Mukanda wa Dyanga ku Akwa Kolindu

5 Ngevu kwila, bhukaxi kenu bhwala diyala wene muzeka ni muhatu wa tat’ê. O undumbu yú,* wa betakota, o wene mubhanga o athu ka mubheza Nzambi,* ndenge. 2 Enu mwa sanguluka mukonda dya kituxi kiki? Ki mwa tokalele kuluwala ni kukatula mwaxaxi kenu o diyala wate o kituxi kiki? 3 Sumbala kingala kumoxi ni enu, maji mwa ngikala mwene ku muxima.* O diyala wate o kituxi kiki, eme nga mu fundisa kyá, kala ngala bhwamoxi n’enu. 4 Kyoso kimwanda dyongeka mu dijina dya Ngana Jezú, mu kwijiya kwila ngala ni kutena kwa Ngana Jezú, ni kwila ngibanza o maka menu,* 5 bhakulenu o diyala didi kwa Satanaji, phala kubhwisa* o ukexilu yú wayibha mu kilunga, phala o kilunga kilondekese ukexilu wambote mu kizuwa kya Ngana.

6 O kudinanza kwenu ki kwa fwama. Enu ki mu kijiya kwila, felemendu yofele ifutununa o fuba yoso ya tiliku yofunge ni menya? 7 Kyenyiki, katulenu o felemendu yokulu, phala mu kale mu fuba ya ubhe yofunge ni menya sé felemendu, mukonda kyene ki mwala kyá. Kuma Kidistu, o kambudi ketu ka Phasu, a mu satela kyá. 8 Kyenyiki, ki tubhange o fesa yiyi ni felemendu yokulu, mba felemendu ya ituxi ni kuyibha. Maji tu ibhange ni jimbolo ja kambe felemendu, ja kuyuka ni kidi.

9 Nga misonekena mu mukanda wami phala ki mu dilunge ni yó akwa kubhanga o undumbu,* 10 kiki ki kilombolola kwila ki mutokala kudilunga ni athu oso mu ngongo abhanga o undumbu,* akwa lwimbi, miyi, mba akwa kubheza o iteka. Se kiki kyeji bhita, enu mwa tokalele kutunda mu ngongo. 11 Maji kindala nga mu misonekena kwila, se sayi phange ukala mukwa kubhanga undumbu,* mukwa lwimbi, mubhezi wa iteka, mukwa kuxinga akwâ,* hôlwa, mba mwiyi, ki mu dilunge nê, né ngó kudya n’ê kumoxi. 12 K’eme ngatokala kufundisa yó kala mukilunga. Maji énu mwatokala kufundisa o athu ala mu kilunga. 13 O yó-phe kala mu kilunga, Nzambi ki mwéne u afundisa? Kyenyiki, o Mikanda Ikôla yamba: “Katulenu o muthu wayibha mwaxaxi kenu.”