Hozeya
2 “Tangelenu o jiphange jenu ja mala: ‘Enu mu mundu wami!’*
Tangelenu o jiphange jenu ja ahatu: ‘Éye u muhatu a kukwatela henda* kwa Nzambi!’
2 Mam’enu mu mubazela, mubazelyenu,
Mukonda mwene ki muhatu wami, eme kingala ngi mwadi wê.
Mwene watokala kweha o undumbu wê.
Katokala dingi kuta jiphanda.
3 Se keha kuta jiphanda, nganda muzula. Wanda kala ni thuxi, kala mu kizuwa kya muvwala.
Nganda mubhanga mukwa ni kikangalakata,*
Nganda mukitula kala ixi ya kukuta,
Nganda mwehela kufwa ni dinyota.
4 An’é kinganda ku akwatela henda,
Mukonda a avwalela mu undumbu.
5 Mukonda o manyâ kiwaya.*
O yó wa avwala, wabhange ima ya jisonyi, kuma wambe wixi:
‘Nganda kayela o jisayi jami,
Yó ene mu ngibhana o mbolo ni menya,
Ene mu ngibhana o izwatu ni máji ni mauholwa.’
6 O njila yé nganda ixita ni minya.
Nganda tunga-mu ilumbu ya matadi,
Phala mwene kamone dingi o njila ya kuditela.
7 Mwene wanda kayela o jisayi jê, maji kanda kwasanga.
Wanda kwasota, maji kanda kwamona.
Mukyenyiki, mwene wanda zwela: ‘Nganda vutuka kwa mwadi wami wokulu,
Mukonda m’ukulu, ngazediwile, maji lelu kana.’
8 Mwene wadijimbi kwila, éme ngexile mu mubhana o sevada,* o vinyu ya ubhe ni máji.
Wadijimbi we kwila, éme ngexile mu mubhana phalata ya nzungule,
Ni ulu, yexile mubheza-nayu Bahale.
9 Mukonda dya kiki, mu kithangana kya kubhongolola nganda vutuka,
Phala ku mutambula o sevada yami ni vinyu ya ubhe.
Nganda mutambula o izwatu yami yexile muzwata phala kuvunga o thuxi yê.
10 Mukyenyiki-phe, nganda bhangesa o jisayi jê ku mumona o thuxi.
Séku diyala wanda tena ku mubhulula bhu maku mami.
11 O kusanguluka kwê, kwanda bhwa.
Nganda mufidisa kubhanga o jifesa jê joso, o jifesa ja mbeji ya thethama, ni jifesa ja jisábhalu ni jifesa ja mukwa.
12 Nganda bwika o mixi yê ya midiva ni mixi ya mufiku, yambe mwene kwila:
“Yiyi yene o futu ya ngibhana o jisayi jami.”
Mixi yiyi nganda ikitula mixitu.
O yama ya muxitu yanda dya o mixi.
13 Nganda mu kastikala mukonda dya izuwa yoyo, yexile mubhakula jisata ku iteka ya Bahale,
Kyoso kyexile mu difwamesa ni jibixa,* ni makembu, phala kuya musota o jisayi jê.
Mu kubhanga kiki, mwene wexile mu ngijimba,’ kyene kyambe Jihova.
14 Maji nganda mubhomba,
Nganda mwambata mu kikangalakata.
Nganda mutangela tumaka twambote twanda mutula ku muxima.
15 Bhenyobho, nganda mubhana dingi o mixi yê ya mividi.
O honga ya Akole yanda dibhanga dibhitu dya kidyelelu phala mwene.
Bhenyobho, mwene wanda ngitambwijila kala mu izuwa ya unzangala wê.
Kala mu kizuwa kyatundu mu ixi ya Ijitu.
16 Jihova wambe, wixi: Mu kizuwa kyenyokyo,
‘Eye wanda ngixana kya “mwadi wami.” Kwanda ngixana dingi “ngana yami.”’
17 Eme kinganda kwehela kutumbula dingi o majina a iteka ya Bahale.
O majina a iteka yenyiyi, kanda alembalala dingi.
18 Mu kizuwa kyenyokyo, nganda ku atela kikutu bhukaxi ka ene ni yama phala o mbote yâ.
Ni bhukaxi ka jinjila jibhita bhulu, ni yama idihuha bhoxi.
Nganda zubha o mifula ni xibhata ni ita mu ixi yiyi.
Nganda ku abhangesa kutunga* ni kutululuka.
19 Eye wanda kala muhatu wami kate ku hádya ni hádya.
Nganda kuzenza, ni ku kubhanga mbote.
O henda yami kokwé, yanda kalelaku.
20 Eme nganda kala ngi munum’yé wa fiyele.
Eye wanda kwijiya Jihova.’
21 Jihova wambe wixi:
‘Dyulu nganda dibhana yoso yabhindamena.
O dyulu dyanda bhana ku ixi yoso yabhindamena.
22 O ixi yanda bhana ku vinyu ya ubhe, ku sevada ni ku máji, yoso yabhindamena.
Jezelele* wanda tambula o ima yoso yiyi, kala kya ibhingi.
23 Jezelele nganda ikuna kala mbutu mu ixi.
Yó akambele ku mukwatela henda,* nganda ku mukwatela henda.
O yó ki mundu* wami, nganda ku atangela: “Enu mu mundu wami.”
Ene anda zwela: “Eye u Nzambi yetu.”’”