Mikeya
1 Kiki kyene o kizwelu kya Jihova, kyatambula Mikeya* mukwa Mosekate mu kisumwa kyalungu ni Samadiya ni Jeluzaleme, mu izuwa ya Jotamu, Akaji ni Ezekiya, o jisobha ja Judá:
2 “Ivwenu, enu mu ifuxi!
Bhana mátwi, eye u ixi ni ima yoso yala-mu,
Jihova wala mu tembulu yê ikôla.
O Ngana, Jihova Sukeku wanda mifundisa, tunde mu tembulu yê.
3 Talesenu! Jihova wanda tunda mu kididi kyê.
Mwene wanda tuluka, wanda dyota ku thandu a milundu a ixi.
4 O milundu yanda sengumuka* bhoxi dya inama yê,
O jihonga janda diwanuna,
Kala o banya kya ita mu túbhya,
Kala o menya kyakungulukila mu dikenye.
5 Ima yoso yiyi, yanda bhita mukonda dya kubhukumuka kwa Jakobo,
Ni mukonda dya ituxi ya mwiji wa Izalayele.
Nanyi wabhangesa Jakobo kubhukumuka?
Ki akwa Samadiya?
Nanyi watungu o ididi ya kubhezela o iteka mu Judá?
Ki akwa Jeluzaleme?
6 Nganda bhangesa Samadiya kukituka ngundu,
Yanda kala kididi kya kukuna-mu jiuva,
Matadi mê nganda ku atakula mu honga.
Yene nganda ibwika, kwanda xala ngo o kaboko.
7 O iteka yê yoso anda ibwika,
O maujitu oso atambula mwéne kala futu,* anda kwa oha mu túbhya.
Nganda bwika o iteka yê yoso.
Mukonda o ima yiyi wa isumbu ni kitadi kya undumbu,
O ima yenyiyi, anda yambata phala kufuta-nayu ahatu a undumbu mu kididi kyengi.”
8 Mukonda dya kiki, nganda kala ni dilamba, nganda dila,
Nganda kwenda ni makanda ahatu ni thuxi.
Nga ka dita mutendu kala kibhanga o makombe,
O kukema kwami kwanda difwangana ni kwa ngongolo.*
9 Mukonda o fidila ya Samadiya katena dingi ku itumba,
Yene ya dimwange kate ku Judá.
O dibhebhu dyatula kate bhu mwelu wa Jeluzaleme, o kididi mwatungu o mundu wami.
10 O maka yá ki mu atange mu Ngate,
Kanenu kudila.
Enu mu akwa Bete-Afa,*difubujulenu mu fufuta.
11 Sulukenu mukwenda ni thuxi, jisonyi jimikwate, enu mwatungu mu mbanza ya Safídya.
O athu atungu ku Zanane, katena kutunda-ku.
Ku Betezele, kwanda kala dilamba, o mbanza yiyi kiyanda mikwatekesa dingi.
12 O athu akwa Malote exile mukingila ku abhanga mbote,
Maji o divuwa dyatundu kwa Jihova dyatula bhu mwelu wa Jeluzaleme.
13 Enu mu akwa Lakiji, kutenu o jikabalu ku makalu.
O kituxi kya mon’a Ziyone kyamatekena kokwenu,
Mukonda o kutondala kwenu, kwene kumoxi ni kutondala kwa Izalayele.
14 Mukonda dya kiki, mwanda bhana maujitu a kudilekela mu mbanza ya Mosekate.
O akwa Akezibe, a nganala o jisobha ja Izalayele.
15 Nganda bhakula hanji o ixi ya Malesá bhu maku a jinguma.
O fuma ya Izalayele yanda bhixila ku Adulamu.
16 Bhutenu o ndemba, kololenu o mítwe yenu, mukonda dya an’enu u mwazolo.
Kalenu ni dibhala kala o sanji* ya kometa,
Mukonda an’enu a ambata dikanga, ya a akwikila mu ixi yengi.”