Dyalwilu
23 Mukyenyiki, Balamu wambela Balake: “Tunga bhabha sambwadi dya jikalatódyu u ngijibhile sambwadi dya ngombe ni sambwadi dya jimbudi ja ndumbe.” 2 Balake anga ubhanga kala kya mwambela Balamu mu kithangana kyenyokyo. Mu jikalatódyu joso, Balake ni Balamu abhakula-mu kangombe kamoxi ni kambudi kamoxi. 3 Balamu wambela-phe Balake: “Imana bhabha bhu mbandu ya sata yé ya kwoha. Eme ngamuya koko. Nange Jihova wanda zwela n’eme. Nganda kwambela yoso yanda ngitangela mwene.” Mukyenyiki, mwene wayi ku mulundu wofele.
4 Nzambi wazwela-phe ni Balamu, Balamu anga wambela Nzambi, wixi: “Ngatungu o sambwadi dya jikalatódyu, mu jikalatódyu joso nga bhakula-mu kangombe kamoxi ni kambudi kamoxi.” 5 Jihova anga wambela Balamu, wixi: “Vutuka kwa Balake, u mwambela kiki.” 6 Mukyenyiki Balamu wavutuka, yu wamono Balake ni ilamba yoso ya akwa Mowabe emana bhu mbandu a sata yê ya kwoha. 7 Mwene watumbula-phe o izwelu yiyi:
“Balake, sobha ya Mowabe wa ngikatula ku Halá,
Tunde ku milundu ku mbandu kutundila o dikumbi:
‘Za u ngibhubhidile Jakobo.
Kyene, za ufundise Izalayele.’
8 Kyebhi kingeji bhubhidila yó ka abhubhidila kwa Nzambi?
Kyebhi kingeji fundisa yó ka afundisa kwa Jihova?
9 Ngamu amona tunde ku thandu a matadi,
Ngamu amona tunde ku milundu yofele.
Mundu watungu ubheka we kwenyoko,
Kene mudilunga ni ifuxi yamukwa.
10 Nanyi utena kukondala o mbutu ya Jakobo,
Mba o mbandu ya kawana ya Izalayele?
Ngifwe kala kyafu o athu ayuka,
O disukilu dya mwenyu wami disokele ni dya ene.”
11 Kyenyiki, Balake wambela Balamu: “Ihi i wa ngibhange? Eme nga kubheka phala kubhubhidila o jinguma jami, maji eye wa abesowala.” 12 Mwene watambwijila: “O kwila kingatokala kuzwela yoso ya ngitangela Jihova phala kuzwela?”
13 Balake wa mwambela: “Ngakudyondo, zá tuye kumoxi bhu kididi kyengi bhu wanda tena ku amona. Wanda mona ngo mbandu yâ, kiwanda mona o mundu woso. Ngibhubhidile-nawu bhenyobho.” 14 Kyenyiki, Balake wa mwambata ku mukáwu wa Zofimi, ku thala dya mulundu wa Pixika, watungu-ku sambwadi dya jikalatódyu. Ku jikalatódyu joso wabhakula-ku kangombe kamoxi ni kambudi kamoxi. 15 Balamu wambela-phe Balake: “Imana bhabha bhu mbandu ya sata yé ya kwoha, eme ngamuya muzwela ni Nzambi.” 16 Kyenyiki, Jihova wazwela ni Balamu yu wamwambela, wixi: “Vutuka kwa Balake, u mwambela kiki.” 17 Bhenyobho, Balamu wayi kate bhwexile Balake, wa mumono yu ukingila bhu mbandu ya sata yé ya kwoha, o ilamba ya akwa Mowabe exile-nê kumoxi. Balake wa mwibhwidisa: “Ihi yambe Jihova?” 18 Mu ku mutambwijila mwene watumbula-phe o izwelu yiyi:
“Disokejeke Balake, u ngivwe.
Ngivwe, éye u mon’a Zipolo.
19 Nzambi ki muthu mu xitu phala kutanga makutu,
Ki mona muthu phala kulungulula o ixinganeku yê.
Yoso yazwela ukamba ku ibhanga?
Yoso yakanena ukamba ku ikumbidila?
20 Talesa! A ngibheka phala kubesowala,
Mwene wabesowala, eme kingitena kulungulula o ima.
21 Mwene kanda kwehela Jakobo ku mubhanga kima kyayibha bhukaxi ka wanga,
Mwene kanda kwehela Izalayele kubhita mu wíndwa.
Jihova Nzambi yâ wala ni ene,
Mwene a muzangeleka kala sobha bhukaxi kâ.
22 Nzambi wa mu akatula ku Ijitu.
Mwene ukwatekesa Izalayele ni kutena kwê kala o jingela ja phakasa.
23 Mukonda kwa Jakobo wanga ki utena-ku,
Kwa Izalayele né o kuzambula lembwa.
Kindala kiki, atena kuzwela yalungu ni Jakobo ni Izalayele kwila:
‘Talenu yabhange Nzambi!’
24 O mundu yú, wanda balumuka kala hoji,
Wanda kwimana kala kimana o hoji.
Kiyanda zeka ande dya kudya o kyama kya kwata,
Ni kunwa o manyinga a yó a ajibha.”
25 Kyenyiki Balake wambela Balamu: “Se kiwatena ku abhubhidila, kiwatokala we ku abesowala.” 26 Balamu watambwijila Balake, wixi: “Kingakutangela kwila nganda bhanga ngo yoso yanda ngitangela Jihova?”
27 Balake wambela Balamu: “Ngakudyondo, zá twende hanji bhu kididi kyengi. Nange o Nzambi yakidi uxikina kwila, u ngibhubhidila-nawu bhenyobho.“ 28 Kyenyiki, Balake wambata Balamu ku thala dya mulundu wa Peole, kwazukama ni Jezimone.* 29 Mukyenyiki, Balamu wambela Balake: “Tunga bhabha sambwadi dya jikalatódyu, u ngijibhile sambwadi dya ngombe ni sambwadi dya jindumbe ja mbudi.” 30 Balake anga ubhanga kala kyamwambela Balamu. Mu jikalatódyu joso, Balake wabhakula-mu kangombe kamoxi ni kambudi kamoxi.