Hozeya
11 “Kyoso Izalayele kyexile hanji kambonga, eme nga muzolele kya.
Ngexana mon’ami phala atunde ku Ijitu.
2 Kyoso kyakexile mwa exana,*
Ene exile mudisondolola dingi kwa yó wexile mu a exana.
Ene asuluka ni kubhakula jisata ku iteka ya Bahale,
Ni ku iteka yamukwa ya diyudikila.
3 Efalayíme, éme nga mulongo kwenda, éme nga mwambata bhu jihata jami.
Maji ene adijimbi kwila éme nga asake.
4 Ngasulukile ni ku asunga kokwami bhofele-bhofele kala nga musunga mukolo, o henda yadibhange kala mukolo, phala kwa endesa ni ku asungila kokwami.
Kyoso kyexile mutala hadi, eme ngakexile mu akwatekesa.
Ene oso nga abhana kudya ni henda yoso.
5 Ene kanda vutuka dingi ku Ijitu, maji o sobha ya Asídya mwene wanda kala sobha yâ,
Mukonda ene aditunu kuvutuka kokwami.
6 Kyenyiki, o jinguma janda kwiza mubhânga mu jimbanza jâ.
Ene anda bula o mabhitu mâ, anda ku abwika mukonda dya jindunge jâ jayibha.
7 O mundu wami wamesena ngo ku ngibhukumukina.
Sumbala a exana phala kuvutuka,* séku muthu waxikina.
8 Mukonda dyahi ngeji kubwazeka, eye Efalayíme?
Eye Izalayele, mukonda dyahi ngeji kubhakula bhu maku a ifuxi yengi?
Mukonda dyahi ngeji kubhanga kala ki ngabhangele ku mbanza ya Adama?
Mukonda dyahi ngeji kubhanga kala ki ngabhangele ku mbanza ya Zeboyini?
Eme ngalungulula o kixinganeku kyami,
Mukonda henda ya ngikwata.
9 Kinganda mikwatela dingi njinda.
Kinganda bwika dingi Efalayíme,
Mukonda eme ngi Nzambi, ki ngi muthu mu xitu, kana.
Eme ngi muthu Ukôla mwaxaxi kenu.
Kinganda kwehela dingi o njinda yami ku ngibhangesa ku mibwika.
10 Ene anda bheza Jihova. Mwene wanda zuma kala hoji.
Kyoso mwene kyanda zuma, an’ê anda kwiza ni kuteketa mu kutunda ku mbandu ku fwila o dikumbi.
11 Kyoso kyanda tunda ku Ijitu, ene anda kwiza ni kuteketa kala tunjila. Kyoso kyanda tunda mu ixi ya Asídya, ene anda kwiza kala jipomba.
Nganda kwabheka dingi mu ixi yâ.” Kiki kyene kyambe Jihova.
12 “Akwa Efalayíme a ngitangela ngo makutu.
Akwa Izalayele akwa mangonya.
Maji akwa Judá a mubelesela hanji Nzambi.
Ene ala jifiyele kwa Yó Ukôla Kinene.”