Mikeya
4 Mu izuwa isukidilaku,
O mulundu mwala o inzo ya Jihova,
Wanda dileka ku thandu dya milundu yoso.
Wene wanda dileka dingi, o tumilundu twa mukwa ndenge,
Ifuxi yoso yanda bhongolokela kwenyoko.
2 Ifuxi yavulu yandaya-ku ni kwamba, exi:
“Zenu, tubande ku mulundu wa Jihova,
Mu inzo ya Nzambi ya Jakobo.
Mwene wanda tulonga o jinjila jê,
Etu twanda kwenda mu jinjila jê.”
O kitumu kyanda tunda ku Ziyone
O kizwelu kya Jihova kyanda tunda mu Jeluzaleme.
3 Mwene wanda fundisa ifuxi yavulu,
Wanda batula madimanda a ifuxi ya jixi ja makanga jala ni kutena.
O jixibhata jâ anda jikitula jimvu,*
O mifula yâ anda ikitula ibhôlola.
Kibhwanda kala kifuxi kyanda lwa ita ni kifuxi kyamukwa.
Kanda dilonga dingi kulwa ita.
4 Kala muthu mudyâ wanda xikama* bhoxi dya muxi wê wa mividi ni bhoxi dya muxi wê wa mufiku,
Séku muthu wanda ku akwatesa wôma,
Mukonda kyene kyambe Jihova dya ifuxi.*
5 Mukonda o ifuxi yoso yanda kwendela mu dijina dya jinzambi jâ,
Maji etu-phe, twanda kwendela mu dijina dya Jihova, Nzambi yetu kate ku hádya ni hádya.
6 Jihova wambe, wixi:
“Mu kizuwa kyenyokyo, nganda bhongolola oso yó exile mutenguna,
Oso yó a mwanganene nganda ku abhongolola bhu kididi kimoxi,
Kumoxi ni yó oso u nga akastikala.
7 O yó exile mutenguna, nganda ku abhulula,
O yó a ambatele mu jixi ja makanga, nganda kwabhanga kifuxi kyadikota.
Tunde lelu kate ku hádya,
Jihova mwene wanda tumina mwaxaxi kâ, ku mulundu wa Ziyone.
8 Eye u kididi kyadileka kya kulangidila o ibhaku,
U mulundu wa mon’a Ziyone,
O utuminu wa dyanga wanda vutuka kokwê, wene wanda vutuka mwene kokwê,
O utuminu watokala kwa mon’a Jeluzaleme.
9 Wa mudikolela-hi?
O kwila kiwala ni sobha?
O kwila o mukwa ku kubhana jindunge wafu?
O kwila kiki kyene kya kubhangesa kukala ni jindolo kala ja muhatu wanda vwala?
10 Kema hanji ni jindolo, eye u mulundu wa Ziyone.
Kala o muhatu wala ni jindolo ja kuvwala,
Mukonda anda kukatula mu mbanza, wanda tunga mu mukáwu.
Wandaya ku Babilonya,
Kwenyoko, anda kubhulula.
Jihova wanda kubhulula bhu maku a jinguma jé.
11 Kyenyiki, ifuxi yavulu yanda dibhongolola phala kubhânga n’eye.
Ene anda zwela exi: ‘Ziyone a isebhulule,
Mesu metu amone o ima yiyi kubhita.’
12 Maji ene kejiya o ibanzelu ya Jihova,
O vondadi* yê ki ya atetulukila.
Mukonda mwene wanda ku abunda kumoxi kala ita ya tiliku bhu kididi bhwene mu bhyatela o idima.
13 Balumuka u mon’a Ziyone, ubete o tiliku.
Mukonda nganda bhangesa kwila o jingela jé, ji kituke jingela ja felu,
O makanda mé akituke makanda a ngondo,
Wanda bwika ifuxi yavulu.
O futu yâ, wanda ibhakula kwa Jihova,
O jimbote jâ joso, wanda jibhana kwa Ngana wavu o ixi yoso.”