Divulu Dya Dyanga Dya Jisobha

8 Mu izuwa yenyoyo, Solomá wongeka o adyakime oso a Izalayele, o atwameni oso a miji ni atwameni a mabhata a jitata ja akwa Izalayele, ene eza kate kwa sobha Solomá mu Jeluzaleme, phala kukatula o Álaka ya Kikutu kya Jihova mu mbanza ya Davidi, kifwa, ku Ziyone. 2 O mayala oso a Izalayele adyongeka ku pholo ya sobha Solomá mu fesa* mu mbeji ya Etanime,* kifwa, o mbeji ya kasambwadi. 3 O adyakime oso a Izalayele eza, o akunji anga azangula o Álaka. 4 O akunji ni Jilevita ambata* o Álaka ya Jihova, o balaka ya kudyongekela ni ima yoso ikôla yakexile mu balaka. 5 O Sobha Solomá ni mundu woso wa Izalayele a exanene phala kudyongeka ni mwene, akexile ku pholo ya Álaka. Anga abhakula jimbudi javulu ni jingombe, katenene ku jikwata konda.

6 Mukusuluka, o akunji ambata o Álaka ya Kikutu kya Jihova bhu kididi kyê moxi a dixilu dya inzo, kifwa mu Kididi Kikôla Kinéne. Ene atula o Álaka moxi a mabhabha a jikelubini.

7 Kyenyiki, o mabhabha a jikelubini exile ku thandu dya kididi bhwexile o Álaka. O jikelubini anga jivunga o Álaka ni mikambu. 8 O mikambu yalebhele kyavulu, atenene ku imona mu Kididi Kikôla ku pholo ya dixilu, maji katenene ku imona bhu kanga. O mikambu yala kwenyoko kate mu izuwa ya lelu. 9 Mu Álaka mwexile ngo o matadi ayadi atudile Mozé ku Holebe, kyoso Jihova kyabhange o kikutu ni akwa Izalayele mu kutunda mu ixi ya Ijitu.

10 Kyoso o akunji kyatundu mu Kididi Kikôla, o dituta dya vungina o inzo ya Jihova. 11 O akunji katenene kwimana phala kubhanga o kikalakalu kyâ mukonda dya dituta, mukonda o kubhenya kwa Jihova kwa vungina o inzo ya Jihova. 12 Kyenyiki, Solomá wambe: “Jihova wambe kwila weji tunga mu matuta edi bwí. 13 Eme ngaditundu kyambote mu kutunga inzo yafwama kinene phala eye, kididi phala utunge-mu kate ku hádya ni hádya.”

14 Mukusuluka, o sobha wabhiluka ku mundu woso wa Izalayele, wamateka ku abesowala, o mundu woso wa Izalayele wemanene hanji. 15 Mwene wambe: “Jihova o Nzambi ya Izalayele a muximane, yó wakumbidila ni maku mê o ima ya kanena kwa tat’etu Davidi kyoso, kyambe: 16 ‘Tunde o kizuwa ki ngakatula o mundu wami wa Izalayele ku Ijitu, kingasolo mbanza yengi mwaxaxi ka miji ya Izalayele phala kutunga-mu inzo phala o dijina dyami dinangenene mwenyomo, maji ngasolo Davidi phala kutumina o mundu wami wa Izalayele.’ 17 Tat’etu Davidi wamesenene kyavulu kutunga inzo phala o dijina dya Jihova, o Nzambi ya Izalayele. 18 Maji, Jihova wambela tat’etu Davidi, wixi: ‘Eye wamesena kyavulu kutunga inzo phala o dijina dyami, kima kyambote kukala ni hanji ya kubhanga kiki. 19 Maji-phe, k’eye wanda ngitungila o inzo, o mon’ê u wanda muvwala* mwéne wanda tunga o inzo phala o dijina dyami. 20 Jihova wakumbidila o kikanenu kyabhange mukonda ngabhingana tat’etu Davidi, éme ngaxikama ku kyandu kya ungana kya Izalayele kala kyakanene Jihova. Ngatungu we inzo phala o dijina dya Jihova, o Nzambi ya Izalayele. 21 Ngasolo kididi kwenyoko phala kutula-mu o Álaka mwala o kikutu kyabhange Jihova ni jikuku jetu kyoso kya akatula ku Ijitu.”

22 Kyenyiki, Solomá wemana bhu pholo dya kalatódyu ka Jihova ni bhu pholo ya mundu woso wa Izalayele, waleka o maku bhulu, 23 yu wambe: “U Jihova, Nzambi ya Izalayele, seku Nzambi wasokela n’eye kikale ku dyulu ni mu ixi. Eye ubhaka o kikutu, ulondekesa henda ku jiselevende jê abhaka o itumu yê anga a ibelesela. 24 Eye wakumbidila o kikanenu kiwabhange kwa tat’etu Davidi, o selevende yé. Wabhange o kikanenu ni dikanu dyé, lelu eye wa kikumbidila ni lukwaku lwé. 25 Kindala u Jihova Nzambi ya Izalayele, kumbidila o kikanenu ki wabhange kwa tat’etu Davidi, o selevende yé, kyoso ki wambe: ‘Kwanda kala jinga muthu ku mbutu yé wanda kala bhu pholo yami, wanda xikama ku kyandu kya Izalayele, se o twana twé enda mu jinjila jami ni ufiyele woso kala ki wabhange eye.’ 26 Kyenyiki-phe, ngakudyondo eye u Nzambi ya Izalayele, kumbidila o kikanenu ki wabhange kwa tat’etu Davidi, o selevende yé.

