Dimatekenu
33 Jakobo wabhetula o mesu anga u mona Izawú wexile mu bhixila kumoxi ni kibuka kya hama jiwana ja mayala. Kyenyiki, wa wanuna mu ibuka-ibuka o twana twa Leya, twa Lakele ni twa jiselevende jâ jiyadi ja ahatu. 2 Wate o jiselevende ni twana twâ ku pholo, ku dima dyê wate Leya ni twana twê, Lakele ni Zuze wa ate ku disukilu. 3 Kyenyiki, mwene wabhiti ku pholo dyâ, wabhetama ni pholo bhoxi lusambwadi, mu kuzukama bhwa kexile phang’yê.
4 Maji Izawú wayi ni kulenga phala kudisanga-nê. Wa mundwakuna, wa mubhana nzobole, ene anga amateka kudila. 5 Kyoso Izawú kya bhetula o mesu, wamono o ahatu ni twana yu wambe, wixi: “Yá ananyi ala kumoxi n’eye?” Jakobo wa mutambwijila: “O ana abhana Nzambi kwa selevende yé.” 6 O jiselevende ni twana twâ azukama, anga abhetama ni pholo bhoxi, 7 Leya ni twana twê azukama we ya abhetama ni pholo bhoxi. Mukusuluka, Zuze ni Lakele azukama ya abhetama ni pholo bhoxi.
8 Izawú webhwidisa: “Ihi i wamesena mu ku ngitumikisa o mundu woso yú, ni ibhaku yoso yiyi?” Mwene wa mutambwijila: “Ngamesena kusanga ngalasa ku mesu mé ngana yami.” 9 Bhenyobho Izawú wambe: “Ngala ni jimbote javulu phang’yami. Yoso i wala-nayu bhake-yu.” 10 Kyenyiki, Jakobo wambe wixi: “Ngakudyondo, se ngasange ngalasa ku mesu mé, xikina o ujitu wami, mukonda nga u bheka phala kumona o pholo yé. Kumona o pholo yé kyedi kala ngamono o pholo ya Nzambi, mukonda eye wa ngitambulula kyambote. 11 Ngakudyondo, xikina o ujitu u ngakubhekela mukonda Nzambi wa ngibesowala, ngala ni yoso i ngabhindamena.” Mwene wasuluka ni ku mujijidika kate Izawú kya xikina.
12 Mukusuluka Izawú wa mwambela: “Tuyetu kya, nganda kutwamenena.” 13 Maji mwene wa mwambela, wixi: “Ngana yami, eye wejiya kwila o ana ndenge kala ni nguzu yavulu. Nga mukwambata we jimbudi ni jingombe jamukwamwisa. Se ngijendesa ni nguzu ni lusolo, né mwene mu kizuwa kimoxi ngo, ibhaku yoso yanda fwa. 14 Ngakudyondo ngana yami, ndé ku pholo dya selevende yé, maji eme nganda suluka o njila yami bhofele-bhofele, mu kukayela o wendelu wa ibhaku ni wa ana ndenge, kate ki nganda bhixila kwa ngana yami ku Seyile.” 15 Izawú wambe wixi: “Ngakudyondo ngehele ngi kuxile mayala a ngitokala.” Mwene wa tambwijila wixi: “Kikubhingye. Kusanga o ngalasa ku mesu a ngana yami, kwa ngisoko kya.” 16 Mu kizuwa kyenyokyo-phe, Izawú wavutuka ku Seyile.
17 Jakobo wayi kate ku Sukote anga u tunga-ku inzo phala mwene, ni ididi phala o ibhaku yê. Kididi kyokyo kyene kya kilukila o dijina dya Sukote.*
18 Kyoso kya tundu ku Padalane, Jakobo wabhixila kyambote ku Xikeme mu mbanza ya Kanana. Mwene anga u ta o kibangu kyê bhwa zukama ni mbanza. 19 Mwene wasumbu mbandu ya kibhela ku twana twa Hamolo tata ya Xikeme, mu hama ya itadi ya phalata, kwatudile o balaka yê. 20 Mwene anga u tunga kalatódyu bhenyobho, wakaluku Nzambi, o Nzambi ya Izalayele.