Jobe

1 Mu ixi ya Uze, mwexile muthu amwixanene Jobe.* Mwene wexile mukwa kidi,* wexile mubhanga ima yayuka, wexile we muxila Nzambi, kexile mubhanga ima yayibha. 2 Jobe wexile ni an’a sambwadi a mala ni an’a atatu a ahatu. 3 Mwene wavwile sambwadi dya midi ya jimbudi, midi jitatu ja jikamelu, midi ya jingombe* ni hama jitanu ja jijumendu ja akaji. Wexile we ni akalakadi avulu. Mwéne wabetele kota mu kukala ni umvwama athu oso atungile mu ngongo ku mbandu kutundila o dikumbi, ndenge.

4 O an’ê a mala exile ni kifwa kya kubhanga fesa, lelu monzo ya yú, mungu monzo ya yó, kala muthu ni kizuwa kyê. Exile mukwixana o jiphange jâ jitatu ja ahatu phala kudya ni kunwa-nawu kumoxi. 5 Jobe anga uya ni kwila, kyoso ana oso kyazubha kubhanga o jifesa, wa exana phala ku azelesa. Mwene wexile mubalumuka mu kamene-mene phala kubhakula jisata jakwoha kala kyasoko o dyalwilu dya an’ê, mukonda Jobe wexile muxinganeka: “Nange an’ami ku mixima yâ ate kituxi, azwela ima yayibha yalungu ni Nzambi.” Kiki kyene kyexile mubhanga Jobe.

6 Sayi kizuwa, o jianju* jadibhongolola bhu pholo ya Jihova, Satanaji weza we mwaxaxi kâ.

7 Jihova webhula Satanaji: “Wa mutunda kwebhi?” Satanaji wavutwila Jihova, wixi: “Ngexile munyunga mu ngongo ni ku itonginina.” 8 Jihova webhwidisa Satanaji, wixi: “Mubhik’ami Jobe wa mumono? Mu ngongo kimwala muthu wasokela-nê. Mwene mukwa kidi, wene mubhanga ima yayuka, uxila Nzambi, kene mubhanga ima yayibha.” 9 Bhenyobho, Satanaji wavutwila Jihova, wixi: “O kwila Jobe wa muxila Nzambi mu kingoho? 10 Eye kwene mu mulanga mu ima yoso? Kyedi kala watungu kilumbu phala kulanga o dibhata dyê ni ima yoso yala-nayu. Wazediwisa o kikalakalu kya maku mê, o ibhaku yê yadisokolola mu ngongo. 11 Maji-phe zangula hanji o lukwaku lwé, mukatule yoso yala-nayu, umone se kanda kubhukumukina!” 12 Jihova-phe wavutwila Satanaji, wixi: “Kyawabha! Ima yoso yala-nayu mwene yala bhu maku mé. Bhanga yoso i wamesena, maji mwene-ku ku mubhange kima!” Bhenyobho, Satanaji watundu bhu pholo ya Jihova.

13 Sayi kizuwa, o an’a Jobe a mala ni a ahatu, exile mudya ni kunwa vinyu kumoxi mu inzo ya kota dyâ, o kitwamena,* 14 kwabhixila-phe mubhidi kwa Jobe ni njimbu, wixi: “O jingombe jexile mudima,* o jijumendu jexile mudila bhu mbandu a jingombe, 15 kyoso Jisabewu kyabhixila, a jijibha ya a jambata. Ajibha we o abhidi oso ni xibhata, éme ngo ngasubhuka-ku phala ku kutudila o njimbu yiyi.”

16 Kyoso o mubhidi wa dyanga kyayi ni kuzwela, kwabhixila mubhidi wengi, wixi: “Ku dyulu kwatundu túbhya* twa Nzambi, twoha o jimbudi ni abhidi kate kyabwila, éme ngo ngasubhuka-ku phala ku kutudila o njimbu yiyi.”

17 O mubhidi wa kayadi kiluwa ngo atula o kuzwela, kweza mubhidi wengi, wixi: “Akwa Kaladeya adiwane mu ibuka itatu, atambula o jikamelu, ya a jambata. Ajibha we o abhidi oso ni xibhata, éme ngo ngasubhuka-ku phala ku kutudila o njimbu yiyi.”

18 Kyoso mubhidi yú kyayi hanji ni kuzwela, kwabhixila dingi selevende yamukwa, yu wambe, wixi: “An’é a mala ni an’é a ahatu, exile mudya ni kunwa vinyu kumoxi mu inzo ya kota dyâ, o kitwamena. 19 Bhenyobho, twatukumuka kwabhuka kitembwe kyanguzu kyatundu mu kikangalakata, kyalundumuna o inzo. O inzo yabwila ku thandu dya an’é, ya afu. Éme ngo ngasubhuka-ku phala ku kutudila o njimbu yiyi.”

20 Kyenyiki, Jobe wabalumuka, watandula o kizwatu kyê, wakolola o mútwe, wadibekula bhoxi, wafukama, 21 yu wambe:

Jihova wabhana, Jihova wakatula.

O dijina dya Jihova, a diximane jinga.”

22 Sumbala ni ibhidi yoso yiyi, Jobe kate kituxi, katatela we kima kyayibha kwa Nzambi.