Jobe
34 Elihu-phe wasuluka ni kuzwela, wixi:
2 “Ngivwidilenu, enu mwejiya o ima yavulu.
Ngivwidilenu mwene kyambote, enu mwatongoloka.
3 Mukonda o dítwi dilola o izwelu,
Kala o dimi ki dilola o kudya.
4 Tusolenu kumoxi,
Yebhi o ima yambote, yayuka.
5 Mukonda Jobe wambe: ‘Eme ngalungwami,
Maji Nzambi kangifundisa ni kuyuka.
6 O kwila ngeji tanga makutu ni kuzwela kwila ngala ni kikuma?
Sumbala kingate kituxi, nga mutala mwene hadi yavulu.’
7 Muthu webhi wadifwangana ni Jobe,
Uxikina o lusebhu kala muthu wa munwa menya?
8 Mwene wa mudilunga ni akwa phulu,
Yu wa mukwenda ni athu ayibha.
9 Mukonda mwene wambe: ‘O muthu kamono mbote ya kima,
Mu kusota kusangulukisa Nzambi.’
10 Kyenyiki, ngivwidilenu enu mwatongoloka.
O Nzambi yakidi kabhange kima kyayibha,
O Muteni wa Yoso kate kituxi.
11 Mwene wanda besowala o muthu kala kyafwama o ibhangelu yê,
Wanda fundisa o muthu kala kyafwama o wendelu wê.
12 Mukidi, Nzambi k’ene mubhanga ima yayibha,
O Muteni wa Yoso ufundisa ni kuyuka.
13 O kwila sayi muthu a mubhana o kutena,
Kwa kutumina o ngongo ni yoso yala-mu?
14 Se mwene wa dikwatenene mu ima ibhanga o athu,
Anga u akatula o munza wa mubhwima,
15 O athu oso ejifwa kumoxi,
O mundu woso weji kituka thuku.
16 Maji se u muthu watetuluka, bhana mátwi,
Ivwidila kyambote o ima i nganda zwela.
17 O kwila o muthu wazembe o kidi utena kutumina?
O kwila weji belesa o muthu wayuka, wala ni kutena?
18 O kwila weji kwambela o sobha, wixi: ‘Eye u muthu wayibha?’
Weji kwambela o ilamba: ‘Enu mu athu ayibha’?
19 Nzambi kene ni katombo ka ilamba,
Kabeta kubhana maujitu ku mvwama, o ngadyama ndenge,
Mukonda enyoso kikalakalu kya maku mê.
20 Ene atena kufwa mu kithangana ni mbandu, kifwa, mukaxi ka usuku,
Abhendujuka anga afwa.
Kate mwene ni athu ala ni kutena a atolola, maji ko athu akibhanga.
21 Mukonda Nzambi utonginina o ibhangelu ya athu,
Umona o wendelu wâ.
22 Kibhwala kididi kyavundu kyavulu,
Bhudiswekela o athu ayibha.
23 Mukonda Nzambi kaxindi o kithangana,
Kya muthu kwiza kwa mwene phala ku mufundisa.
24 Mwene ubwika o athu ala ni kutena, kikubhingi ku atokwesa,
Bhu ididi yâ anga utula-bhu athu engi,
25 Mukonda mwene wejiya o ima ya mubhanga,
U atolola mu usuku, anga u abwika.
26 Mwene u abwika mukonda dya kuyibha kwâ,
U kibhanga mwene bhu pholo ya athu oso,
27 Mukonda k’ene mu mubheza dingi,
K’ene mubelesela we o itumu yê.
28 Ene abhangesa o jingadyama kudikola kwa Nzambi,
Kyenyiki, Nzambi wívwa o kudikola kwa yó atate.
29 Se Nzambi ukamba kukwatekesa, nanyi utena ku mufundisa?
Se pholo yê u isweka, nanyi mwene utena ku mumona?
Mwene ubhanga kiki kikale ku kifuxi mba ku muthu umoxi ngo,
30 Phala muthu wayibha alembwe kutumina,
Alembwe we kuta mibhetu phala o mundu.
31 Eye* wa mukwambela Nzambi, wixi:
‘Nga mutala hadi sumbala kingabhange kima kyayibha.
32 Ngitangele o kima ki ngakambe kwijiya.
Se ngabhange kima kyayibha, kinganda kibhanga dingi’.
33 Wa mufika kwila Nzambi wanda bhangesa o ima yoso kukala dingi kyambote? Wamesena kwila Nzambi umona o ima kala ki umona eye, né mwene se wa mu bhukumukina?
Éye mwene wa mufika kwila watondala, k’eme-ku kana!
Maji eye wa muxinganeka kwila, wejiya dingi kyambote o ima. Kyenyiki-phe, ngitangele yoso inga kambe kwijiya.
34 O akwa kutongoloka ni jinjimu ja mu ngivwa,
Anda zwela:
35 ‘Jobe wa muzwele ngo, k’ejiya kima.
O izwelu yê ilondekesa kwila, mwene kala ni kilunji.
36 Tamanu Jobe a mulolele* mwene.
Mukonda o itambwijilu yê yedi kala ya athu ayibha.
37 Ku kituxi kyate, wabandekesa-ku dingi o kubhukumuka,
Mwene ubeta jindamba mwaxaxi ketu ni kutusebhulula,
Uya ni kutatela o Nzambi yakidi!”