Jobe
33 “Eye-phe Jobe ngakudyondo, ivwa o izwelu yami.
Ivwidila o maka oso u nganda kutangela.
2 Nganda jikula o dikanu dyami, mukonda ngala ni ima phala ku kutangela.
Wila mwene mátwi tekenge.
3 O izwelu yiyi ya mutunda mwene ku muxima wami,
Nganda zwela o kidi ki ngejiya.
4 Nzambi mwéne wa ngibhange ni kutena kwê,
O kutena kwa Muteni wa Yoso, kwa ngibhana o mwenyu.
5 Se watena u ngitambwijila.
Uzwela yoso ya kukala ku muxima, udizokele.
6 Bhu pholo ya Nzambi yakidi, twasokeletu ngo.
Eme we a ngi umbu ni mavu.
7 Kyenyiki-phe, kubhingi ku ngikwatela wôma.
O ima i nganda zwela, kiyanda kuluwalesa.
8 Maji nga kwivu kyoso ki wazwela,
Kyene, wabhitulula kyavulu o izwelu yiyi,
9 ‘Ngi muthu wakidi, kingala ni kikuma.
Kyene mwene! Kingate kituxi.
10 Maji Nzambi wa musota bhwoso bhwa ngikwatela,
U ngitala kala ngi nguma yê.
11 Inama yami wa ikutila ku kibunji,
O jinjila jami joso u jitonginina.’
12 Maji ngi kutangela kwila, o ima i wazwela kiyakidi.
Mukonda Nzambi wala kota, o muthu ndenge.
13 Mukonda dyahi wa muzoka ni mwene?
O kwila mukonda dya kukamba kutambwijila o ibhwidisu yé?
14 Maji-phe kikyene, mukonda Nzambi uzwela, ubhitulula,
Maji séku muthu u mubhana mátwi.
15 Mwene uzwelela mu nzoji, mu kisuma kya usuku,
Kyoso athu kyaya ku kilu,
Mu hama yâ mwazeka.
16 Mwene u azwelela mu mátwi,
Anga u alonga,
17 Phala kufidisa o muthu kubhanga ima yayibha,
Ni ku mulanga phala kadizangeleke.
19 Kukala mu hama ni jindolo,
Mba kyoso o ifuba yê ki iya ni kuxixima, kutena kubazela o muthu.
20 Mwene udituna kudya o mbolo,
Kate mwene ni kudya kwa wabhela kyavulu, kakwandala dingi.
21 Mwene uya ni kubhela
Kate ifuba yê ki iya mwene ni kudimonekena.
22 O yó ata o mwenyu wâ mu kilwezu, kwakambe ngo andaya mu mbila.
O izuwa yê ya kufwa yazukama we.
23 Se bhukala anju i muzokela,
Umoxi ku jimidi u mukwatekesa,
Phala kutangela o muthu kyebhi kyatena kubhanga o ima yayuka,
24 Kwabhu-phe! Nzambi wanda mukwatela henda, ni ku mwambela, wixi:
‘Mubhulule phala kafwe!
Ngasange kya woso u mukula.
25 Mukutu wê uxanane* dingi, o wa kambonga ndenge.
Akale dingi ni nguzu kala kyexile mu unzangala wê.
26 Kyoso mwene kyanda samba, Nzambi wanda mwivwa hé u mukwatela henda.
Pholo ya Nzambi wa kà imona ni kutana.
Mwene wa kà mutala dingi kala muthu wayuka.
28 Mwene wa ngibhulula phala kingifwe.
Kingandafwa luwa.
29 Nzambi ubhanga mwene o ima yoso yiyi.
U kibhanga luyadi, lutatu phala o mbote ya muthu,
30 Phala kamwehele kuya mu mbila,
O mukengeji wa mwenyu usuluke ni ku mumwikina.
31 Jobe ngivwidile! Kyoso ki ngandaya ni kuzwela, udixibha hanji!
Wila mwene mátwi tekenge.
32 Se ukala ni kya kuzwela, uzwelé mwene,
Mukonda ngamesena ku kulungisa.
33 Maji se kana, ngivwe-phe.
Kota wadixibha ni ngi kulongo kyebhi kikala o unjimu.”