Dya Kayadi Dya Malunda
19 Maji Jozafate sobha ya Judá, wavutuka kyambote ku bhata dyê, mu Jeluzaleme. 2 Jehú mon’a Hanani, o mukwa kumona o isumwa,* wayi kwa sobha Jozafate yu wa mwibhwidisa: “Mukonda dyahi eye wakwatekesa o athu ayibha? Mukonda dyahi wazolo o athu azembe Jihova? Mukyenyiki-phe, Jihova waluwala n’eye. 3 Maji, Nzambi wamono hanji ima yambote ku muxima wé, mukonda wabulu o iteka mu ixi, wasolo we kusota o Nzambi yakidi.”
4 Jozafate wasuluka mu kutunga mu Jeluzaleme. Mwene wayi ku Beleseba ni ku mbandu ya milundu ya Efalayíme, phala kuswinisa o mundu kubheza dingi Jihova, o Nzambi ya jikuku jâ. 5 Mwene we wate afundixi mu ixi yoso, mu jimbanza joso jala ni ilumbu mu Judá. 6 Mwene wambela o afundixi: “Xinganekenu kyambote o ima i mwa mubhanga, fundisenu mu dijina dya Jihova, kanenu kufundisa mu dijina dya muthu. 7 Kindala kalenu ni wôma wa Jihova, dilangyenu ni ima i mubhanga, mukonda Jihova Nzambi yetu mukwa kufundisa ni kuyuka, kimukwa katombo, kaxikina maujitu a athu amesena ku alungisa.”
8 Mu Jeluzaleme, Jozafate wasolo-mu Jilevita, akunji ni atwameni a miji ya Izalayele phala kukala afundixi a Jihova, n’a batule o madimanda a athu atungu mu Jeluzaleme. 9 Mwene wa atendelesa, wixi: “Mu kufundisa, xilenu Jihova, mu sidivilyenu ni ufiyele woso ni muxima woso. 10 Se o jiphange jenu atungu mu jimbanza jengi, eza ni maka a muthu a mujibha, maka a kubhukumukina kitumu, kijila mba jingonge, enu mwatokala ku abazela phala ene kakale ni kikuma kwa Jihova. Kiki kyene ki mwatokala o kubhanga phala kimukale ni kikuma. Se kimukibhange, mwene wanda luwala kyavulu n’enu ni jiphange jenu. 11 O mukunji wadikota Amadiya, mwene wanda kala ku pholo mu maka oso alungu ni ikalakalu ya Jihova. Zebadiya mon’a Ijimayele mwene wanda kala ku pholo mu inzo ya Judá, mu maka oso alungu ni sobha. O Jilevita anda kala jikabhitangu. Swinenu, bhangenu kyenyiki. Jihova wanda kwatekesa yó abhanga ima yambote.”