Daniyele

5 Sobha Belexazale wabhana fesa yadikota, yu wexana midi ya athu afuma. Mwene wakexile munwa vinyu bhu pholo yâ. 2 Kyoso sobha Belexazale kya kodiwile kya ni vinyu, watumu kubheka o jikopho ja ulu ni ja phalata jakatwile tat’ê* Nabukodonozolo mu tembulu mu Jeluzaleme, phala mwene ni jisayi jê ni ahat’wê amukwa ni athu afuma kunwina-mu. 3 Bhenyobho, a mubhekela o jikopho ja ulu jokatwile mu tembulu, o inzo ya Nzambi, mu Jeluzaleme. O sobha ni jisayi jê ni ahat’wê a mukwa ni athu afuma, anwina-mu. 4 Anu o vinyu, ya aximana o jinzambi jobhange ni ulu, phalata, ngondo, felu, mabaya ni matadi.

5 Mu kithangana kyenyokyo, kwamoneka lukwaku lwa muthu, lwamateka kusoneka ku phalelu yobebe ya inzo ya sobha, bhu mbandu a kandeya. O sobha wamono o lukwaku lwexile musoneka. 6 Bhenyobho, sobha wadisuwata, o inama yê kiyexile ni nguzu, o jiphuna jê jexile mu diphupha.

7 Sobha anga udikola, wixi: Ngibhekelyenu akwa kuzambula, o akwa Kaladeya, o athu azambula bhukaxi ka jithéthembwa. Sobha wambela o jinjimu ja Babilonya, wixi: “Muthu woso utanga yosoneke, anga u ngitangela o dilombolwelu dyê, anda muzwika izwatu ya kusuka, anda muta musanga wa ulu mu xingu, mwéne wanda kala o muthu wa katatu mu utuminu wami.”

8 Kyenyiki, o jinjimu joso ja sobha jeza, maji alembwa kutanga o isoneku ni kujimbulula o dilombolwelu dyê kwa sobha. 9 Mukonda dya kiki, sobha Belexazale wexile ni wôma wavulu, pholo yê yadisuwata, o athu afuma a diwana.

10 Kyoso n’a mvwale kyevu o izwelu ya sobha ni ya athu afuma, wabokona bhu kididi bhwexile mubhita o fesa. Bhenyobho, n’a mvwale wambe: “Sobha ngana yami, kola mwenyu! Kwehele o ixinganeku yé ku kubhuwamesa, kana kudisuwata. 11 Mu utuminu wé, mwala diyala wala ni kutena kwa jinzambi jikôla. Kyoso tat’é kyakexile hanji ku mwenyu, o diyala didi a mumono kwila wakexile ni kwijiya, kutetuluka ni unjimu kala o unjimu wa jinzambi. Tat’é, sobha Nabukodonozolo, wa musolele phala kukala mutwameni wa akunji abhanga ipheteka ya wanga, o akwa kuzambula, akwa Kaladeya ni yó azambula bhukaxi ka jithéthembwa. Sobha, kiki kyene kyabhange tat’é. 12 O diyala didi Daniyele, sobha wa muluku o dijina dya Beltexazale. Mwéne wabetelekota mu kukala ni unjimu, kwijiya ni kutetuluka kwa kulombolola jinzoji, kutungununa ikutu ni kubatula maka abhonzo. Tuma kwixana Daniyele, mwene wanda kubhana o dilombolwelu dya isoneku yiyi.”

13 Kyenyiki, Daniyele a mwambata kwa sobha. Sobha webhula Daniyele, wixi: “Éye u Daniyele mukwa Judá, a kukwikile kwa tat’etu, o sobha? 14 Ngevu kwila eye wala ni kutena kwa jinzambi ni kwila, wabetakota mu kukala ni unjimu, kwijiya ni kutetuluka. 15 A ngibhekela o jinjimu ni akwa kuzambula phala kutanga o isoneku ni ku ngitangela o dilombolwelu dyê. Maji ene alembwa ku ngitagela o dilombolwelu dya njimbu yiyi. 16 Ngevu we kwila, eye wala ni kutena kwa kutungununa o ikutu ni kubatula maka abhonzo. Kyenyiki, se utanga o isoneku yiyi anga u ngilombolwela-yu, anda kuzwika izwatu ya kusuka, anda kuta musanga wa ulu bhu xingu, éye wanda kala o muthu wa katatu mu utuminu wami.”