27 “Maji, o kwila Nzambi utena kutunga mu ixi? O dyulu dya madyulu kutena kusoka-mu, kwambe dingi o inzo yiyi i nga kutungila! 28 Mukiki-phe, ivwa o musambu ni kudyonda kwa selevende yé u Jihova Nzambi yami, ivwa o kudikola ni musambu wa mubhanga lelu o selevende yé kokwé. 29 O mesu mé atalele o inzo yiyi suku ni mwanya, o kididi ki wambe, wixi: ‘Koko kwene kwanda kala o dijina dyami,’ anga ivwa o musambu wa mubhanga o selevende yé mu kulungila o pholo ku kididi kiki. 30 Ivwa o kudyonda kwa selevende yé, ivwa o kudyonda kwa mundu wé Izalayele, kyoso kyasamba mu kulungila o pholo bhu kididi kiki. Tunde ku dyulu o kididi bhu watungu, ivwa o misambu anga u aloloka.

31 Se kukala diyala uta kituxi ku muthu wengi anga a mujijidika kuloka,* o kyanda kwila waloko, anga wiza ku kalatódyu ké mu tembulu yiyi, 32 eye-phe ivwa tunde ku dyulu, ufundise o jiselevende jé, ubelese oso atondala,* mu kubhangesa kwila o kikuma kyê kikale ku thandu dya mútwe wê, o yó kabhange kima kyayibha* u mulungise, anga u mubesowala kala kyafwama mu kuyuka kwê.

33 Se o mundu wé Izalayele a atolola ku jinguma jâ mukonda dya kuta kituxi kokwé, anga avutuka kokwé ni kuximana o dijina dyé ni kusamba ni ku kudyonda, mu kubhinga o kikwatekesu kyé mu inzo yiyi, 34 kyenyiki-phe, tunde ku dyulu ivwa, loloka o kituxi kya mundu wé Izalayele ni ku abheka dingi mu ixi i wabhana ku jikuku jâ.

35 Kyoso dyulu kidyanda jika, anga kukamba kunoka mukonda dya mundu wé kuta jinga ituxi kokwé, anga a samba mu kulungila o pholo yâ mu kididi kiki, ni kuximana o dijina dyé anga adyela o ituxi yâ mukonda dya ku atatesa,* 36 kyenyiki, tunde ku dyulu wa evwa ni kuloloka o ituxi ya jiselevende jé, o mundu wé wa Izalayele. Wa alonga kyambote o njila yatokala kwendela-mu anga ubhangesa kunoka mu ixi i wabhana ku mundu wé kala undundu.

37 “Se mukala nzala mu ixi, dibhebhu, kutema kwavulu,* mofu mba mahoho avulu, mba mahoho a zanga o idima, mba jinguma jikondoloka o ixi mba dibhebhu dyoso-dyoso mba uhaxi, 38 anga o muthu mba o mundu wé woso wa Izalayele usamba mba udyondela mukubhinga o kikwatekesu kyé mu kima kyoso-kyoso (kuma kala muthu wejiya o kutata kwê), kyoso ene kyanda sununa o maku bhwa lungila o inzo yiyi, 39 mu kyenyiki, tunde ku dyulu bhu kididi kyé bhu watungu, u aloloka, u akwatekesa, ubesowala kala muthu kala kyafwama o jinjila jê, mukonda eye wejiya o mixima yâ (kuma eye ngo wejiya o mixima ya athu oso), 40 phala o mundu wé a kukwatele wôma ni kukuxila mu izuwa yoso yanda tunga mu ixi i wabhana ku jikuku jetu.

41 “O yó atokala ku ixi yengi, kabhange mbandu ya mundu wé Izalayele, kyanda tunda mu ixi ya dikanga phala kwiza bhabha mukonda dya dijina dyé,* 42 (kuma anda kwivwa yalungu ni dijina dyé dyonene ni kutena kwa lukwaku lwé), anga a samba mu kulungila o pholo bhwala o inzo yiyi, 43 mukiki-phe, tunde ku dyulu koko, o kididi bhu watungu, ivwa, bhanga yoso yanda kubhinga o mukwa ixi yengi phala o athu oso mu ngongo ejiye o dijina dyé anga adixile, kala kyene mubhanga o mundu wé Izalayele. Phala ejiye we kwila, o dijina dyé ene muditumbula mu inzo yiyi i ngatungu.

44 “Se utumikisa o mundu wé mu kulwa ita ni jinguma jâ, kabasa kididi kya kala, anga a samba kokwé u Jihova mu kulungila o pholo mu mbanza i wasolo ni mu inzo i ngatungu phala o dijina dyé, 45 kyenyiki-phe, tunde ku dyulu, ivwa o musambu ni kudyonda kwâ mu kubhinga kikwatekesu anga u abhanga kyoso kyayuka.

