Hozeya
13 Kyoso Efalayíme kyakexile muzwela, o athu exile muteketa,
Mwene wexile ni valolo yavulu mu Izalayele.
Maji mwene wakexile ni kikuma yu wafu mukonda dya kubheza Bahale.
2 Kindala ene a mubandekesa dingi o ituxi yâ,
Ene mubhanga iteka ni phalata yâ,
O iteka yoso yiyi, a ibhanga ku athu ala ni ufunu wa kubhanga o ikalakalu yoso yiyi.
Ene amba: “O athu abhakula o jisata, abhane jinzobole ku iteka ya tungombe.’
3 Mukonda dya kiki ene anda difwangana ni mbundu ya kamene,
Kala o dimume dikukuta ni lusolo,
Kala o ibhyate a yambata ku kitembwe bhu kididi kya kubhyatela,
Kala o dixi ditunda ku kandeya.
4 Maji tunde ku ixi ya Ijitu, éme ngi Jihova Nzambi yé,
Eye kwijidile Nzambi yengi, kikale ngo eme,
Kikwene mubhuludi wengi, kikale ngo eme.
5 Eme nga kwijidila mu kikangalakata, mu ixi ya kukuta.
6 Ene asangulukile kyavulu mukonda dya ididi yâ mu dila o ibhaku,
Mukonda dya kiki exile mudizangeleka.
Mukyenyiki, a ngijimbi.
7 Nganda dibhanga kala ngi kahoji phala ku akwata,
Ni ku abatamena bhu mbandu a njila kala kibhanga o ingo.
8 Nganda ku akwata kala kibhanga o ulusu ya mukaji, yajimbidisa o twana twê,
Nganda tandujula o jipheto jâ.
Nganda kwaxakuta kala kibhanga o hoji,
Ene anda ku asanasana ku kyama kya muxitu.
9 Eye Izalayele kuma wa ngi lungulukila, éme ngi mukwatekexi wé,
Kyene kyanda kubwikila.
10 Kyenyiki, o sobha yé wala kwebhi, phala ku kubhulula mu jimbanza jé joso,
O jinguvulu* jé jiwambela:
‘Ngibhane sobha ni ilamba, ala kwebhi?’
11 Mu njinda yami nga kubhana sobha,
Nganda kukatula-yu we, mukonda dya njinda yami.
12 O kitondalu kya Efalayíme ngakibhake,*
O kituxi kyê nga kibhake mwene.
13 O jindolo ja kuvwala ja manyâ janda dibandekesa.
Maji mwene mona wa kambe kilunji,
Mu ola ya ku muvwala mwene kaxikina kutunda mu mala dya manyâ.
14 Nganda mikatula mu Mbila,*
Nganda mibhulula mu kalunga.
Éye u Kalunga, o kutena kwé kwala kwebhi?
Éye u Mbila, o kutena kwé kwa kubwika kwala kwebhi?
Maji Efalayíme kinganda mukwatela dingi henda.
15 Né mbe mwene ubhana ithulu mwaxaxi ka mabu,
Kwanda kwiza kitembwe kitunda ku mbandu ku tundila o dikumbi, o kitembwe kya Jihova,
Mwene wanda kwijila mu kikangalakata phala kukukutisa o fixi ni hoto ya menya.
Mwene wanda tambula o jimbote jé ni ima yoso yavalolo i wala nayu.
16 Samadiya wanda kala ni kikuma mukonda wabhukumukina Nzambi yê.
Ene anda ku ajibha ni xibhata.
O an’ê anda ku asanasana,
O ahatu emita, anda ku atandula o mala.”