Daniyele

10 Ku muvu wa katatu wa utuminu wa Silu, sobha ya Pélesa, Daniyele, amwixana we Beletexazale, watambula njimbu yatundu kwa Nzambi. O njimbu yexile yakidi, yalungile ni ita yadikota. O njimbu ya mutetulukila kyambote. Mwene wamono kisumwa kya mukwatekesa kutendela o ima ya mwene.

2 Mu izuwa yenyoyo, eme Daniyele, ngadikwatele mukondo mu semana jitatu jamuvimba. 3 Kingadi kudya kwa ngiwabhela, kingadi xitu, kinganu we vinyu, kingadiwesa máji mu mukutu mu semana jitatu jamuvimba. 4 Mu kizuwa kya makwinyi ayadi ni kiwana kya mbeji ya dyanga, kyoso ki ngexile bhu mbandu a ngiji yadikota, kifwa, o ngiji ya Tigre,* 5 ngabhetula o mesu, ngamono diyala wazwatele izwatu ya linyu, wexile ni phonda ya ulu yambote ya Ufaze mu mbunda. 6 O mukutu wê, wedile kala kidizolitu.* O pholo yê yexile musédima kala nzaji. O mesu mê edile kala mulengu wa túbhya.* O maku ni inama yê, yedile kala ngondo ya mubhenya. O dízwi dyê dyedile kala dya athu avulu. 7 Eme ngo Daniyele ngamono o kisumwa. O mayala exile n’eme kakimono. Maji ene amateka kuteketa kyavulu ni wôma, ya alenge phala kudisweka.

8 Ngaxala-phe ubheka wami. Kyoso ki ngamono o kisumwa kiki kyonene, mukutu wami wabotomoka, pholo yami yadisuwata, nguzu yoso mu mukutu yabhu. 9 O diyala dyamateka ku ngizwelesa, maji kyoso ki ngayi ni kumwivwa, ngabu bhoxi, kikulaleka ngayi ku kilu. 10 Sayi-phe muthu wa ngikwata, wa ngizambesa, wa ngibhetula, wa ngifukamesa, yu wa ngikwata bhu maku. 11 Mwene wa ngambela, wixi:

“Daniyele, u muthu a kuzolo kyavulu, ivwa kyambote o maka u nganda kutangela. Imana! Mukonda Nzambi wa ngitumikisa kokwé.”

Kyoso mwene kya ngitangela o ima yiyi, ngabalumuka, ngakexile muteketa.

12 Mwene wa ngambela, wixi: “Daniyele, kukale ni wôma. O musambu wé a wivu tunde o kizuwa kya dyanga ki wasoto kutendela o ima yiyi, éye waditulula bhu pholo ya Nzambi yé. Eme ngeza mukonda dya musambu wé. 13 Maji o kilamba kya Pélesa, kyeza muzoka n’eme mu makwinyi ayadi a izuwa ni kamoxi. Bhenyobho, Mingyedi o mutwameni wa ilamba, weza mu ngikwatekesa, ngexile bhenyobho kumoxi ni jisobha ja Pélesa. 14 Kindala ngeza phala ku kutetulukisa o ima yanda bhita ni mundu wé mu izuwa yasukidilaku, mukonda o kisumwa kiki kyanda dikumbidila ku hádya.”

15 Kyoso kyazubha ku ngitangela o maka yá, ngabhetama o pholo bhoxi, ngalembwa kuzwela. 16 Bhenyobho, kwa ngimonekena kima kyedile kala muthu, wa ngikwata ku mizumbu, dikanu dyami anga dijikuka, éme ngambela yó wemanene bhu pholo yami, ngixi: “Ngana yami, o kisumwa kiki kya mu ngiteketesa. Kingala we dingi ni nguzu. 17 Kyene mwene, nguzu mu mukutu ya ngibhu. Kingamutena we kubhwima. Selevende yé-phe ngana yami, ki ngaliki, ngitena kyebhi kuzwela n’eye, u ngana yami?”

18 O yó wedile kala muthu, wa ngikwata dingi, o nguzu anga i ngiza dingi mu mukutu. 19 Bhenyobho, mwene wa ngambela, wixi: “Kukale ni wôma, u muthu a kuzolo kyavulu. Tululuka, swina! Kyene mwene, swina!” Kyoso mwene kyazwela n’eme, eme ngaswina dingi. Kyenyiki nga mwambela: “Zwele ngana yami, mukonda eye wa ngiswinisa.”

20 Mwene wa ngambela: “Kindala nganda vutuka phala kubhânga ni kilamba kya Pélesa. Kyoso ki nganda kwila ngabhânge-nê, kwanda kwiza o kilamba kya Ngelexa. Maji eye wejiya se mukonda dyahi ngeza muzwela n’eye? 21 Eme ngeza phala ku kutangela o ima yosoneke mu divulu dyakidi. Kikwala muthu utena ku ngikwatekesa mu ima yoso yiyi, kikale ngo Mingyedi, o kilamba kyenu.