Jobe
2 Mu kizuwa kyamukwa, o jianju jadibhongolola dingi bhu pholo ya Jihova, Satanaji weza we mwaxaxi kâ, phala kukala bhu pholo ya Jihova.
2 Jihova webhula Satanaji, wixi: “Wa mutunda kwebhi?” Satanaji wavutwila Jihova, wixi: “Ngexile munyunga mu ngongo ni ku itonginina.” 3 Jihova webhwidisa Satanaji, wixi: “Mubhik’ami Jobe wa mumono? Mu ngongo kimwala muthu wasokela-nê. Mwene mukwa kidi, wene mubhanga ima yayuka, uxila Nzambi, kene mubhanga ima yayibha. Sumbala eye wamesena ku ngifunyisa ku mubhekela kibwikilu sé kikuma, mwene wadikwatenena hanji mu ufiyele wê.” 4 Maji Satanaji wavutwila Jihova, wixi: “O mwenyu watowala. Se o muthu ukala mu kilwezu, wanda bhana yoso yala-nayu phala kubhulula o mwenyu wê. 5 Kindala-phe zangula hanji o lukwaku lwé u mutalese hadi ni uhaxi wabhonzo, umone se kanda kubhukumukina!”
6 Bhenyobho, Jihova wambela Satanaji, wixi: “Kyawabha-phe! Mwene wala bhu maku mé, maji kana ku mujibha!” 7 Kyenyiki, Satanaji watundu bhu pholo ya Jihova yu wabhangesa Jobe kukala ni mabhumbu* axixima kyavulu, tunde ku makanda a inama ndu ku mútwe. 8 Jobe waxikama ku uthôkwa, wakwata kitetu phala kudyaza.
9 Mu kusuka-ku, muhat’wê wa mwambela, wixi: “Eye wadikwatenena hanji ku ufiyele wé? Xinga Nzambi, n’ufwe!” 10 Maji Jobe wa muvutwila, wixi: “Eye wa muzwela mukwa ni muhatu wakambe kilunji. O kwila twatokala ngo kuxikina ima yambote itunda kwa Nzambi yakidi, o ima yayibha kana?” Sumbala ni ima yoso yiyi, Jobe kate kituxi, kazwela we kima kyayibha.
11 Jobe wexile ni makamba atatu. Elifaji mukwa Temane, Bidade mukwa Suwá ni Zofale mukwa Nahama. Kyoso kyevu o ima yoso yayibha yabhiti ni Jobe, kala muthu watundu bhu kididi kyê, abakana kudisanga, ya ayi mukunda Jobe phala ku mukonda o malamba ni ku muswinisa. 12 O makamba atatu exile hanji kadikanga. Katenene kumona kwila, yó Jobe. Maji kyoso kyazukama ya a mumono, amateka kudila ni dízwi dyaswina, atandula o izwatu yâ, atakula fufuta bhulu, o fufuta anga ilawukila ku mítwe yâ. 13 Kyenyiki, axikama-nê bhoxi mu sambwadi dya izuwa ni sambwadi dya usuku. Kitatu kyâ kamutangela kima, mukonda amono kwila wexile mutala hadi yavulu.