Ajewu
1 Ku muvu wa kayadi wa utuminu wa sobha Dályu, mu mbeji ya kasamanu mu kizuwa kya dyanga kya mbeji yiyi, o nguvulu ya Judá Nzolobabele mon’a Salatiyele, ni mukunji wadikota Jozuwé mon’a Jehozadake, atambula njimbu ya polofeta Ajewu* yatundu kwa Jihova, yambe:
2 “Jihova dya ifuxi wambe kiki: ‘O mundu yú wa mukwila, exi: “O kithangana kya kutunga* o inzo* ya Jihova kikibhixila luwa.”’”
3 Jihova watumu polofeta Ajewu kutangela o mundu, wixi: 4 “O kwila kiki kithangana kya kukala mu jinzo jenu jimwafwamesa kyambote, maji o inzo yami ixala kiphulungunzu kyahatu? 5 Jihova dya ifuxi wambe kiki: ‘Xinganekenu kyambote mu ima i mwa mubhanga. 6 Enu mukuna jimbutu javulu, maji idima i mubhongolola yatolo. Mudyenu mwene, maji kimwikutenu. Munwenu mwene, maji dinyota dyenu kidibhu. Muzwatenu mwene, maji mbambi yenu ki ibhu. O yó u kalakala, futu yê u ibhaka mu saku ya kubuka.’”
7 “Kiki kyene kyambe Jihova dya ifuxi: ‘Xinganekenu kyambote mu ima i mwa mubhanga.’
8 “Jihova wambe: ‘Bandenu ku mulundu mwize-ku ni mabaya. Tungenu inzo i ngisangulukisa, i ngibhekela fuma.’”
9 “‘Enu mwexile mukingila kubhongolola ima yavulu, maji o idima i mwabhongolola yatolo. Kyoso ki muyambata mu jinzo jenu, ngehela o kitembwe ku yambata. Mukonda dyahi?’ Jihova dya ifuxi wambe: ‘Mukonda o inzo yami yala kiphulungunzu kyahatu, maji enu-phe mwatandanganya ngo ni kulanga o jinzo jenu. 10 Kiki kyene kyabhangesa kwila, ku dyulu kikulawuke mbundu ni kukale dimume, o mavu kabhane o idima yê. 11 Eme ngabheka hamba mu ixi ni ku milundu, i yabhangesa kukamba kudya, vinyu ya ubhe, máji ni idima. Enu ni ibhaku yenu, mwa mutala hadi. Enu mwa mukalakala mu kingoho.’”
12 Nzolobabele mon’a Salatiyele ni mukunji wadikota Jozuwé mon’a Jehozadake ni mundu woso, abelesela yambe Jihova Nzambi yâ ni izwelu ya polofeta Ajewu, mukonda Jihova Nzambi yâ wa mutumikisine. O mundu wamateka kuxila Jihova.
13 Kyenyiki, Ajewu o mukunji wa Jihova, wambela o mundu o maka oso a mutendelesele Jihova, wixi: “Jihova wambe: ‘Eme ngala ni enu.’”
14 Jihova wabhangesa Nzolobabele mon’a Salatiyele o nguvulu ya Judá ni Jozuwé o mukunji wadikota, mon’a Jehozadake, kumateka o kikalakalu kya kutunga o inzo ya Jihova dya ifuxi, Nzambi yâ. 15 Kiki kyabhiti mu kizuwa kya makwinyi ayadi ni kiwana kya mbeji ya kasamanu, ku muvu wa kayadi wa utuminu wa sobha Dályu.