Daniyele
2 Ku muvu wa kayadi wa utuminu wê, Nabukodonozolo waloto jinzoji, o jinzoji ja mu tandanganyesa kyavulu, walembwa kukwata kilu. 2 O sobha watumu kwixana o akunji abhanga ipheteka ya wanga, o akwa kuzambula, o aloji ni akwa Kaladeya,* phala ku mutangela o jinzoji ja loto. Kyenyiki, ene abokona ya emana bhu pholo ya sobha. 3 O sobha wa ambela, wixi: “Ngaloto nzoji. Ngatandanganya kyavulu mukonda ngamesena kwijiya o nzoji i ngaloto.” 4 O akwa Kaladeya atambwijila o sobha mu dimi dya Alamayiku, exi: “Ngana yetu u sobha, kola mwenyu! Tutangele o nzoji i waloto ni tu kulombolwela-yu.”
5 O sobha wambela akwa Kaladeya, wixi: “Nganda zwela ngo lumoxi: Se mukamba ku ngitangela o nzoji ni dilombolwelu dyê, anda misasujula! O jinzo jenu anda jikitula maxidixilu phala o mundu.* 6 Maji se mu ngitangela o nzoji anga mu ilombolola, nganda mibhana maujitu avulu ni kijingu kyadikota. Kyenyiki, ngitangelyenu o nzoji ni dilombolwelu dyê.”
7 Ene avutwila dingi o sobha, exi: “Ngana yetu u sobha, tutangele o nzoji i waloto, etu twanda kutangela o dilombolwelu dyê.”
8 O sobha wambe, wixi: “Ngejiya kwila, enu mwa mufunya ngo ndunge ya ku ngilandukisa, mukonda mwejiya kwila kinganda bhitulula dingi o ima i nga mitangela kya. 9 Se ki mu ngilombolwela o nzoji, kwala ngo kima kimoxi kyanda bhita ni enu, o kastiku. Maji mwabakana ku ngitangela makutu phala ku ngidyodya. Mwa mukingila kwila, o ima ilunguluka. Kyenyiki, ngitangelenu o nzoji ni ngijiye kwila mwanda tena ku ilombolola.”
10 O akwa Kaladeya atambwijila o sobha, exi: “Séku muthu mu ngongo utena kubhanga o kima kya mubhinga o sobha, mukonda kikwexile luwa sobha mba nguvulu wabhingile o kima kiki ku akunji abhanga o ipheteka ya wanga, ku akwa kuzambula ni ku akwa Kaladeya. 11 O kima kya mubhinga o sobha kyabhonzo kyavulu, séku muthu utena ku kulombolwela-kyu, kikale o jinzambi ngo. Maji-phe, ene kala bhabha phala ku kulombolwela-yu.”
12 Mu kwivwa maka yá, sobha njinda ya mukwata. Kyenyiki, watumu kujibha o jinjimu joso mu Babilonya. 13 Kyoso kyabhana o ngonge, o makwenze a sobha atundu phala kujibha o jinjimu joso. Asoto we Daniyele ni makamba mê phala ku ajibha.
14 Kyenyiki, Daniyele ni unjimu ni kuxila kwoso, wazwela ni Adiyoko, o kabhitangu ka alangidi a sobha, wexile muya mujibha o jinjimu ja Babilonya. 15 Mwene webhula kwa Adiyoko, o kabhitangu ka alangidi a sobha, wixi: “Mukonda dyahi o sobha wabhana o kitumu kiki kyayibha?” Bhenyobho, Adiyoko wajimbulula o maka kwa Daniyele. 16 Daniyele wayi-phe muzwela ni sobha, wixi: “Sobha ngana yami, ngakudyondo, ngibhane dingi kithangana, phala ngitene kulombolola o nzoji yé.”
