Hozeya
1 Yiyi yene o njimbu ya Jihova yatambula Hozeya* mon’a Bedi, mu izuwa ya Uziya, Jotamu, Akaji ni Ezekiya, o jisobha ja Judá ni mu izuwa ya Jelobowamu mon’a Jowaji, sobha ya Izalayele. 2 Kyoso Jihova kyamateka kutudila o njimbu yê kwa Hozeya, Jihova wa mwambela, wixi: “Nde, ukazale ni kiwaya, uvwala-nê an’a undumbu. Mukonda o undumbu wabhangesa akwa ixi yenyiyi kubhana dikunda kwa Jihova.”
3 Mukyenyiki, mwene wayi, wakazala ni Ngomele mon’a Dibalayimi. Ngomele anga wimita, u muvwalela mon’a diyala.
4 Jihova anga u mwambela, wixi: “Muluke o dijina dya Jezelele,* mukonda kwakambe ngo bhofele, nganda kastikala o mwiji wa Jehú, mukonda dya ujibhangânga wabhiti mu Jezelele. Mukusuka-ku, o utuminu wa dibhata dya Izalayele nganda ubhwisa. 5 Mu kizuwa kyenyokyo, nganda bukula o mufula wa Izalayele, mu honga ya Jezelele.”
6 Ngomele wemita dingi, yu wavwala mon’a muhatu. Nzambi wambela Hozeya, wixi: “Muluke o dijina dya Lo-Luhama,* mukonda akwa Izalayele kinganda ku akwatela dingi henda, nganda ku akaya bhu pholo yami. 7 Maji akwa Judá, nganda ku akwatela henda, nganda ku abhulula, mukonda éme ngi Jihova Nzambi yâ. Kinganda ku abhulula ni xibhata ni mufula, ni ita, ni jikabalu mba ni yó endela ku jikabalu.”
8 Kyoso Ngomele kyazubha kusumuna* Lo-Luhama, mwene wemita dingi, yu wavwala mon’a diyala. 9 Mukyenyiki, Nzambi wambe, wixi: “Muluke o dijina dya Lowamí,* mukonda enu ki mu mundu wami, eme wami kinganda kala ngi Nzambi yenu.
10 “O mundu wa Izalayele wanda vula kala museke wa musanza wa kalunga, katena ku uzonga, mba ku ukwata konda. Bhu kididi bhwa ambela, exi: ‘Enu ki mu mundu wami,’ anda kwa ambela: ‘An’a Nzambi ya mwenyu.’ 11 O mundu wa Judá ni mundu wa Izalayele anda ku a ongeka n’akale kumoxi, ene anda sola mutwameni umoxi ngo wanda ku atwamenena, anda tunda mu ixi yenyoyo, mukonda kyanda kala kizuwa kyadikota mu Jezelele.