kubhana jinzobole ku inama yami. 46 Eye ki wa ngi lundulwila máji ku mútwe, maji o muhatu yú wa lundulwila máji ma dizumba ku inama yami. 47 Mukonda dya kiki, ngi kutangela kwila, o ituxi yê sumbala yavulu,* maji yóloloke, mukonda mwene wazolo kyavulu. Maji yó woso a mu loloka bhofele, uzola we bhofele.” 48 Kyenyiki, mwene watangela o muhatu, wixi: “Ituxi yé yololoke.” 49 O athu axikama nê ku meza, amateka ku dizwelesa mudyâ, exi: “Nanyi o diyala didi, katé mwene ni ituxi u iloloka?” 50 Maji Jezú watangela o muhatu, wixi: “O kixikanu kyé kya kubhulula! Ndé ni kutululuka.”