Mukanda wa Kayadi ku Akwa Kolindu
10 Eme Phawulu, sayi athu mudyenu amba kwila, ngi muthu walenduka kyoso ki ngikala mwaxaxi kenu, maji nga swina kyoso ki ngi kamba kukala ni enu. Bhukaxi ka kubatâma ni henda ya Kidistu, ngi mi dyondela kwila, 2 o yó abanza kuma, twala ni wendelu wa difwangana ni wa athu a mundu yú, a lungulule o ukexilu wâ, phala kyoso ki nganda mi kunda ki ngi abazele ni nguzu yoso. 3 Sumbala tu athu a xitu, etu ki tu lwa o ita kala ki lwa o athu mu xitu. 4 O mauta u tubhânga nawu, kadifwangana ni mauta ene mubhânga nawu o athu ku mundu yú. Maji o mauta metu Nzambi mwéne wa tubhana nawu. Ene ala ni kutena kwa kubula o ilumbu. 5 Twa mu tolola o ixinganeku yoso yayibha ni ima yoso ifidisa o muthu kwijiya Nzambi. Twa mutolola we o ibanzelu yoso yayibha phala mu tumake Kidistu. 6 Kyoso ki mwanda zubha kutumaka, twanda kala polondo phala kubazela o athu oso axibhaka.
7 Enu mwene mu fundisa o athu kala ki mwene mwa mona ku pholo. Se muthu uxikina kwila watokala kwa Kidistu, wabhingi kuxinganeka mu maka enyá: Kala kyatokala mwene kwa Kidistu, etu we twatokala kwa Kidistu. 8 Né mwene se ngi dinanza mukonda dya ungana u twa tambula kwa Ngana phala ku mi swinisa, kana phala ku mi zozesa, ki ngeji kala ni jisonyi. 9 Mu ku mi sonekena o mikanda yami, ki nga mesena mubanza kwila, nga mu mi kwatesa wôma. 10 Ene amba, exi: “O mikanda ya Phawulu yala ni nguzu ni kutena, maji kyoso mwene kya kala n’etu, mukwa wôma, o ima yazwela ki yala ni valolo.” 11 Woso wa muzwela kiki, watokala kwijiya kwila, o ima i tu mi sonekena mu mikanda, kyoso ki tukala dikanga, yene i twanda bhanga ki twanda kala ni enu. 12 Mukonda ki tusota kudisokesa ni yó a diximana mudyâ. Kyoso ene kya disokesa mudyâ, a londekesa kwila kejiya kima.
13 Etu ki twanda dinanza ni ima ya túndu o kikalakalu ki twa tambula, maji twanda dinanza ngó ni kikalakalu kya tubhana* Nzambi. O kikalakalu kiki kyalungu we ni ku mi bokela. 14 Kyoso ki tu mi kunda, tubhanga ngó o ima ya tu tumu Nzambi, mukonda étu twa dyangele ku mi bokela o njimbu yambote yalungu ni Kidistu. 15 Etu kitwene mu dinanza ni ima ya túndu o kikalakalu kyetu, kiki kilombolola kwila, kitwene mu dinanza ni ikalakalu ibhanga o athu engi ni kuswina kwoso. Maji twa mesena kwila, kyoso o kixikanu kyenu kiya ni kukula, o kikalakalu kyetu mu ididi yetu ya kubokela, kikule we. Kyenyiki, o kikalakalu kyetu kyanda dibandekesa dingi. 16 Mukonda twamesena kuboka o njimbu yambote mu jimbanza ja mukwá, phala ki tudinanze ni ikalakalu yabhange athu engi mu jimbanza jâ. 17 Kala kyosoneke mu Mikanda Ikôla, exi: “Woso u dizangeleka, a dizangeleke mwa Jihova.” 18 Jihova mwéne uximana o muthu u mu xikina. Maji o muthu katokala kudiximana mudyê mwene.