Ikalakalu ya Jipoxolo
27 Kyazubha kudikunda kwila, tweji kuya ku Itálya, abhakula Phawulu ni jipelezu ja mukwá ku kabhitangu ka kibuka kya masoladi amwixana Julyu, watokala ku kibuka kya masoladi a Nguxi. 2 Twa sambela ku naviyu ya Ndalamitu yeji katuka ku matabhu akibatu kya Azya. Twamateka kuzawuka, Adistaku o diyala mukwa Tesalónika ku kibatu kya Masedonya, wakexile kumoxi n’etu. 3 Mu kizuwa kya kayela, twabhixila ku Sidónya. O Julyu walondekesa henda kwa Phawulu, mu ku mwehela kuya mu kudimona ni makamba mê, n’a mu kwatekese.
4 Ki twatundu ku Sidónya, twayi bhwa zukama ni kikôlo* kya Xipele, mukonda o kitembwe kyakexile mu bhusila kwengi. 5 Kyenyiki twa zawuka o musanza wa kalunga ku mbandu ya Silisya ni Panfídya, twabhixila bhu ditabhu dya Mila, ku Lisya. 6 Kwenyóko o kabhitangu ka masoladi wasange naviyu ya Xandediya, yakexile muya ku Itálya, mwene anga utubhangesa kusambela mwenyomo. 7 Twende kamwanyu kamwanyu mu izuwa yavulu, anga tubhixila ku Sinidu ni ibhidi yavulu. Kuma ki twatenene kusuluka mukonda dya kitembu, twayi ku kikôlo* kya Keleta kya zukamene ku Salamone. 8 Kyabhonzele kyavulu kwendela ku mbandu a ndundu, maji twabhixila bhu kididi akixana Matabhu a Tululuka, kya zukamene mu mbanza ya Laseya.
9 Kuma kwabhitile thembu yavulu, kwexile kyá kilwezu kwendela mu naviyu, mukonda o kizuwa kya kujejuwala* kyabhitile kyá, kyenyiki Phawulu wa atendelesa, 10 wixi: “Enu akwetu, ngi mona kwila mu njila yiyi i twa mu kwenda, twanda bhita mu ibhidi yavulu, o imbamba yala mu naviyu yanda dibota, etu we nange twanda fwa.” 11 O kabhitangu ka masoladi ki kabhana mátwi mu ima ya zwela Phawulu, maji wevu o mwendexi wa naviyu ni ngana ya naviyu. 12 Kuma o ditabhu ki dyexile kyambote phala kubhitila-bhu o kixibhu, avulu azwela kwila, atokalele kukatuka phala kubhixila ku Fenise, o ditabhu dya kexile mu kikôlo* kya Keleta. Atena kubokona-mu ku mbandu ya thunda mba ku mbandu ya lwiji, kwenyóko kwéne kweji bhitila o kixibhu.
13 Kyoso o kitembu kyatundile ku mbandu ya lwiji kyabhusu bhofele, ene afikile kwila atenene kyá kuya ku Fenise. Mu kusuluka ene atakula o kifikidilu mu kalunga, anga aya ku Keleta mu kwendela ku ndundu. 14 Kya bhiti ka kithangana, kwa bhusu kitembwe kya dikota akixana Ewulokilu.* 15 Ni nguzu yoso o kitembu kyambata o naviyu, kyenyiki ki twatenene ku yendesa. Kuma twa lembwa, twehela kyá ngó o kitembu kwambata o naviyu. 16 Twabhiti mu ka kikôlo ak’exana Kawuda, maji né kiki ki twatena kulanga o ka ulungu* ku twambatele mu naviyu. 17 Kyoso kyazubha kuzawula o ka ulungu, akolesa o naviyu. Mukonda dya wôma wa kwila o naviyu yeji naminina ku Silite,* a kulumukisa o kifikidilu kya jimvwela,* kyenyókyo o naviyu a yambata ku kitembwe. 18 Kuma akexile mu tutakujula mukonda dya kitembu kyadikota, o athu amateka kutakula o imbamba yâ mu musanza wa kalunga. 19 Mu kizuwa kya katatu, ene atakula o falamenda ya naviyu mu musanza wa kalunga.
