Jobe
26 Jobe wavutula, wixi:
2 “O muthu wakambe o kutena, kyene ki u mukwatekes’iki?
Wafika kwila kyene ki ubhulula o muthu wakambe nguzu?
3 Eye wafika kwila wabhana jindunge jambote kwa yó wakambe unjimu?
O kwila walondekesa mwene unjimu?
4 Eye wa mufika kwila wa muzwela ni nanyi?
O ima i wa muzwela nanyi wa kulongo-nayu?
5 O madifundu a muteketa mukonda dya kutena kwa Nzambi.
Ene ala dingi koxi, o menya a musanza wa kalunga ni yoso yala-mu, ndenge.
6 Mu mbila* séku kima katena kukimona kwa Nzambi,
O kididi bhu bolela o kimbi, mwene u kimona.
7 Mwene wazale o dyulu bhwakambe kima,
O ixi wa izenzamesa bhwakambe kima.
8 Mwene wizalesa o matuta ni menya,
Maji o matuta kabaze mukonda dya kunema kwa menya.
9 O kyandu kyê,
U kixita ni matuta.
10 Mwene wate mbambe bhukaxi ka musanza wa kalunga ni dyulu,
Wa wanuna o mukengeji ni kuvunda.
11 O jingunji ja dyulu jiteketa,
Kyene, jiteketa kyoso mwene kyazwela.
12 Mwene utungutisa o musanza wa kalunga ni kutena kwê,
Ubwika Lahabe* ni kwijiya kwê.
13 Mwene uzelesa o dyulu ni kitembwe,
Ujibha o nyoka ilenga ni lusolo ni lukwaku lwê.
14 Tutu tu ima ngo mu yoso yabhange mwene.
O ima itwene mu kwivwa yalungu ni mwene, yofele-fele.
Nanyi-phe utena kutongolola o kutena kwa Nzambi, kyoso nzaji ki ibaza?