Habakuke
2 Nganda kwimana bhu kididi kyami kya kulangidila,
Nganda kala bhu kididi kya dileka ku thandu a ilumbu,
Nganda suluka ni kukingila phala kwivwa yanda ngituma kuzwela mwene,*
Ni kyebhi ki nganda tambwijila kyoso kyanda ngibazela.
2 Bhenyobho Jihova wa ngambela, wixi:
“Soneka ku mabaya, o njimbu i watambula mu kisumwa, ijimbuluke mwene kyambote,
Phala o yó wanda itanga ni dízwi dyaswina, i mulombolokele we kyambote.
3 Mukonda o kithangana kya kudikumbidila o kisumwa, kikyabhixila luwa,
Kyanda bhixila mwene, kikyanda fula.
Né mwene se umona kwila kya mulaleka, eye kinga-kyu ngo!
Mukonda kyanda dikumbidila mwene.
Kikyanda laleka kana!
4 Talesa o mukwa ukumbu,
Mwene wala ni ibanzelu yayibha ku muxima.
Maji o muthu wayuka, wanda kala ku mwenyu mukonda dya ufiyele* wê.
5 O vinyu itena kubhangesa o muthu kubhanga o ima kala kyôwa.
Kyenyiki, o mukwa ukumbu kanda zediwa mu ima yabhanga.
O vondadi yê iya ni kudibandekesa kala Mbila* ya jikuka,
Wasoko ni kalunga, kana-ku kima kimukuma.
Ifuxi yoso u ibhongolola,
Mundu woso u ubhongolwela momwê.
6 Enyoso yá anda mubalumukina,
N’amutela sabhu ni misoso.
Anda kwamba, exi:
‘Kokolo dya yó ukituka mvwama mu kutambula ima yangene!
Mwandaya ni kuta makongo avulu kate bhebhi?
7 O athu ku wadi o makongo, anda kulungulukila ni lusolo!
Ene anda balumuka, anda kutalesa hadi,
Anda kutambula o jimbote jé.
8 Kuma watambula ima ku ifuxi yavulu,
O mundu woso wasubhuka, wanda kutambula we o ima iwala-nayu,
Mukonda wajibha athu avulu,
Wabhange we uswéya mu ixi ni mu jimbanza
Watatesa we o athu oso atokala-mu.
9 Lamba dya yó utambula nganyu ijila mu kubhanga ima yayibha, n’adikila o mwiji wê,
Ni kuta o kikalanga kyê mu kididi kyadileka,
Phala o divuwa kidimukwate!
10 Mu kujibha mundu wavulu, eye wabheka jisonyi ku mwiji wé.
Wate we kituxi.
11 Mukonda ni ditadi dyosokeke ku phalelu, dyanda dikola.
O mukambu wa inzo wanda dikola.
12 Lamba dya yó ujibha athu avulu phala kutunga mbanza,
Anga umateka ku itunga mu kubhanga ima yayibha!
13 Jihova dya ifuxi ki mwene ubhangesa kwila o athu akalakala ni nguzu yoso phala kukala ni ima yanda jokota mu túbhya?
Ki mwene we ubhangesa o ifuxi kubhwila mu kingoho?
14 Kala o menya kyezalesa o musanza wa kalunga,
O ixi yoso yanda kwizala ni kwijiya kwa fuma ya Jihova.
15 Lamba dya yó ukala ni njinda,
Anga ubhana uhôlwa ku makamba mê,
Phala kumona o thuxi yâ, kyoso kya kodiwa.
16 Muveji dya fuma, wanda kala ni jisonyi javulu.
Anda kunwisa-ku we, wanda londekesa we kwila kakusaye.
O kithangana kyé kya kunwa ku kopho yala ku lukwaku lwa kadilu lwa Jihova kyanda bhixila.
O fuma yé yanda kituka jisonyi.
17 Kala ki wabwika Libanu, kyene we kyanda kubwika.
Kala ki wakwatesa wôma ku yama, éye wa ibwika, kyene we kyanda kubwika.
Mukonda wajibha athu avulu.
Wabhange we uswéya mu ixi, mu jimbanza,
Éye watatesa o athu oso atokala-mu.
18 Valolo yebhi yala-nayu o kiteka, kyobhange ku musongi wa mabaya?
Se o musongi ubhanga kiteka, mbote yebhi yanda mubhekela o kiteka kiki?
Mbote yebhi ikatula o musongi mu kiteka kya felu kya bhange mwéne phala kulonga o makutu ku athu?
Né mwene se o musongi udyelela ku iteka yiyi yakambe valolo, ki itena we kuzwela,
Kikwatekesu kyebhi kyanda tambula?
19 Lamba dya yó wambela o kibhesu kya dibaya: “Balumuka!”
Mba wambela o ditadi dyakambe o dikanu: “Phaphumuka! Tubhane itendelesu!”
O iteka yiyi a ibhanga ni ulu ni phalata,
Kiyene ni mwenyu.
20 Maji Jihova wala mu tembulu yê ikôla.
Athu oso mu ngongo, adixibhe bhu pholo yê!’”