17 Mukusuluka, Daniyele wayi ku bhata yu watangela ku makamba mê Hananiya, Mizayele ni Azadiya, o ima yabhitile. 18 Daniyele wa abhingi phala kudyonda kwa Nzambi ya dyulu n’a a jimbulwile o nzoji, phala mwene ni makamba mê ka ajibhe kumoxi ni jinjimu ja Babilonya.
19 Mu usuku wenyó, Daniyele a mujimbulwila o nzoji mu kisumwa. Mukiki, Daniyele waximana o Nzambi ya dyulu. 20 Daniyele wambe:
“O dijina dya Nzambi adiximane kate ku hádya ni hádya,
Mukonda mwéne ngo wala ni unjimu ni kutena.
21 Ulungulula o jithembu ni ithangana,
Utulula o jisobha ku ungana mba u atudika-ku,
Ubhana unjimu ku jinjimu, ubhana we kwijiya kwa yó atongoloka.
22 Eye ujimbulula o ima yabhonzo, utungununa o ima yosweke,
Wejiya o ima yala mwavundu,
O mukengeji utunda kokwé.
23 Nga mu kusakidila ni ku kuximana eye u Nzambi ya jikuku jami,
Mukonda wa ngibhana unjimu ni kutena,
Kindala wa tujimbulwila yoso i twa kubhingi,
Wa tujimbulwila o nzoji ya mutandanganyesa o sobha.”
24 Bhenyobho, Daniyele wayi musota Adiyoko, a mutumine kujibha o jinjimu ja Babilonya kwa sobha, wa mwambela, wixi: “Kujibhe luwa muthu ku jinjimu ja Babilonya. Ngambate kwa sobha, nganda mujimbulwila o nzoji.”
25 Adiyoko-phe wambata Daniyele kwa sobha ni lusolo, yu wambe, wixi: “Mwaxaxi ka Jijudé jitwakwika, ngasange-ku muthu utena kulombolola o nzoji ya sobha.” 26 O sobha webhula Daniyele a mulukile o dijina dya Beltexazale, wixi: “O kwila eye utena mwene ku ngitangela o nzoji i ngaloto ni dilombolwelu dyê?” 27 Daniyele watambwijila o sobha, wixi: “Séku njimu, mukwa kuzambula, mukunji ubhanga ipheteka ya wanga, mba mukwa kuzambula bhukaxi ka jithéthembwa, utena kulombolola o nzoji yiyi kwa sobha. 28 Maji sayi Nzambi ku dyulu mukwa kutungununa o ikutu. Mwene watungununa kwa sobha Nabukodonozolo, o ima yanda bhita ku disukilu dya izuwa yasukidila-ku. O nzoji ni isumwa i wamono kyoso ki wexile muzeka bhu hama yé, yenyiyi:
29 “Sobha, kyoso ki wexile bhu hama yé, wanjuwa o ima yanda bhita ku hádya. O Nzambi mukwa kutungununa o ikutu, wa kwijidisa yanda bhita. 30 O kikutu kiki, ka ngitungununa-kyu mukonda eme ngabetakota mu unjimu, athu oso ndenge. Maji a kibhange phala eye u sobha, wijiye o dilombolwelu dya nzoji i waloto.
31 “Sobha ngana yami, mu nzoji i waloto, wamono kiteka kyonene. O kiteka kiki, kyexile musedima, kyemanene bhu pholo yé. Mu kukimona, kikwatesa wôma. 32 O mútwe wa kiteka kyenyokyo, wexile wa ulu yambote. O phetu ni maku, exile a phalata. O mala ni matabela, exile a ngondo. 33 O inama yê yexile ya felu, o makanda a inama edile o kuku felu, o kuku utuma. 34 Ngana yami, kyoso ki wayi ni kutala o kiteka, abumuna ditadi ku mulundu. O ditadi didi dyatula ku inama ya kiteka kyedile o kuku utuma, o kuku felu, i yasasujuka. Maji o lukwaku lwadibumuna kilumoneka. 35 Bhenyobho, o felu ni utuma ni ngondo ni phalata ni ulu, a itutujula mu lumoxi, mukwa ni ibhyate iphephuluka kyoso kyabhyata o jimbutu mu kixibhu. A kyambata ku kitembwe, kikuxala kima. Maji o ditadi dyatutujula o kiteka, dyakituka mulundu wadikota, wa vungina o ixi yoso.
