Hozeya
6 “Zenu, tuvutukyenu kwa Jihova.
Sumbala mwene watusanasana, mwene wanda tusaka.
Sumbala mwene watukwama, mwene wanda tumba o jifidila jetu.
2 Mu kubhita izuwa iyadi, mwene wanda tubhana dingi mwenyu.
Mu kizuwa kya katatu mwene wanda tubalumuna.
Twanda kala jinga bhu pholo yê.
3 Twanda kwijiya Jihova, twanda bhanga nguzu phala ku mwijiya.
Mwene wanda bhixila mwene, kala o kuma kikukya.
Wanda kwiza kokwetu, kala ki noka o mvula,
Kala ki noka o mvula ya kudinji, ibetesa kyambote o mavu.
4 “Éye Efalayíme tata, ihi i ngatokala ku kubhanga?
Éye Judá, ihi i ngatokala ku kubhanga?
Mukonda o henda yenu yedi kala o mbundu ya kamene,
Kala o dimume kidinange ku kukuta.
5 Mukonda dya kiki, nganda tumikisa o jipolofeta jami phala ku mibwika.
Nganda mibwika ni izwelu itunda mu dikanu dyami.
O kifundisu kyami kokwenu, kyanda bhenya kala mukengeji.
6 Nginda o henda yakalelaku, o jisata kana.
Ngisanguluka kyoso ki muxikina kwila ngi Nzambi yenu,
O jisata ja kwoha ji mu ngibhakwila ki jene ji ngisangulukisa.
7 Kuma ene akwa ituxi, abhukumukina o kikutu kyami.
Mu ididi yenyiyi, ene a ngibalukila.
8 Mu mbanza ya Ngiliyade, mwala athu avulu abhanga ima yayibha.
Ene azunzumuna manyinga avulu.
9 O kibuka kya akunji, kyedi kala o kibuka kya miyi kibatamena muthu ubhita.
Ene ajibha o athu mu kikoka kya Xikeme,
O ima yabhanga ibhekesa jisonyi.
10 Mu Izalayele ngamono-mu ima ya isunji.
Efalayíme wabhange undumbu mwenyomo.
11 Enu mu mundu wa Judá, ejiyenu-kyu kwila kithangana kyoxinde kya,
Kala kibhita mu kithangana kya kubhongolola, enu anda myongeka. Nganda kwongeka dingi o mundu wami a ambata mu jixi jengi.”