46 “Se ene ata kituxi kokwé, (kuma seku muthu ukamba kuta kituxi) anga u akwatela njinda ni kwabhakula ku jinguma jâ, ene anga a ambata kala abhika ku ixi ya jinguma, kikale dikanga mba bhwa butu, 47 se mu ixi mwa ambata adyela, anga avutuka kokwé, mu ku kudyondela mu ixi ya yó a ambata, mu kwamba: ‘Twate kituxi, o kima kitwabhange kyayibha,’ 48 se ene avutuka kokwé ni muxima woso mu ixi ya jinguma jâ mwala kala abhika, he asamba kokwé mu kulungila o pholo yâ mu ixi i wabhana ku jikuku jâ, o mbanza i wasolo ni inzo i ngatungu phala o dijina dyé, 49 kyenyiki-phe tunde ku dyulu, ivwa o misambu ni kudyonda kwâ mu kubhinga kikwatekesu, anga u abhanga kyoso kyayuka. 50 Loloka o kituxi kyate o mundu we kokwé, he uloloka o itondalu yâ yoso. Eye wanda bhangesa kwila, a akwatela henda ku jinguma jâ, anga a atalatala ni henda. 51 (Kuma éne o mundu wé, o undundu wé wa akatula ku Ijitu mwakexile mutala hadi yavulu.*) 52 O mátwi mé evwe o kudyonda kwa selevende yé ni kudyonda kwa mundu wé Izalayele. Ivwa jinga kyoso ene kyadikola kokwé.* 53 Mukonda eye wa asolo kala undundu mwaxaxi ka athu mu ngongo, kala ki wazwela bhukaxi ka selevende yé Mozé kyoso ki wakatula o jikuku jetu mu ixi ya Ijitu, eye u Suke-ku Jihova Nzambi.”

54 Kyoso Solomá kyazubha kubhanga o musambu yu ni kudyonda kwa Jihova, mwene wabalumuka bhu kididi bhwa kexile o kalatódyu ka Jihova, bhwa fukamene ni maku oleke bhulu. 55 Mukusuluka, mwene wemana yu wabesowala o mundu wa Izalayele ni dizwí dyaswina mu kwamba: 56 “Jihova a muximane, wabhana kididi kya kunyoha ku mundu wé, kala kya kikanene. Ku ima yoso yambote yakanena bhukaxi ka selevende yé Mozé, kikukambe kudikumbidila ne ngo kizwelu kimoxi. 57 Jihova Nzambi yetu akale n’etu kala kyakexile ni jikuku jetu. Katwehelele kana, katubhane dikunda. 58 Mwene abhangese o muxima wetu kuvutuka kwa mwene, phala twende mu jinjila jê joso ni ku kumbidila o itumu yê, ni jingonge jê ni itendelesu yabhana ku jikuku jetu phala ku ibelesela. 59 O kudyonda kwami kwa Jihova, Jihova Nzambi yetu akulembalale suku ni mwanya, phala afundise o selevende yê ni mundu wê Izalayele ni kuyuka izuwa yoso. 60 Phala o athu oso mu ngongo akijiye kwila, Jihova mwéne ngo o Nzambi yakidi, seku Nzambi yengi. 61 Mukiki-phe, enu mwatokala kusidivila Jihova Nzambi yetu ni muxima woso, beleselenu o jingonge jê ni kutumaka o itumu yê kala ki mwa mubhanga lelu.”

62 O sobha ni mundu woso wa Izalayele abhakula ndumba ya jisata kwa Jihova. 63 Solomá wabhakula jisata ja paze kwa Jihova. Wabhakula makwinyi ayadi ni kiyadi kya jimidi ja jingombe ni hama ni makwinyi ayadi a jimidi ja jimbudi. Kyenyiki, o sobha ni mundu woso wa Izalayele abhakula o tembulu kwa Jihova. 64 Mu kizuwa kyenyokyo, sobha wazelesa o kididi kyakexile bhukaxi ka kithádi, ku pholo ya inzo ya Jihova, kuma mwene wabhakula jisata ja kwoha, jisata ja jimbutu ni banya ya jisata ja paze. Mukonda o kalatódyu ka ngondo kexile ku pholo ya Jihova katolele kyavulu phala kubhakula-ku o jisata joso. 65 Mu kizuwa kyenyokyo, Solomá wabhange fesa ni Izalayele yoso, kwexile mundu wavulu atundile ku Lebo-Hamati,* ndu ku ngiji ya Ijitu. Abhange fesa phala Jihova Nzambi yetu, mu sambwadi dya izuwa ya ateku dingi sambwadi dya izuwa. Kifwa, atenesa dikwinyi ni kiwana kya izuwa. 66 Mu kizuwa kyakayela,* mwene watumu o mundu kuvutuka ku mabhata mâ, o mundu anga umateka kubesowala o sobha, ya ayi kala muthu mu inzo yê ni muxima wasanguluka, mukonda dya mbote yoso yabhange Jihova kwa selevende yê Davidi ni ku mundu wê Izalayele.