36 “Sobha ngana yami, yiyi yene o nzoji i waloto. Kindala twanda kutangela o dilombolwelu dyê. 37 Eye sobha ngana yami, u sobha ya jisobha. O Nzambi ya dyulu wa kubhana ungana, kutena, nguzu ni kijingu. 38 Mwéne wa kubhana o ungana wa kutumina o athu, kabasa o kididi bhwa tungu. Wa kubhana we o ungana wa kutumina o yama ya mukáwu ni jinjila. Kyene mwene! Wa kubhana o ungana wa ku atumina enyoso. O mútwe wa ulu, éye mwene u sobha, ngana yami.
39 “Kyoso ki wanda tunda ku ungana, kwanda kubhingana utuminu wamukwa wala ndenge, o wé-eye kota. Kwa kèza utuminu wengi wa katatu, wa ngondo, wanda tumina o ngongo yoso.
40 “O utuminu wa kawana, wanda kala ni nguzu mukwa ni felu. O utuminu yú wanda tutujula o mautuminu oso yá, mukwa ni felu ki itutujula o ima yoso.
41 Kala ki wamono mu nzoji ngana yami, o inama ni milembu ya inama yedile, o kuku utuma,* o kuku felu, o utuminu wanda diwanuna. Maji-phe, mbandu ya utuminu yú wanda kola mukwa ni felu. Kyene ki wamwena kwila o felu yadifungisa ni utuma. 42 O milembu ya inama yedile o kuku ya felu, o kuku ya utuma, ilombolola kwila, o utuminu yú wa kèla, o ku mbandu kuku waswina, o ku mbandu yamukwa wabotomoka. 43 Kala ki wamono o felu yadifungisa ni utuma, ngana yami, ene anda dibunda kumoxi ni mundu. Maji kanda divwa, kala o felu ki idifungisa ni utuma.
44 Kyoso o jisobha jiji ki jandaya hanji ni kutumina, o Nzambi ya dyulu wanda bheka utuminu wanda nangenena. O utuminu yú kanda ubhingana ku jinguvulu ja ifuxi yengi. Wanda sasujula ni kubwika o mautuminu oso yá. Wene ngo wanda tumina kate ku hádya ni hádya. 45 Kala ki wamono mu nzoji, sobha, abumuna ditadi ku mulundu, maji o lukwaku lwadibumuna kilwamoneka, dyatutujula o felu, o ngondo, o utuma, o phalata ni ulu. O Nzambi Muteni wa Yoso wajimbulula kwa sobha, o ima yanda bhita ku hádya. O ima i wamono mu nzoji, yanda dikumbidila, o dilombolwelu dyê dya kidi mwene.
46 Bhenyobho, sobha Nabukodonozolo wafukamena Daniyele ni pholo bhoxi, yu wa muximana. Watumu ku mubhekela ujitu ni wasu unuha kyambote. 47 O sobha wambela Daniyele, wixi: “Ni kidi kyene, o Nzambi yenu, Nzambi ya jinzambi, Ngana ya jisobha, Mukwa Kutungununa o ikutu, mukonda mwene wa kukwatekesa ku ngijimbulwila o nzoji.” 48 Kyenyiki, o sobha wazangeleka Daniyele yu wa mubhana maujitu avulu. Wa musolo phala kukala nguvulu ya kibatu kya Babilonya, yu wa musolo we phala kukala mutwameni wa jinjimu joso ja Babilonya. 49 Daniyele wabhingi kwa sobha phala kubhana o kikalakalu kya kwendesa o mbanza ya Babilonya kwa Sadalake, Mizake ni Abedeneku. Maji Daniyele wasuluka ni kukalakala mu inzo ya sobha.