Mukanda wa Kayadi ku Akwa Kolindu
3 O kwila twabhingi dingi kudijidisa kokwenu? O kwila twabhingi ku mi tumikisa mikanda ya ku tuximana, kala kya mesena amoxi mudyenu? 2 Énu mu mukanda wetu wosoneke ku mixima yetu, a wijiya, ene mu utanga ku athu oso mu ngongo. 3 Mukonda enu mwala mu mukanda wa Kidistu, u twa soneka etu kala tu akunji a Nzambi, kana ni tinda, maji ni nzumbi ikôla ya Nzambi ya mwenyu. Ki twa usoneka ku matadi, maji ku mixima yenu.
4 Etu twala ni kidyelelu kiki kwa Nzambi, bhukaxi ka Kidistu. 5 Mukonda etu kitutena kubhanga kima kyoso-kyoso mu nguzu yetu, maji Nzambi mwene utubhana o kutena kwa kubhanga kikalakalu kyoso-kyoso. 6 Mukonda dya mwene, tutena kukala tu akunji a kikutu kya ubhe, ki a kikutu kya Kijila kyosoneke kana, maji kya nzumbi ikôla. Mukonda o Kijila kyosoneke kibhekela kalunga, maji o nzumbi, ibhana mwenyu.
7 O Kijila kibhekela o kalunga a kisoneka ku matadi, kyeza ni kubhenya. Kyene kyexile mu fidisa akwa Izalayele kutala ku pholo ya Mozé, mukonda dya kubhenya kwa pholo yê, maji o kubhenya kuku, kweji bhwa. 8 O kwila o nzumbi ikôla keji ku ibhana ni kijingu kya betakota? 9 Se o Kijila kyabheka o kalunga kyexile ni kijingu, o kikalakalu kya kukwatekesa o athu n’a yuke, kya betakota kukala ni kijingu! 10 O kubhenya kwa Kijila kikima, mu ku kusokesa ni kubhenya kwa kikutu kya ubhe. 11 Se o Kijila kyeji bhwa kyejile ni kubhenya, o kikutu ki nangenena kyala dingi ni kijingu kyadikota!
12 Kuma twala ni kidyelelu kiki, tuzwela ni kidi kyoso. 13 Ki tubhange kala Mozé, wakexile muvunga o pholo ni dilesu phala an’a Izalayele kamone o kubhenya kwa kima kyeji bhwa.* 14 Maji ene axiti o mixima yâ. Mukonda katé lelu, kyoso kyatanga o kikutu kyokulu o dilesu kadikatula ku jipholo jâ, kuma dyene ditunda ngó bhukaxi ka Kidistu. 15 Mu kidi, katé lelu kyoso ene kyatanga o madivulu a Mozé, sayi dilesu divungina o mixima yâ. 16 Maji kyoso o muthu kya kayela o itumu ya Jihova, o dilesu ditunda. 17 Jihova Nzumbi, bhwoso bhwala o nzumbi ya Jihova, bhukala ufôlo. 18 Etu enyoso o jipholo jetu ki jo’fute dingi ni dilesu, twala kala tu malumwenu alondekesa o kubhenya kwa Jihova. A mu tukitula kyengi phala kudifwangana ni mwene, ni tulondekese dingi o kubhenya kwê, kala kya mesena Jihova, o Nzumbi.*