Daniyele

8 Ku muvu wa katatu wa utuminu wa Sobha Belexazale, eme Daniyele, ngamono dingi kisumwa kyengi. O kisumwa kiki ki kyadifwile ni isumwa i ngamonene kya. 2 Mu kisumwa ki ngamono, eme ngedile kala ngala mu mbonge ya Suzana* mu kibatu kya Elame. Ngamono we kala ngakexile bhu mbandu a ngiji ya Ulayi.* 3 Kyoso ki ngabhetula o mesu, ngamono kilumbe kya mbudi kyemana bhu mbandu a ngiji. Kyexile ni jingela jiyadi, o jingela jalebhele mwene! Maji lumoxi lwatundu mukwa mu kulebha. O lwabeta kulebha-phe, lwene lwasukidila-ku mu kumoneka. 4 Ngamono kilumbe kya mbudi kyexile muya ni kulenga ku mbandu ku fwila o dikumbi, ku lwiji ni ku thunda phala kubhânga ni jinguma jê. Maji séku kyama kyatena ku mutolola, o wa abhulula kamoneka. Kyexile mubhanga yoso yamesenene, o kutena kwê kwexile mudibandekesa dingi.

5 Kyoso ki ngexile mutala, kwamoneka kisutu kya hombo kya tundu ku mbandu kufwila o dikumbi, kyabhitila mu ngongo yoso, maji kikyexile mudyota bhoxi. O kisutu kiki kyexile ni lungela lwadikota bhwadiwane o mesu. 6 Kyene kyexile mulenga ni lusolo phala kubhânga ni kilumbe kya mbudi kyexile ni jingela jiyadi, kyemanene bhu mbandu a ngiji, kala ki ngamono mu kisumwa. Kyayi ni kulenga ni njinda yoso kate bhwexile o kilumbe kya mbudi.

7 Eme ngamono kyoso o kisutu ki kyazukama ku kilumbe kya mbudi, kya mukwatela njinda yavulu. Kyakwama o kilumbe kya mbudi, kya mubukula o jingela jiyadi, o kilumbe kikyexile ni nguzu ya kubhânga-nê. O kisutu kyabekula o kilumbe kya mbudi bhoxi, wa kititidila ni inama yê, u kibhulula kamoneka.

8 O kutena kwa kisutu kwayi ni kudibandekesa dingi, maji kyoso o ungana wê ki wadibandekesa, o lungela lwê lwadikota a lubukula, ku kwasabhuka jingela jiwana bhu kididi kyê, jalungile ku jimbandu jiwana ja ngongo.

9 Ku jingela jiwana, lumoxi-ku lwabhana kalungela kofele. O kalungela kaka, kayi ni kukula, ka kituka lungela lwadikota. Lwene lwalungile ku mbandu ya lwiji, ku mbandu kutundila o dikumbi, lwalungile ku Ixi ya Diwabhela. 10 Lwakulu kyavulu, lwabhixila kwexile o kifuxi kya dyulu. Lwabwisa o kifuxi kya dyulu ni jithéthembwa mu ngongo, yu wa jititidila. 11 O lungela lwakulu kyavulu, lwadisokesa ni yó Wavu o kifuxi kya dyulu. O jisata jene mubhana kwa Yó wavu o kifuxi a jitambula, abulu we o kididi kyê kikôla. 12 Mukonda dya ikuma, o kifuxi a kibhakula kumoxi ni jisata ja izuwa yoso. O kalungela kaka, kabhange yoso yatena phala kutakula o kidi bhoxi, wakibhange mwene kate kyoso kyatena.

13 Eme ngevu anju yexile muzwela: “O anju yamukwa yebhula o anju yexile muzwela: O jisata ja izuwa yoso ni ikuma ibheka o kibwikilu yamoneka mu kisumwa, yanda nangenena thembu kuxi? O kididi kikôla ni kifuxi, anda suluka ni kukidyota-dyota kate thembu kuxi?” 14 O anju yexile muzwela ya ngitambwijila, ixi: “Kate kibhita midi jiyadi ni hama jitatu ya izuwa.* O kididi kikôla anda kitungulula dingi mu ukexilu watokala kala kyexile mu ukulu.”

15 Eme Daniyele, ngexile musota o dilombolwelu dya kisumwa ki ngamono. Mu kithangana kyenyokyo, kwa ngitukulukila kima ku pholo kyedile kala muthu. 16 Kyenyiki, ngevu dízwi dya diyala dyexile mutunda mukaxi ka ngiji ya Ulayi. Mwene wadikola, wixi: “Ngabidiyele, mutangele o dilombolwelu dya ima yamono.” 17 Mwene weza bhu ngexile. Maji kyoso kyabhixila, wôma wa ngikwata, éme ngafukama ni pholo bhoxi. Mwene wa ngambela, wixi: “Mona muthu, tongolola kwila, o kisumwa kiki kyanda dikumbidila mu izuwa isukidila-ku.” 18 Kyenyiki, kyoso kyayi ni ku ngizwelesa, ngabu ni pholo bhoxi, éme ngayi ku kilu. Bhenyobho, wa ngizambesa, wa ngimanesa bhu ngexile, 19 yu wa ngambela, wixi: “Eme nganda kulondekesa o ima yanda bhita mu izuwa isukidila-ku ya njinda ya Nzambi. Mukonda o kisumwa kiki, kyanda dikumbidila mu izuwa isukidila-ku.

20 “O kilumbe kya mbudi ki wamono, kyala ni jingela jiyadi, kilombolola o jisobha jiyadi ja akwa Medya ni akwa Pélesa. 21 “O kisutu,* kilombolola o sobha ya Ngelexa. O lungela lwadikota lwexile bhwa diwane o mesu, lulombolola o sobha ya dyanga. 22 Yalungu ni lungela lwobukule, bhu kididi kyê anga bhusabhuka jingela jiwana, kwanda kala mautuminu awana anda tunda mu kifuxi kyê. Maji kanda sokela ni mwene mu kutena.

23 “Kyoso kyanda zukama o dizubhilu dya mautuminu yá, ni kyoso kyanda tenena o kuyibha kwa akwa ituxi, kwanda tukuluka sobha yayibha, wala ni uhete wa kunganala akwâ.* 24 Mwene wanda kala ni ungana wadikota, maji ki mukutena kwê. Mwene wanda bwika ima yavulu yanda bhangesa o athu kudiwana, wanda zediwa mu yoso yanda bhanga. Wanda tolola o athu ala ni kutena, wanda tolola we yó a asolo. 25 Mu kudimuka kwê, wanda tanga makutu phala kuzediwa. Wanda dizangeleka, mu kithangana kya kutululuka wanda bwika athu avulu. Mwene wa kà balukila o Ngana ya jingana, maji a kà mutolola, kikwanda bhinga kikwatekesu kya muthu.

26 “Yoso i wevu mu kisumwa yalungu ni midi jiyadi ni hama jitatu a izuwa,* kidi mwene. Maji kikutu hanji, kana ku kitangela muthu, mukonda kya mulombolola ima yanda bhita ngo ku hádya.”

27 Eme Daniyele ngatohokele, ngexile izuwa yavulu mu hama ni kukata. Kyoso ki ngadisanze, ngamateka dingi kukalakalela o sobha. Maji o ima i ngamono mu kisumwa ya ngitandanganyesa kyavulu. Kikumoneka muthu kya mutetulukila.