Ndongixi
3 Yoso yala ni kithangana kyê, kyene mwene!
Ima yoso yene mubhita mu ngongo yala ni kithangana kyê:
2 Sayi kithangana kya kuvwala ni kithangana kya kufwa;
Kithangana kya kukuna ni kithangana kya kuvuza yoso yokune.
3 Sayi kithangana kya kujibha ni kithangana kya kubhulula;*
Kithangana kya kubula ni kithangana kya kutunga.
4 Sayi kithangana kya kudila ni kithangana kya kwolela;
Kithangana kya kuditenda ni kithangana kya kukina.*
5 Sayi kithangana kya kumwanga o matadi ni kithangana kya kwongeka o matadi;
Kithangana kya kudindwakuna* ni kithangana kya kukamba kudindwakuna.
6 Sayi kithangana kya kusota ni kithangana kya kujimba o kima kyatexika;
Kithangana kya kubhaka ni kithangana kya kutexi.
7 Sayi kithangana kya kutandula ni kithangana kya kutunga;
Kithangana kya kudixibha ni kithangana kya kuzwela.
8 Sayi kithangana kya kuzola ni kithangana kya kuzemba;
Kithangana kya ita ni kithangana kya kutululuka.
9 Mbote yahi imona o muthu mu kikalakalu kyoso kyabhanga? 10 Ngamono o ikalakalu yabhana Nzambi ku athu phala akale ni kya kubhanga. 11 Mwene wabhange yoso ni kuwabha mu kithangana kyê. Mwene wabhange o athu ni hanji ya kukala ni mwenyu wakalelaku. Maji ene anda lembwa kwijiya kyambote o ikalakalu yoso ya Nzambi yakidi.
12 Ngatongolola-phe kwila, o kima kyabeta o kota phala o athu, o kusanguluka ni kubhanga o mbote ku mwenyu wâ woso, 13 ni kwila athu oso we adya, anwa, akemba ni mbote ijila mu ikalakalu yâ. Yoso yiyi we ujitu utunda kwa Nzambi.
14 Ngatongolola we kwila, yoso yabhange o Nzambi yakidi, inangenena. O athu katena kubandekesa mba kukatula-ku kima. O Nzambi yakidi wabhange o ima kyenyiki, phala o athu a mukwatele wôma.
15 O ima ya mubhita, yabhitile kya, o ima yakeza-ku yakexile-ku kya, maji o Nzambi yakidi wanda bheka o ima yene musota o athu.*
16 Mu ngongo ngamono-mu we kwila, mu kididi kya kubatula o madimanda kimwala kuyuka. 17 O Nzambi yakidi wanda fundisa o athu ayuka ni athu ayibha, mukonda o ikalakalu yoso yala ni kithangana kyê. Sayi we kithangana phala kubhanga yoso yatokala ku ibhanga.
18 Ku muxima wami, ngixi: “O Nzambi yakidi wehela o athu kubhita ni ibhidi, phala atongolole kwila asokwa ngo ni yama, 19 mukonda, kibhita ni athu, kyene we kibhita ni yama. Enyoso o disukilu dyene dimoxi. Nzambi mwene wa abhana o mwenyu. O muthu ufwa, o kyama kifwa we. Mukonda o muthu kabeta o kota o kyama ndenge, enyoso asokwa ngo. Yoso kingoho! 20 Kikale o athu mba o yama, andaya kididi kimoxi. Enyoso a abhange ni mavu, o kyafwa avutuka we ku mavu. 21 Nanyi mwene utena kwamba kwila, o muthu kyoso kyafwa uya bhulu, o kyama kyoso ki kifwa kiya mu mavu? 22 O kima kyabeta o kota phala o muthu, o kusanguluka ni mbote ijila mu kikalakalu kyê, mukonda yiyi yene o futu yê. Kyoso mwene kyafwa, nanyi dingi utena ku mutangela o ima ya mubhita?