17 Bhenyobho Daniyele watambwijila o sobha, wixi: “Ngana yami, maujitu mé akalyé, mba u abhana athu engi. Maji né kiki, nganda tanga o isoneku, nganda kutangela we o dilombolwelu dyê. 18 Sobha ngana yami, o Nzambi Sukeku, wabhana ungana, kutena, nguzu ni kijingu kwa tat’é Nabukodonozolo. 19 Mukonda dya kutena kwa mubhana Nzambi, o athu ni ifuxi izwela madimi kadifu, yexile muteketa bhu pholo yê. Woso wa mwidile kwila u mujibha, wexile mu mujibha mwene. Woso wa mwidile kwila ukola mwenyu, wexile mwene mukola mwenyu. Woso wa mwidile kwila u muzangeleka, wexile mu muzangeleka mwene, woso wa mwidile u mutulula, wexile mu mutulula mwene. 20 Maji kyoso mwene kya dizangeleka, wa huku yu wabhukumuka, a mutambula o ungana wê. O kijingu kyê a mutambula-kyu we. 21 A mukaye mwaxaxi ka athu, o kilunji kyê a kilungulula, wedile mukwa ni kyama. Mwene watungile ni jijumendu ja mukáwu, a mubhangesa kudya yangu kala kidya o jingombe, o mukutu wê a ubetesa ku mbundu ilawuka ku dyulu, kate kyaxikina kwila, o ungana wa Sukeku wala kota, o mautuminu oso a athu mu ngongo ndenge, ni kwila mwene u ubhana ku muthu woso-woso, né mwene se ngadyama mwaxaxi ka athu.

22 “Maji eye ngana Belexazale mon’a* Nabukodonozolo, kulenduka sumbala wejidile o ima yoso yiyi. 23 Eye ngana, wa dizangeleka, wa bhukumukina o Ngana ya dyulu, watumu ku kubhekela o jikopho jexile mu inzo yê. Mukusuluka, eye ngana ni jisayi jé, ni ahat’wé amukwa, ni athu afuma mwanwina-mu, énu mwaximana o jinzambi jenu jobhange ni phalata, ngondo, ulu, felu, mabaya ni matadi. Jinzambi kijene mumona, kijene mukwivwa, kijejiya we kima. Maji eye ngana, kiwaximana Nzambi, yó wa kubhana o mwenyu. 24 Kiki kyene kyabhangesa Nzambi kutumikisa lukwaku lwasoneka o izwelu yiyi. 25 Yiyi yene o izwelu yosoneke ku phalelu: MENE, MENE, TEKEL ni PARSIN.

26 “O dilombolwelu dya izwelu MENE, dyenyidi: Nzambi wakondala o izuwa ya utuminu wé, yu wa uzubha.

27 “TEKEL: Eye ngana, Nzambi wa kupezala, wa kumono kwila kutenena.

28 “PARSIN: Nzambi wa wanuna o utuminu wé, wa ubhana ku akwa Medya ni ku akwa Pélesa.”

29 Bhenyobho, Belexazale watumu kuzwika Daniyele ni kizwatu kya kusuka, ni ku muta musanga wa ulu bhu xingu. Watumu we kubhana o ngolokela ya kwila, mwéne wejikala o muthu wa katatu mu kutumina.

30 Belexazale sobha ya akwa Kaladeya, a mujibha mu usuku wenyó. 31 Dályu mukwa Medya, wa mubhingana ku usobha. Dályu wexile ni makwinyi asamanu ni kiyadi kya mivu.