20 Mu izuwa yavulu, o dikumbi ni jithéthembwa ki jimoneka, kwexile kitembu kya dikota. Mu kusuka-ku, ki twexile dingi ni kidyelelu kya kubhuluka. 21 Kyabhiti izuwa yavulu sé kudya kima, Phawulu wemana mwaxaxi kâ, yu wa ambela: “Enu akwetu, mwatokalele kubelesela o ndunge inga mi bhanene, mukonda se mwa belesele o ndunge yami ya kuxala ku Keleta, ki mweji bhita mu hadi yoso yiyi, o imbamba yoso ki yeji dibota. 22 Maji né kiki, ngi mi ambela kwila sé-ku muthu mudyenu wanda fwa, maji o naviyu yéne ngó yanda zanganya.* 23 Mu usuku wabhiti, o anju ya Nzambi i nga mu bheza ya ngi tukulukila, 24 ya ng’ambela: ‘Kana kukala ni wôma Phawulu! Eye watokala kubhixila kwa Sézalu. Nzambi wa kubhana we o myenyu ya athu oso ala kumoxi n’eye mu naviyu.’ 25 Mu kiki, swinenu, mukonda ngixikina kwa Nzambi kwila, yoso yanda bhita kala kya ngi tangela o anju. 26 Maji sayi kikôlo* mu twanda naminina.”
27 Mu kubhita kwinyi ni kiwana kya usuku, o mabhuku akexile hanji mu tu takujula mu musanza wa Adiyatiko. Mu kaxi ka usuku, akalakadi a naviyu amono kwila twakexile mu bhixila kyá ku ndundu. 28 Ene atakula mukolo kwa kutile o kima kya neme, phala kwijiya o kuzonga kwa menya, ene amono kwila o kuzonga kwê kwexile kwa makwinyi atatu ni samanu a jimétulu. Kyenyiki ende dingi ka dikanga, anga azongo dingi, kindala amono kwila o kuzonga kwexile kwa makwinyi a yadi ni sambwadi a jimétulu. 29 Kuma twakexile ni wôma wa kwila o naviyu yeji naminina ku matadi, atakula ifikidilu iwana mu menya kudima dya naviyu. Ene akexile mu kingila ni hânji yoso kwila, kuma kúkya. 30 Maji o akalakadi a naviyu amesenene kulenga, a kulumukisa o ka ulungu mu musanza wa kalunga, mu kuzwela kwila a mutakula mu menya o ifikidilu yala kudima dya naviyu. 31 Maji Phawulu watangela o kabhitangu ni masoladi, wixi: “Se o mayala yá atunda mu naviyu, enu ki mwanda tena kubhuluka.” 32 O masoladi abatula o mikolo ya kutile mu ka ulungu, ya a ibwisa.
33 Mu kúkya, Phawulu waswinisa o athu phala kudya. Mwene wa ambela: “Lelu mwatenesa kyá kwinyi ni kiwana kya izuwa i mwa mu kingila ni hânji yoso, maji kimwadi luwa kima. 34 Kyenyiki, ngi mi tangela phala o mbote yenu kwila, dyenu kama koso-koso, mukonda ki kwanda texika né ngó lundemba lumoxi ku mítwe yenu.” 35 Kya zubha kuzwela o ima yiyi, wakwata o mbolo, wasakidila Nzambi bhu pholo ya athu oso, wabukula o mbolo, yu wamateka kudya. 36 Kyenyiki, athu oso aswina dingi, anga amateka wa, kudya. 37 Mu naviyu twexile tu hâma jiyadi ni makwinyi a sambwadi ni samanu dya athu. 38 Kyazubha kwikuta, atakula o tiliku mu musanza wa kalunga phala ku bhebhulukisa o naviyu.
39 Kyoso ki kwaki, kejidile o kididi kwakexile, maji amono kizanga ni ndundu, ene abanze kwimanesa o naviyu mwenyomo. 40 Kyenyiki, abatula o mikolo ya ifikidilu ya naviyu, anga a ibwisa mu musanza wa kalunga. Mu kithangana kyenyókyo, ajituna o mikolo yakwata o jileme. Kyazubha kuzawula o mvwela* yakexile ku pholo dya naviyu, ayi katé ku ndundu. 41 O naviyu ya diphuphu bhu kididi bhwa vudile o museke, bhwa kexile menya mu jimbandu, anga inaminina. O naviyu ya naminina ku pholo, maji ku dima akexile mu ibukujula ku mabhuku. 42 O masoladi amesenene kujibha o jipelezu joso, phala ka zowe n’a lenge. 43 Maji o kabhitangu ka masoladi wamesenene ku bhulula Phawulu, mwene wa afidisa kujibha o jipelezu. Wa tumina o athu ejidile kuzowa kuditakula mu musanza n’a dyangele kubhixila ku ndundu. 44 Watumu we o athu a mukwá kwa kayela, sayi yá mu mabaya, a ka mukwá mu ibhasu ya naviyu. Kyenyiki, etu enyoso twabhixila kyambote ku ndundu.